Read Ateso Isaia 53 Bible Online

Isaia 53 - Ateso bible

Isaia 53

¹ Iŋai iyuunit nukiirarit? Ido iŋai epukokinitai akan naka EJAKAIT?

² Naarai kopoloor kakonyeneke kwape yenikiraa yenitosokok, Kwape aliasit naelomuni kaneeoŋit: Emamei asubunet karaida aliogotot, tetere kiseseni ŋes, Emamei atemelel nakisinobelei.

³ Aponi komenai, koŋeroto ituŋa; Etuŋanan lokican, loenaikinit aiturur: Kwape loibwaiata ituŋa akecekonyen komenai kwaŋin, Komam kinyarit idiobore.

⁴ Abeit abu kibwok aitururuwok, kodaka icaniwok: Kwabo kipou kaomitos bala isiriebitai, Iticanitai Edeke, ereitai.

⁵ Konye aponi kimusuŋai kanuka epaliwok, Aponi komaearai kanuka numam adolitewok: Aiticanio kanuka ainapakiniwok kojai kaŋes; Ikemaearin kes kitaŋaleunete oni.

⁶ Kapaasi oni kere kwape amerekekin: Kibelokin ŋinituŋanan orotoke: Ebwaiki EJAKAIT kamake numam adolitewok kere.

⁷ Aponi kimanai, kwabo kitasono komam eonit akeituk; Kwape kimerekek yeneyanaario aario, Ido kwape ililiŋia amerekek kakonyen nuka ikekatubok ajul: Eebo, mam kooŋ akeituk.

⁸ Koyaŋaarai kanuka aimanit ka etube; Ido luka aketur, iŋai kakesi abu koomite ebe aponi kogelarai Anyoun kakwap naka lukajarak? Aponi kisiriebai kanuka epali loka ikatuŋa.

⁹ Kobokikis akeilit nepepe ka lukaronok, Ido ka lukabarak katwanareke; Karaida mam kipaliikinit, Kwabo komamei aiŋalanut kaitukuke.

¹⁰ Konye itojokit EJAKAIT amacar ŋes; Kisiturur; Naainakinia akeijar araun asubanit kanuka aronis, Eanyuni akeur, iyatakini akepaarasia, Ka ŋun nuemin EJAKAIT ekeriakaros kakanike.

¹¹ Eanyuni nuepote kaitaaritoi naka akeijar, ido italakarete: Kanuka aijeneke einakini ekakejaanakinan loedolit luipu adol Ibwoki numam adolitekec.

¹² Tape akorakini ŋes akorakinet nepepe ka lukapolok, Etiaki iŋatan nepepe ka lukagogoŋ: Naarai abu koluŋak akeijar kiton atwanare, Kimarakinai ka ikadiakanarak: Kwabo abu kibwok aronis naka luipu, Epurokini lukadiakanarak.