Read Ateso Isaia 6 Bible Online

Isaia 6 - Ateso bible

Isaia 6

¹ Toma okaru ŋol loatwania ekabaka Usia abu kaany EJAKAIT iboie koicoloŋ, loikeara, loiceleleoritai, ereret daloka akenapito kileleba eye kalu.

²Kobwoete Iserapin kokuiuken; ŋolidiopet kojaas abebenoka akanykape; abu korapak aarei akonyeneke, korapak aarei akejeneke, aarei da kopororia.

³ Kosodi kiworo ediopet mama ejai loce, kotema atiar, “Lokalaunan, Lokalaunan, Lokalaunan, EJAKAIT loka ajoresio: Akwap kere ileleba akeibuses.”

⁴ Ido komaranata ategerio nuka ekek kanuka eporoto loka ŋol kalokiworoi, etogo da kilelebun apuru.

⁵Kasodi atemar atiar, “Wu okwe! Abei ai? Naarai atwana, naarai arai eoŋ etuŋanan loka aituk namam elai: eboie da kokidiŋ otuŋa luka aituke numam elaete: naarai aanyut akakonye Ekabaka, EJAKAIT loka ajoresio.”

⁶ Kosodi kopor ediopet koserapin mama ajai, kojaas katotolet naesarani kakanike, nakelemuni karidet kotem.

⁷Kotiroria akaituk, kobala ebe, “Koany, atiro na akoniituk: kilemar numam adolitekon, ka akonironis da aluci.”

⁸ Keira eporoto loka EJAKAIT kobala ebe, “Ejukari bo iŋai? Iŋai da loecamuni alosikin sio?” Kasodi atemar atiar, “Eoŋ lo: kijukarai.”

⁹ Kotema atiar, “Kolot, kolimok ituŋa lu ebe: “Kiiranarete, konye mam ijenunete; Koanyuŋunete da, konye mam imisiikinete.

¹⁰Kitisiepaik itauon luka ituŋa kalu, Kisimina akiikec, kitumudak akonyekec; Kinyeis aanyun kakonyekec, Ka akiirar da kakeceki, Kojenut kotauonokec, kibelokinos, konaleut.”

¹¹Kasodi eoŋ atemar atiar, “Wu EJAKAIT, itodolete bo ai?” Koboŋok ebe, “Aitodol neiswapiata ireria, komamei yeniboie kotoma, Itogoi da komamei ituŋanan, kiswap akwap cut.

¹² Kisibwosite EJAKAIT ituŋa neelwana, Kipuaros amejei kokidiŋ kakwap.

¹³ Karaida kesal yenikitomonet kotomakeŋ, Idoporio bobo cut: Kwape epeduru, arai elua loesali atoromike, naejepere.” Kwaŋin ikinyom lukalaunak kes atoromake.