Read Ateso Isaia 60 Bible Online

Isaia 60 - Ateso bible

Isaia 60

¹ Konyou, koca, naarai adolu akoni ica, Kiliyaik jo aibuses naka EJAKAIT.

²Naarai, koany, erapakini amuton akwap, Ka amuton nairiono cucucuc erapaari atekerin: Konye kiliyaikini jo EJAKAIT, Etakanuni da akeibuses kamakon.

³ Epote atekerin aicakon, Ikabakan da epote amwekimwek naka ailiyaunikon.

⁴Kiteluo akonyekon koŋoleŋol, koany: Etukonokinos kere nepepe, epote mama ijai: Epote ikonisap kama elwana, Akonipesur da edakio.

⁵Kosodi kanen ianyuni kitacaikin, Erieŋuni ekonitau, eleli; Naarai ijulunio mamakon aipadara naejai aŋolol, Ebuni da abar naka atekerin mamakon.

⁶ Kirapaari rwaru aipues naka ikaalai, Itak luka ikaalai luka Midian ka luka Epa da; Epote kere koSeba. Eyaunete esabu ka emina lokisupuruŋuno, Elimorete da aiturio naka EJAKAIT.

⁷ Etukonokinio neijai isipanin kere luka amerekekin luka Kedar, Kijaanakinete jo imerekekin lumaseniko luka Nebaiot: Edokanarete otemuka Kacamunio, Etubusikini da etogo loka aibusesuka.

⁸Lukaŋai bo lu lueporitos bala idouon, Ido bala ajeleik kokekia luka akaisikec?

⁹ Abeit kedareunete apujana, Egeunete atakerin nuka Tarusis ayaun ikonisap kama elwana, Nepepe ka epuesakec ka esabukec, Kanuka ekiror loka EJAKAIT Ekonideke, Ka Ekalaunan loka Isirael, Naarai ŋes kitubusik jo.

¹⁰ Ido edukete imo arwatatinikon, Kijaanakinete da ikabakanakec: Naarai abu kenom jo kotoma akanyunyura, Konye ketim kotoma akasianut.

¹¹ Ido enaanara duc iruteikon; Mam egoleneno paaran ka kuare da; Tetere kiinunete ituŋa abar naka atekerin, Ikecekabakan da inarenikinitai.

¹² Naarai edaun rwaru ateker ka ajakanut ŋin namam kijaanakini jo; Eebo, emudiario cut atekerin ŋun.

¹³ Ebuni mamakon aibuses naka Lebanon, Ŋes eberos; ka etidar, ka eteasur [4] da; Aitojok aiboisika nakalaunan, Ido etubusikini aibois naka akakeje.

¹⁴ Epote isap luka ŋul kaluapotu konarut jo airapanakin jo; Ka ŋul da kere luapotu komenito jo isudedeonokinos kwap kakejekon; Kinyaraete jo Ere loka EJAKAIT, Sion loka Ekalaunan loka Isirael.

¹⁵Karaida aponi kinyein kolai da, Komam inujanan yenikitorenenei neuai ijo, Ketuluori jo araun ajokis naepol namam enaŋi, Aiyalama naka aturio nuipu.

¹⁶ Inaki rwaru akile nuka atekerin, Ido inaki ikisin luka ikabakan: Ŋeŋuni da ebe, Eoŋ EJAKAIT arai Eketajaranikon, Ido Ekalakunanikon, Ekagogoŋen loka Yakob.

¹⁷Ayauni esabu aibois naka aisinit, Epuesa da aibois naka asuat, Aisinit aibois naka akito, ka asuat da aibois naka amor: Etarauni ijakakon luisinapikinete, Ikoniketelemak da luisibecikinete.

¹⁸ Mam epupunio bobo epali kakwapukon, Karaida ameje karaida amudiario koikorunokon; Konye imaikini arwatatinikon Aitajar, Ka iruteikon da. Aiturit.

¹⁹ Mere bobo akoloŋ eraenena akoni ica paaran; Kwabo mere bobo elap kicaanakini jo kanuka ailiya; Konye EJAKAIT eraun kamakon aica namam edaun, Ido Ekonideke eraun aibusesukon.

²⁰ Mam bobo ibiror akonikoloŋ, Kwabo mam bobo elumori ekonilap: Naarai EJAKAIT eraun akoniica namam edaun, Konanete da apaarasia nuka akuudianakon.

²¹ Ikonituŋa da eraunos kere ikadolitok, Irumete rwaru akwap ikar kere; Atenu nakolo eraikini eoŋ, aswam naka akakanin, Tetere ketubusikinio.

²² Yenididi eraun alukumit, Yenedit da ateker nakagogoŋ: Kedol apakikec, Eoŋ EJAKAIT esunyakini ŋun.