Read Ateso Isaia 63 Bible Online

Isaia 63 - Ateso bible

Isaia 63

¹ Iŋai bo ŋol loebunit koEdom, Ejaas kigoen luitereŋitai, ebunit koBosura? Ŋol loibusak ikenapen, kolosi kotoma apolou naka akegogoŋ? “Eoŋ loenera kotoma adolit, loapedorit aitajar.”

² Kanukinyo ereneatatar ikoninapen, Ikonigoen da koputos bala ŋol loicakacakai acuetz

³ “Ecakacak eoŋ bon acuet: Ido kotuŋa amamei yenikijaar eoŋ: Eebo, ecakacak kes kakaisiop, Ido epudapud kes kakanyunyura; Epiricanakinos aokot nuka aijarakec onapeneka, Emodimod eoŋ da ikagoen kere.

⁴Naarai ajai apaaran naka ainyanar otauka, Adolu da ekaru loka ilakunaka.

⁵ Abu kanolenol, komamu idio yenikeŋarakini; Abu kaumok naarai amamei idio yenikegaŋuni: Kanuka ŋun akakan kelopet ŋes kainuni aitajar, Akanyunyura da ŋes kegaŋuni.

⁶ Abu kecakacak ituŋa kakaisiop, Ketemer kes kakanyunyura, Kabukok kwap aokot nuka aijarakec.”

⁷Alimuni do asianut-nakamin naka EJAKAIT, Kaitureta nuka EJAKAIT, Kwape ejaatar ŋun kere nukiinakin EJAKAIT oni; Ka ajokis naepol mama ejai ekek loka Isirael, naeinakinit kes, Kwape ejaar akeitim, kwape ipadar akesianut-nakamin.

⁸Naarai abu kotema atiar, Abeit eraas kesi ikatuŋa, Idwe lumam do iŋalaete: Kanuka ŋun korau ŋesi Eketajaranikec.

⁹ Aponi kiticanai ŋes kaiticaniokec kere, Koyu kes koimalaikaneke, Abu kolaku kes kotoma aminake ka akeitim da; Kodakenenei kibwokenenei da kes apaarasia kere nukasonya.

¹⁰ Konye apotu kijerukikis, kitakadikis Emoyoke Lokalaunan: Kanuka ŋun abu kibelokin araun lokasurupikec, Koluik aitiji kes.

¹¹Kosodi kiitu apaarasia nukasonya, Nuka Musa ka iketuŋa, Kobalasi ebe, Ai bo ejai ŋol lokitodokuni kes alemun kaŋolol, Nepepe ka ekecokon loka ekesipan? Ai bo ejai loabu kibwaik Emoyoke Lokalaunan tomakec?

¹² Loetolosi akekan nakaibuses kakan nakoteten naka Musa? Loatiaki akipi kakonyenekec, Amaikinor ŋes elopet ekiror lomam edaun?

¹³Loetotori kes ataro kwape ebalasi kamodiŋ, Kinyeis aiguikin?

¹⁴Kwape ijesarotor ibaren aditot, Abu Emoyo loka EJAKAIT kisiyeŋu kes: Kwaŋin ibu ijo kiŋarenik ikonituŋa, Ijo elopet amaikinor ekiror lokaibuses.

¹⁵Kosesen kwap ijai akuj, Koany ijai aibois naka alaunitekon, ka naka aibusesukon da: Ani bo akokitekon ka aswamisiokon nuka agogoŋ? Aipielit naka ekonitau, ka aitimesiakon itikoritai kamaka.

¹⁶ Naarai irai ijo Papakosi, Karaida kemam Aburaam kijeni sio, Isirael da mam kilimorit sio: Wu EJAKAIT, irai ijo Papakosi; Ekosikalakunan ameun ikar kere ŋes Ekonikiror.

¹⁷ Wu EJAKAIT, kanukinyo kitapaanaria jo sio korotinikon, Kitinikikia da itauonokosi komam kiyoŋit jo? Koboŋ kanuka ikonibulesin, atekerin nuka airumitekon.

¹⁸ Apotu ituŋakon lukalaunak kirumata aiboisikon nakalaunan nediokasilon: Ecakacakata ŋes lukasurupokosi.

¹⁹Kiluor bala ŋul lumam apeŋo jo irumit; Bala lumam apeŋo emaikinitai ekonikiror.