Read Ateso Ilebin 10 Bible Online

Ilebin 10 - Ateso bible

Ilebin 10

¹ Kitiŋata Nadab ka Abiku, odwe luka Aaron, ŋinituŋanan akeisupurunet, kibwaikis akim toma, kibwaikis da lukisupurununo, kijaikis akim naegela kakonyen nuka EJAKAIT, namam ŋes ecorakinit ke.

² Kolom akim kakonyen nuka EJAKAIT, kicweik kes, kotwakikis akonyen nuka EJAKAIT.

³ Kosodi Musa atemar Aaron atiar, “Na ŋes ŋin naabala EJAKAIT ebe, ‘Ketalaununoo eoŋ kotoma kaŋul kalukekunyakinete eoŋ, ketopoloonorio kakonyen nuka ituŋa kere.’ ” Kililiŋ Aaron.

⁴ Konyarau Musa Misael ka Elisapan, odwe luka Usiel papa lodidi loka Aaron, kotema kes atiar, “Kikunyutu, kodakasi iinacanakus kaneejai aibois nakalaunan, koyaŋaasi kiŋa kiidukurun.”

⁵Kosodete kesi aikunyun, kodakasi kes kokootinikec, koyaŋaasi kiŋa kiidukurun; kwape abalar Musa.

⁶ Kotema Musa Aaron, ka Eleasar, ka Itamar, odweke atiar, “Sirikilakasi itima luka akwesikus, karaida aicil ikusinapen; kinyeis atwakare, kinyek ŋesi anyunyurikin ekodet kere: konye iinacanakus, ekek kere loka Isirael, kibworoto aicwe naecweiki EJAKAIT.

⁷ Mam ilomarete kiŋa kekek loka ewema loka airiamunun, kinyeis atwakare: naarai akinyet nakinyonyoanakina naka EJAKAIT ejai kamakus.” Kiswamata kesi kwape ejaar akirot naka Musa.

⁸Kotema EJAKAIT Aaron atiar,

⁹ “Sirikimat ebino karaida nuitemerete, ijo ka odwekon da, nailomanariata owema loka airiamunun, kinyeis atwakare: eraun ekisil ikar kere anatar aturiokus:

¹⁰ Tetere itiakete yenikalaunan ka yenika ituŋa kere; itiakete da yenimam elai ka yenelai;

¹¹ Tetere isisianakinete idwe luka Isirael ikisila kere lualimonokinit EJAKAIT kes kama ka Musa.”

¹² Kotema Musa Aaron, ka Eleasar, ka Itamar, odweke luasalitos ebe, “Koyaŋaasi ainakinet naka akiria naedeun naka ainakineta nuka EJAKAIT nueinakinere kakim, konyamakis ariri naka etem komamei yenikitubuunet: naarai erai nakalaunan noi:

¹³Inyamakinete aibois nakalaunan, naarai erai ewaikon, ka ewai loka odwekon, kotoma ainakineta nuka EJAKAIT nueinakinere kakim; naarai kecorakinitai eoŋ kwaŋin.

¹⁴ Inyamakinete atorob naijaŋio ka amurwo naedakakinitai aibois naelai; ijo, ka odwekon, ka adwekon nepepe kajo; naarai kiinakin araun ewaikon, ka ewai loka odwekon, kotoma asuban nuka ainakineta nuka ainapakin nuka idwe luka Isirael.

¹⁵Eyaunete amurwo naedakakinitai ka atorob naijaŋio nepepe kainakineta nueinakinere kakim nuka asiepai, ajiaŋ ŋes araun ainakinet naiianio kakonyen nuka EJAKAIT: eraun nakon, ka naka odwekon da, araun ewaikon ikar kere; kwape kicorakinia EJAKAIT.”

¹⁶ Komo Musa noi ekoroi loka ainakinet naka adiakaret, ido koany, kicwei: konyunyurik ŋesi Eleasar ka Itamar, odwe luka Aaron luasalitos, ebe,

¹⁷ “Kanukinyo mam ipotu konyamakiniata ainakinet naka adiakaret aibois nakalaunan, naarai erai nakalaunan noi, abu ŋesi koinak ŋes aibwokia numam adolit nuka ekodet, aitulucio kes kakonyen nuka EJAKAIT?

¹⁸ Koany, mam aokotoke ayaŋaunitai toma aibois nakalaunan: tikinyamakis cut aibois nakalaunan, kwape kecorakinia.”

¹⁹ Kotema Aaron Musa atiar, “Koany, ainakis lolo ainakinetekec naka adiakaret ka ainakinetekec naicweio kakonyen nuka EJAKAIT; kadoikis eoŋ akiro nuetia nen: arai kanyam lolo ainakinet naka adiakaret, ti kereka ketojoki kakonyen nuka EJAKAIT?”

²⁰Kepupu Musa ŋun, kitojok kakonyeneke.