Read Ateso Ilebin 13 Bible Online

Ilebin 13 - Ateso bible

Ilebin 13

² “Ketakanu kamuny naka ituŋanan abuun, arai asalabit, arai aisorit, korau kamunyoke adek naka atapon, ŋes konyet eyaŋaunere neejai Aaron esasedoti, arai neejai ediopet kodweke isasedotin.

³Irerei esasedoti adek naejai amunyoke: arai kekwaŋu ijulot yenikotoma adek, aputo naka adek da elomarit toma amunyoke, erai adek naka atapon; irerei esasedoti ŋes, elimokini ebe mam ŋes elai.

⁴Arai kekwaŋu aisorit naejai amunyoke, aputoke da mam elomarit toma amunyoke, mam ijulotoke ekwaŋuuna, ŋes konyet egolokinio esasedoti ŋin yenejai adek apaarasia akanykaarei.

⁵Irerei esasedoti ŋes apaaran nakikanyetekaarei: ido koany, arai eanyuni ebe asal adek kwape kwaŋin, komam adek isiarakina amunyoke, ŋes konyet egolokinio bobo esasedoti ŋes apaarasia ace akanykaarei:

⁶ Irerei esasedoti ŋes bobo apaaran nakikanyetekaarei: ido koany, arai kenyasuo adek, komam adek isiarakina amunyoke, elimokini esasedoti ŋes ebe elai: erai asalabit: ilosi ikenapen, eraun yenelai.

⁷Konye arai kisiarakin asalabit amunyoke, kodaunite aitodiar mama ejai esasedoti kanuka aitesegaarioke, itodiari bobo mama ejai esasedoti:

⁸ Irerei esasedoti, ido koany, arai kisiarakin asalabit amunyoke, elimokini esasedoti ŋes ebe mam elai: erai atapon.

⁹ “Kedek ituŋanan atapon, eyaŋaunio mama ejai esasedoti;

¹⁰ Irerei esasedoti, ido koany, arai ejai abuun naekwaŋ amunyoke, etakwaŋu ijulot, kotakanu akiriŋ naejon naejari kaneabuunit.

¹¹Erai atapon naŋo kamunyoke, elimokini esasedoti ŋes ebe mam elai: mam egolokini ŋes; naarai erai yenimam elai.

¹²Arai kisiarakin atapon amunyoke, arapiar amunyoke kere ageun kakou kiton akeje, kwape keanyanaria esasedoti;

¹³Kosodi esasedoti airere: ido koany, arai arapia atapon akuanake kere, elimokini ebe elai ŋin yenedeka: akwaŋu kere: elai ŋesi.

¹⁴Konye naetakanunia akiriŋ naejon, eraun yenimam elai.

¹⁵ Irerei esasedoti akiriŋ naejonit, elimokini ebe mam elai: mam akiriŋ naejonit elai: erai atapon.

¹⁶ Arai kijulakin akiriŋ naejonit, akwaŋuun, elosi ŋesi neejai esasedoti.

¹⁷ Irerei esasedoti ŋes: ido koany, arai kekwaŋu adek, elimokini esasedoti ebe elai ŋin yenedeka: erai yenelai.

¹⁸ “Arai kejau abus akuan toma amunyoke, aŋaleu.

¹⁹Toma aibois naka abus kejaun abuun naekwaŋ, arai aisorit, naekwaŋakwaŋat, naereŋereŋet, kosodi itodikinio esasedoti;

²⁰Irerei esasedoti, ido koany, arai elomarit aputoke toma amunyoke, akwaŋu da ijulot, kosodi esasedoti alimokin ŋes ebe mam elai: erai adek naka atapon, elomunit kotoma abus.

²¹Konye arai kirere esasedoti, ido koany, emameete ijul lukakwaŋak kotoma, mam elomarit toma amuny, konye enyasuorit, egolokini esasedoti ŋes apaarasia akanykaarei:

²²Arai kisiarakin amuny, kosodi esasedoti alimokin ŋes ebe mam elai: erai adek.

²³ Konye arai kesal aisorit aiboisike, komam isiarakina, erai apoore naka abus; elimokini esasedoti ŋes ebe elai.

²⁴“Arai toma amunyoke ejai neenomorit akim, akiriŋ da naenomorit eluor aisorit, naekwaŋakwaŋat, naereŋereŋet, arai naekwaŋ;

²⁵ Irerei esasedoti ŋes: ido koany, arai kekwaŋu ijulot kotoma aisorit, elomarit aputoke da toma amuny; erai atapon, elomunit kotoma anomoret: elimokini esasedoti ŋes ebe mam elai: erai adek naka atapon.

²⁶Konye arai kirere esasedoti, ido koany, emamei ijulot yenekwaŋ kotoma aisorit, mam elomarit toma amuny, konye enyasuorit; kosodi esasedoti agolokin ŋes apaarasia akanykaarei:

²⁷ Irerei esasedoti ŋes apaaran nakikanyetekaarei: arai kisiarakin amuny, kosodi esasedoti alimokin ŋes ebe mam elai: erai adek naka atapon.

²⁸Arai kesal aisorit aiboisike, komam isiarakina amuny, konye enyasuorit; erai abuunit naka anomoret, elimokini esasedoti ŋes ebe elai: naarai erai apoore naka anomoret.

²⁹“Kedekakin ekiliokit arai aberu akou arai epenek.

³⁰ Irerei esasedoti adek: ido koany, arai elomarit aputoke toma amuny, kojaas tomake ijul ludos luideridera kosodi esasedoti alimokin ŋes ebe mam elai: erai etapitap, erai atapon naka akou arai naka epenek.

³¹Arai kirere esasedoti adek naka etapitap, ido koany, aputoke mam elomarit toma amuny, emamei ijulot yenikirionon kotoma, kosodi esasedoti agolokin ŋin yenedeka etapitap apaarasia akanykaarei.

³²Apaaran nakikanyetekaarei irerei esasedoti adek: ido koany, arai mam etapitap isiarakina, emameete ijuludos, aputoke da mam elomarit toma amuny.

³³ “Ŋes konyet ibarenio, konye mam ibareni etapitap; egolokini esasedoti ŋin yenedeka etapitap apaarasia ace akanykaarei.

³⁴Kapaaran nakikanyetekaarei irerei esasedoti etapitap; ido koany, arai mam etapitap isiarakina amuny, aputoke da mam elomarit toma amuny; kosodi esasedoti alimokin ŋes ebe elai: ilosi inapeneke, eraun yenelai.

³⁵Konye arai kisiarakin etapitap amunyoke kodaunite aitesegaarioke;

³⁶Kosodi esasedoti airere ŋes: ido koany, arai kisiarakin etapitap amuny, mam esasedoti emoi ijuludos; erai yenimam elai.

³⁷ Konye arai eanyuni ebe asal etapitap, kelomut ijul lukiriokok kotoma; aŋaleu etapitap, elai ŋesi: elimokini esasedoti ŋes ebe elai.

³⁸“Arai ejaas aisorito toma amuny naka akuan naka ekiliokit arai aberu, aisorito nukakwaŋak:

³⁹Kosodi esasedoti airere; ido koany, arai ekwaŋakwaŋato aisorito nukotoma amuny naka akuanake; erai egwenyigweny, elomunit kamuny; elai ŋesi.

⁴⁰ “Arai kidimas ituŋanan itima luka akouke, erai lokepata; konye elai ŋesi.

⁴¹Arai kidimas ituŋanan itima koiŋaren naka akouke, erai lokepata koreet; konye elai ŋesi.

⁴²Konye arai ejai adek naekwaŋakwaŋat naereŋereŋet kakou nakepata, arai koreet kalokepata; erai ŋin atapon, naelomunit kakouke nakepata, arai koreet kalokepata.

⁴³ Kosodi esasedoti airere ŋes: ido koany, arai ekwaŋakwaŋat ereŋereŋet abuunet naka adek kakouke nakepata, arai koreeteke kalokepata, kwape ejaar aput naka atapon amuny;

⁴⁴Erai ituŋanan yenikatapon, erai yenimam elai: abeit elimokini esasedoti ŋes ebe mam elai; ejai adekake akouke.

⁴⁵ “Ituŋanan yenedek atapon, ecilicila ikenapen, elakara itimake da, erapari eponoi lokokuju, iworoi ebe, ‘Mam alai, mam alai.’

⁴⁶ Apaarasia kere nuerokor edeka eraun yenimam elai; mam ŋes elai: iboienenei bon; iboienenei kokiŋa kiidukurun.

⁴⁷ “Anapito naejai adek naka atapon, arai anapito naka ajul, arai anapito naka ebaputa;

⁴⁸Arai ewojitoi arai icipitai; naka ebaputa, arai naka ajul; arai komukule, arai toma ŋinibore yeniswamatai kemukule;

⁴⁹Arai erai adek napiria arai naereŋereŋet kanapito, arai komukule, arai neewojitoi, arai neicipitai, arai toma ŋinibore yeniswamatai kemukule; erai adek naka atapon, ibusakinit aitodikin esasedoti.

⁵⁰ Irerei esasedoti adek, egolokini yenejai adek apaarasia akanykaarei:

⁵¹ Irerei ŋesi adek apaaran nakikanyetekaarei: arai kisiarakin adek anapito, arai neewojitoi, arai neicipitai, arai komukule, aswam kere naetwasamaere emukule, erai adek naka atapon naiŋemiŋemi; mam elai.

⁵²Icweikini ŋesi anapito, arai ewojitoi, arai icipitai, ajul, arai ebaputa, arai ibore kere yenika emukule, naejai adek: naarai erai atapon naiŋemiŋemi; icweikinio kakim.

⁵³“Arai kirere esasedoti, ido koany, mam adek isiarakina anapito, karaida neewojitoi, karaida neicipitai, karaida toma ibore kere yenika emukule;

⁵⁴Kosodi esasedoti aicorakin ebe ilosete ibore yenejai adek, egolokini bobo apaarasia ace akanykaarei:

⁵⁵Irerei esasedoti, kodaunite adek ailosio: ido koany, arai mam adek ilocokino kaputoke, komam adek isiarakina, mam ŋes elai: icweikini kakim: eŋemiŋemi, arai epata toma arai kiŋa.

⁵⁶“Arai kirere esasedoti, ido koany, enyasuoro adek kodaunite ailosio, kosodi acilar kanapito, arai komukule, arai neewojitoi, arai neicipitai:

⁵⁷Arai eriŋa etakani kanapito, arai neewojitoi, arai neicipitai, arai kobore kere yenika emukule, elomunit: icweikini ibore ŋin yenejai adek kakim.

⁵⁸Anapito da, arai naewojitoi, arai naicipitai, arai ibore kere yenika emukule, yenilosi, arai anyou adek kamake, ŋes konyet ilosere nakiareit, koraun yenelai.”

⁵⁹Ŋol ŋes ekisil loka adek naka atapon kanapito naka ajul arai naka ebaputa, arai naewojitoi arai naicipitai, arai ibore kere yenika emukule, alimokin ebe elai, arai alimokin ebe mam elai.