Read Ateso Ilebin 15 Bible Online

Ilebin 15 - Ateso bible

Ilebin 15

¹Kotema EJAKAIT Musa ka Aaron atiar,

² “Kolimokis idwe luka Isirael ebe, Arai eleleete etuŋanan abulon arai aokot, kanu elelea mam ŋes elai.

³Eraun namam ailake ka aleleke kwanata: arai etakani aleleke, arai da aleleke mam etakani erai namam ailake.

⁴Ŋiniperis naeperio ŋol loelelei eraun namam elai: ŋinibore kere yeniboikini ŋesi eraun yenimam elai.

⁵ Ŋin yenetirori aperisike ilosi inapeneke, iloŋi kakip, eraun yenimam elai kiton eboŋ,

⁶ŋin da yeniboikini ibore kere yenikiboio loelelei ilosi ikenapen, iloŋi kakip, eraun yenimam elai kiton eboŋ.

⁷Ŋin da yenetirori akuan naka ŋol kaloelelei ilosi ikenapen, iloŋi kakip, eraun yenimam elai kiton eboŋ.

⁸ Arai kimuiki ŋol loelelei aimul ituŋanan yenelai; kosodi loimuikinitai ailot ikenapen, iloŋi kakip, eraun yenimam elai kiton eboŋ,

⁹ŋinibore kere yenibwaneni ŋol loelelei eraun yenimam elai.

¹⁰Ŋin yenetirori ibore yenajai kwapuke eraun yenimam elai kiton eboŋ: ŋin yenedakuni iboro ŋul ilosi inapeneke, iloŋi kakip, eraun yenimam elai kiton eboŋ.

¹¹ Arai ketiro ŋol loelelei icetuŋanan kere, komam ber iloluarit akekanin kakip, ilosi yeniketiroritai inapeneke, iloŋi kakip, eraun yenimam elai kiton eboŋ.

¹² Amot da naka elupe naetirori ŋol loelelei, ebwanio; iloluario ŋinibore yenika akito kakip.

¹³ “Arai keŋaleu alele naka ŋol kaloelelei, imarakinio apaarasia akanykaarei kanuka aitesegaarioke, ilosi ikenapen; Iloŋi akekuan kakip nueleleete, eraun loelai.

¹⁴ Apaaran nakikanyetekauni eyaŋaari ŋesi ajeleik aarei arai ilukei iarei ludidik, ebuni kakonyen nuka EJAKAIT okek loka ewema loka airiamunun, koinak kes esasedoti.

¹⁵ Ijaikini esasedoti kes, idiopet araun ainakinet naka adiakaret, yenice araun ainakinet naicweio; ituluci esasedoti ŋes kakonyen nuka EJAKAIT kanuka aleleke.

¹⁶ “Arai kelomutu ikinyom luka aur kotuŋanan, iloŋi akekuan kere kakip eraun lomam elai kiton eboŋ.

¹⁷Ilosio inapen kere kakip, ka amuny kere naadoikis ikinyom luka aur, eraunos lumam elaete kiton eboŋ.

¹⁸ Aberu da naeperete ketuŋanan loajaas ikinyom luka aur, iloŋete kes kere kakip eraunos lumam elaete kiton eboŋ.

¹⁹ “Arai elelei aberu, eleleete aokot, epaikini ŋesi etiakuna apaarasia akanykaarei; ŋin yenetirori ŋes eraun yenimam elai kiton eboŋ,

²⁰ŋinibore kere yeneperio ŋesi katiakunioke eraun yenimam elai: ŋinibore kere da yeniboikini ŋesi eraun yenimam elai.

²¹Ŋin yenetirori aperisike ilosi ikenapen, iloŋi kakip, eraun yenimam elai kiton eboŋ.

²² Ŋin yenetirori ibore kere yeniboikini ŋin, ilosi ikenapen, iloŋi kakip, eraun yenimam elai kiton eboŋ.

²³Arai ejaas aperis, arai toma ŋinibore yeniboikini ŋin naketiro, eraun yenimam elai kiton eboŋ.

²⁴ Arai keperoto etuŋanan kaŋin, kolomakin ŋes aleleke, eraun lomam elai apaarasia akanykaarei; ŋiniperis naeperio ŋesi eraun namam elai.

²⁵ “Arai eleleete aberu aokot apaarasia nuipu korai mere apak naka aibamake, arai eleleete adepar apaarasiake nuka aibam; apaarasia kere nuelelea numam ailake eraun ŋin kwape kapaarasia nuka aibamake: mam ŋes elai.

²⁶Ŋiniperis naeperio ŋesi apaarasia kere nuelelea eraun kwape aperis naka aibamake; ŋinibore kere yeniboikini ŋesi eraun yenimam elai, kwape namam aila naka aibamake.

²⁷Ŋin yenetirori iboro ŋul eraun yenimam elai, ilosi kenapen, iloŋi kakip, eraun yenimam elai kiton eboŋ.

²⁸Konye arai keŋaleu aleleke, kosodi aimarakinio apaarasia akanykaarei, kokau kaŋun eraun naelai.

²⁹Kapaaran nakikanyetekauni eyaŋaari ajeleik aarei arai ilukei iarei ludidik, eyaŋaari mama ejai esasedoti, okek loka ewema loka airiamunun.

³⁰ Ijaikini esasedoti idiopet araun ainakinet naka adiakaret, ka yenice araun ainakinet naicweio: ituluci esasedoti ŋes kakonyen nuka EJAKAIT kanuka aleleke namam alaia.

³¹ “Itiakunete kwaŋin idwe luka Isirael ka numam ailakec; kinyeis atwakare kanumam ailakec, nakemunauniata ewemaka lokalaunan loejai kamakec.”

³²Ŋol ŋes ekisil loka ŋol kaloelelei, ka ŋol loalomut ikinyom luka aur tetere mam elai;

³³Ka ŋin naedek aibam, ka ŋin yenelelei, ekiliokit arai aberu, ka ŋol loeperete kaŋin namam elai.