Read Ateso Ilebin 16 Bible Online

Ilebin 16 - Ateso bible

Ilebin 16

¹ Kotema EJAKAIT Musa, kedaut odwe luarei luka Aaron atwakare, nakikunyakiniata kesi akonyen nuka EJAKAIT, kotwakata;

² Kotema EJAKAIT Musa atiar, “Kolimok Aaron onacekon ebe, mam elomanari apakio kere aibois nakalaunan nakotoma aigalisit, kakonyen nuka eicoloŋ-lokaitim loejai asaduku; kinyek atwanare: naarai etakanikin eoŋ kodou koicoloŋlokaitim.

³ Eyaŋauni Aaron iboro lu, alomunia aibois nakalaunan: emoŋ lotobait araun ainakinet naka adiakaret, ka emerekek araun ainakinet naicweio.

⁴ Enapenenei ekooti lokalaunan loka ebaputa, enapenenei epale loka ebaputa kakuanake, koenite aenet naka ebaputa, enapenenei da egoe lokieniena akou: eraas inapen lukalaunak; iloŋi akekuan kakip, konapi kes.

⁵ Eyaŋaari ikorwa iarei kokodet loka idwe luka Isirael araun ainakinet naka adiakaret, ka emerekek araun ainakinet naicweio.

⁶ “Ijaikini Aaron emoŋ lotobait loka ainakinet naka adiakaret, loerai kanuke, elucokin elopet ka eketogo.

⁷Eyaŋaari ikorwa luarei, ibwaikini kes akonyen nuka EJAKAIT okek loka ewema loka airiamunun.

⁸Ilamilami Aaron eroet kokorwa luarei; eroet ediopet loka EJAKAIT, ka eroet ece loka Asasel.[7]

⁹ Itodiari Aaron ekoroi loabeiki eroet loka EJAKAIT, kijaik ŋes araun ainakinet naka adiakaret.

¹⁰ Konye ekoroi loabeiki eroet loka Asasel ibwaikini ejari akonyen nuka EJAKAIT, aitulucio ŋes, aireŋearia ŋes kanuka Asasel, modiŋ.

¹¹“Itodiari Aaron emoŋ lotobait loka ainakinet naka adiakaret, loerai kanuke, elucokini bon, ka ekaleke, eari emoŋ lotobait loka ainakinet naka adiakaret loerai kanuke.

¹² Eyaŋaari aisupurunet ileleba atotole nuka akim kotem kakonyen nuka EJAKAIT, ileleba akaninike lukisupurununo luipicipicitai, koyaŋau toma aigalisit.

¹³ Ibwaikini lukisupurununo akim kakonyen nuka EJAKAIT, tetere erapiari apuru naka lukisupurununo eicoloŋ-lokaitim loejai aitejenunet, kinyek atwanare.

¹⁴ Eyaŋaari aokot nuka emoŋ lotobait, ebwatanakini oicoloŋ-lokaitim kebokoritike ari nakokide; ebwatanari aokot kiŋaren keicoloŋ-lokaitim kebokoritike irwan akanykaarei.

¹⁵ “Kosodi eari ekoroi loka ainakinet naka adiakaret, loerai kanuka ituŋa, eyaŋaari aokotoke toma aigalisit, iswamakini aokotoke kwape eswamakinia aokot nuka emoŋ lotobait, ebwatanakini oicoloŋ-lokaitim, kiŋaren da ke icoloŋ-lokaitim.

¹⁶ Eluci ŋesi aibois nakalaunan, kanuka numam aila nuka idwe luka Isirael, kanuka aibucaretakec, kes adiakanaretakec kere: ikonakini kwaŋin ewema loka airiamunun, loiboie kakes kokidiŋ kanumam ailakec.

¹⁷ Mam ejaun ediotuŋanan owema loka airiamunun naelomaria ŋesi ailuc aibois nakalaunan, aitodol naelomunia, kodaunite alucokin bon, ka ekaleke, ka atukot kere naka Isirael.

¹⁸ Elomari neejai etem loejai akonyen nuka EJAKAIT, eluci ŋes; eyaŋaari aokot nuka emoŋ lotobait, ka aokot nuka ekoroi, ejukonokini amumwara nuka etem owaitin kere.

¹⁹ Ebwatanakini ŋesi aokot kebokoritike irwan akanykaarei, kitesega, kitalau ŋes kanumam aila nuka idwe luka Isirael.

²⁰ “Kedau ŋesi ailuc aibois nakalaunan, ka ewema loka airiamunun, ka etem, itodiari do ekoroi loejari:

²¹ Idokokini Aaron akaninike kere akou naka ekoroi loejari, kolimo kokujuke numam adolit kere nuka idwe luka Isirael, ka aibucaretakec kere, kes adiakanaretakec kere; ibwaikini kes akou naka ekoroi, ireŋeari ŋes modiŋ kakan naka etuŋanan loitemokino.

²² Ibwoki ekoroi numam adolitekec kere akwap naemamei ituŋanan: eosikini ŋesi ekoroi kamodiŋ.

²³ “Elomari Aaron owema loka airiamunun, elacari inapen luka ebaputa, luanapit naelomaria aibois nakalaunan, inyeini kes kanen:

²⁴Iloŋi akekuan kakip kaibois nakalaunan, enapi ikenapen, elomuni, einakini ainakineteke naicweio, ka ainakinet naicweio naka ituŋa, elucokini elopet, ka ituŋa.

²⁵ Icweikini asiepai naka ainakinet naka adiakaret kotem.

²⁶ Ŋol da loeosikini ekoroi loka Asasel ilosi ikenapen, iloŋi akekuan kakip; kokau elomuni oidukurun.

²⁷ Edakario emoŋ lotobait loka ainakinet naka adiakaret, ka ekoroi loka ainakinet naka adiakaret, luayaŋaunio aokotokec alucio aibois nakalaunan, kokiŋa kiidukurun; icweikinete ikecemukulen, ka akiriŋikec, ka ikijitikec kakim.

²⁸Ŋol loicweikini kes, ilosi ikenapen, iloŋi akekuan kakip, kokau elomuni oidukurun.

²⁹ “Eraun ekisil kamakus ikar kere: kolap lokikanyetekaarei, kapaaran nakitomonet naka elap, kitakadikis ikusitauon, mam iswamaete adioswam kere, iuriat, ka imoit da yeniboienenei kayes.

³⁰ Naarai kapaaran kaŋin kitulucio yes, aiteseg yes; iraunos luilaete kadiakanaretakus kere kakonyen nuka EJAKAIT.

³¹ Ŋes nakasabato naka aibworar nakayamakina mama ijaas, kitakadikis ikusitauon; erai ekisil ikar kere.

³² Esasedoti da, loinyonyoikinitai, loetiakunitai araun esasedoti aibois naka papake, eluci ŋesi, enapenenei inapen luka ebaputa, kes inapen lukalaunak.

³³Eluci ŋesi aibois nakalaunan, eluci da ewema loka airiamunun ka etem; ituluci ŋesi isasedotin ka ituŋa kere luka atukot.

³⁴ Eraun ŋol ekisil lomam enaŋi mama ijaas, alucio idwe luka Isirael kanuka adiakanaretakec kere atipet ŋolikaru.” Kiswama kwape ecorakinia EJAKAIT Musa.