Read Ateso Ilebin 18 Bible Online

Ilebin 18 - Ateso bible

Ilebin 18

¹Kotema EJAKAIT Musa atiar,

² “Kolimok idwe luka Isirael ebe, Arai eoŋ EJAKAIT Ekusideke.

³ Siriswamaenenete aswamisio nuka akwap nako Misiri nekolo iboioto: siriswamaenenete da aswamisio nuka akwap naka Kanaan neketolomari yes: karaida alosenen kokisilakec.

⁴Kiswamaenenete yesi itubesiaka, koricenenete ikisilaka, alosenen kotoma: arai eoŋ EJAKAIT Ekusideke.

⁵ Koricenenete do ikakisila, ka itubesiaka: arai kiswama ituŋanan ŋul, ejari tomakec: arai eoŋ EJAKAIT.

⁶“Siri idio kayesi kikunyaki yenepajanasi kaŋes, apukor amujalalake: arai eoŋ EJAKAIT.

⁷Sirikipuko amujalal naka papakon, ŋes amujalal naka totokon: erai ŋesi totokon; sirikipuko amujalalake.

⁸ Sirikipuko amujalal naka aberu naka papakon: erai amujalal naka papakon.

⁹ Sirikipuko amujalal naka inacikon, akoku naka papakon, arai akoku naka totokon, arai keurikinio ore, arai keurikinio nenice.

¹⁰Sirikipuko amujalal naka akoku naka okokukon, arai naka akoku naka akokukon: naarai amujalalakec ŋes nakon.

¹¹Amujalal naka akoku naka aberu naka papakon, naaurie papakon, erai ŋin inacikon, sirikipuko amujalalake.

¹² Sirikipuko amujalal naka inac naka papakon: inacanas ŋesi kapapakon.

¹³Sirikipuko amujalal naka inac naka totokon: naarai inacanas ŋesi katotokon.

¹⁴Sirikipuko amujalal naka onace loka papakon, sirikikunyak aberuke: erai ŋesi totokon.

¹⁵ Sirikipuko amujalal naka aberu naka okokukon: erai ŋesi akokukon; sirikipuko amujalalake.

¹⁶ Sirikipuko amujalal naka aberu naka onacekon: erai amujalal naka onacekon.

¹⁷ Sirikipuko amujalal naka aberu ka naka akokuke; sirikiyaŋa akoku naka okokuke, karaida akoku naka akokuke, apukor amujalalake; ipajanasi kesi: erai aronis.

¹⁸ Sirikiyaŋa aberu ka inacike, araun akainike, apukor amujalalake, nepepe kainacike eriŋa ejari.

¹⁹ “Sirikikunyak aberu apukor amujalalake kapak namam elaia kanuka aibam.

²⁰ Sirikiyelokinos kaberu naka eidunyetekon, amunaun kaŋes.

²¹ Sirikiinak aurikon aitotor akim mama ejai Molek, karaida aitisil ekiror loka Ekonideke: arai eoŋ EJAKAIT.

²² Sirikiperoto kikiliok, kwape kaŋor: erai naketal.

²³ Sirikiperoto kitiaŋ kere amunaun kaŋes: karaida aberu aibwo kakonyen nuka etiaŋ, apero kaŋes: erai ainyalakin.

²⁴ “Sirikimunaunos bonik kadiokirot kaŋun kere: naarai amunaunos atekerin nuereŋeari eoŋ kakonyenekus kaŋun kere:

²⁵ Amunaun akwap: tape edopet ŋes numam adoliteke, elekari akwap da luiboienenete kotoma.

²⁶Kanuka ŋun koricenenete yesi ikakisila ka itubesiaka, siriswamaenenete adio kanuketal kaŋun; karaida iuriat, karaida imoit yeniboienenei kayes:

²⁷(Naarai eswamata ituŋa luka akwap, lukigeikinete yes nuketal ŋun kere, amunaun akwap;)

²⁸Kinyek akwap alekar yes da, naimunauniata yesi ŋes, kwape alekaria ateker nakigeikini yes.

²⁹Naarai ŋin yeniswamai adio kanuketal kaŋun, egelario ituŋa luiswamaete ŋun kotuŋakec.

³⁰Kanuka ŋun koricito akirotoka, kinyeis aiswamaun idio kiponesio kaŋul kaluketal, lueswamaenenoo ageikin yes, kinyeis amunaun bonik: arai eoŋ EJAKAIT Ekusideke.”