Read Ateso Ilebin 22 Bible Online

Ilebin 22 - Ateso bible

Ilebin 22

¹Kotema EJAKAIT Musa atiar,

² “Kolimok Aaron ka odweke ebe. Kotiakunos koboro lukalaunak luka idwe luka Isirael, luetalaunete kamakaŋ, kinyeis aitisil ekakiror lokalaunan: arai eoŋ EJAKAIT.

³ Kolimok kes ebe, Ŋolituŋanan loka aurikon kere anatar aturiokus, loikunyakini oboro lukalaunak, luitalaunete idwe luka Isirael mama ejai EJAKAIT, lomam elai, egelario etuŋanan ŋol kakonyeneka: arai eoŋ EJAKAIT.

⁴ Ŋolituŋanan kere loka aur naka Aaron lokatapon, arai loelelei; mam ŋes enyami iboro lukalaunak, aitodol naelaunia. Ŋol da loetirori ibore yenimam elai kanuka lukatwak, arai etuŋanan loeleleete ikinyomoke luka aur;

⁵ Arai ŋol loetirori ibore yeneliat, yenituluori ŋes lomam elai, arai ituŋanan yenepedori aituluor ŋes lomam elai, namam aila naka epone kere;

⁶ Etuŋanan loetirori idio kaŋul eraun lomam elai kiton eboŋ, mam enyami iboro lukalaunak, dimarai kiloŋ akekuan kakip.

⁷ Naelomaria akoloŋ, eraun loelai; kokau enyami iboro lukalaunak, naarai erai atapake.

⁸ Ŋin yenetwani bon, arai yenepoopoete itiaŋ, mam enyami ŋul amunaun bon: arai eoŋ EJAKAIT.

⁹ Aso do koricito kesi akakirot, kinyeis aibwok aronis, kotwaka kaŋin, arai emunaunete ŋin: arai eoŋ EJAKAIT loetalauni kes.

¹⁰ “Siri emoit kenyam ibore yenikalaunan: mam epejonon loka esasedoti, arai ekewoteon, enyami ibore yenikalaunan.

¹¹Konye arai kegwel esasedoti etuŋanan, loegweli kapesanake, ŋol enyami; ka ŋul da luaurikinio togoke, enyamete atapake.

¹²Arai kedukoki akoku naka esasedoti emoit, mam ŋin enyami ainakinet naijaŋio koboro lukalaunak.

¹³ Konye arai akoku naka esasedoti erai apuserut, arai naireŋe tai, komamei ikoku, arai keboŋu togo loka papake, kwape keiditeuke, enyami ŋin atap naka papake: konye mam emoit enyami.

¹⁴ Arai kenyam etuŋanan ibore yenikalaunan komam ejei, iyatakini idiopet kokany mama ejai, kosodi ainakin esasedoti ibore yenikalaunan.

¹⁵ Mam kes itisilete iboro lukalaunak luka idwe luka Isirael, lueinakinete EJAKAIT;

¹⁶Aisibwok numam adolit nueyaunete aronis, naenyamiata iborokec lukalaunak: naarai arai eoŋ EJAKAIT loetalauni kes.”

¹⁷Kotema EJAKAIT Musa atiar,

¹⁸ “Kolimok Aaron, ka odweke, ka idwe kere luka Isirael ebe, ŋinituŋanan kere yenika ekek loka Isirael, arai yenika imo koIsirael, yeneinakini ainakineteke, arai naka aiyaposiokec, arai naka ainakinetakec nuka akot, nueinakinete EJAKAIT araun ainakinet naicweio;

¹⁹Iinakinete yenikiliokit yenimam eŋwalit, yenika imoŋin, yenika imerekekin, arai yenika akinei, tetere kicamunio yes.

²⁰ Konye ŋin kere yeneŋwalit, mam iinakinete ŋin: naarai mam ecamunio kanukus.

²¹ Ŋinituŋanan kere yeneinakini asubanit naka ainakineta nuka ainapakin mama ejai EJAKAIT aitodolio aiyaposit, arai araun ainakinet naka akot, yenikosipan loka aituk arai loka amerekekin, ibus araun yenedoliorit cut acamunio: siri ŋes eŋwalit.

²²Yenemudukana, arai yenebilil, arai yenicodo, arai yenejai ajim, arai egwenyigweny, arai yenika asalab, siriinakinete ŋul mama ejai EJAKAIT, karaida ainakin kes kotem aicweio mama ejai EJAKAIT.

²³ Ipedori ainakin emoŋ lotobait arai imerekek yenejai ibore yeniyatakina, arai yenimam edolit atutubetake, araun ainakinet naka akot; konye mam ecamunio aitodolio aiyaposit.

²⁴Ŋin yeneiikinito, arai yeniriecakinitai arai yenebulul, arai yenetuboro itouke, siriinakinete ŋin mama ejai EJAKAIT: siriswamaenenete kwaŋin kakwapukus.

²⁵ Siriinakinete atap naka Ekusideke kotoma kaŋul kere karaida kakan naka emoit; naarai abosusukec ejai kotomakec, eŋwalito: mam ecamunio kanukus.”

²⁶Kotema EJAKAIT Musa atiar,

²⁷ “Keurii imoŋ, arai imerekek, arai ikalol, esalakini enaki totoke adaun apaarasia akanykaarei; ageun kapaaran nakikanyetekauni ka adepar ecamunio araun ainakinet naeinakinere kakim mama ejai EJAKAIT.

²⁸ Arai erai aiteŋ arai amerekek sirikiarata ŋes ka ikekoku kere kadiopetepaaran.

²⁹ Naiinanakiniata asubanit naka aimal mama ejai EJAKAIT, iinakinete ŋes tetere kicamunio.

³⁰Enyamio kapaaran kaŋin; sirikiteperoosi kiton tupuruc: arai eoŋ EJAKAIT.

³¹ “Kanuka ŋun koricito aicorakinetaka, kiswamaenenete: arai eoŋ EJAKAIT.

³² Sirikitisiloto ekakiror; konye ketalaunio eoŋ kodwe luka Isirael: arai eoŋ EJAKAIT loketalauni yes.

³³ Loketolomuni yes kakwap nako Misiri, araun Ekusideke: arai eoŋ EJAKAIT.”