Read Ateso Ilebin 24 Bible Online

Ilebin 24 - Ateso bible

Ilebin 24

¹Kotema EJAKAIT Musa atiar,

² “Kicorak idwe luka Isirael koinut ijo akinyet naka iseitunin naerukuk naijililitai kanuka atala, ainokia atala tiritir.

³Kiŋa kaigalisit naka aitejenunet, kowema loka airiamunun, itemonokini Aaron tiritir kakonyen nuka EJAKAIT, agear eboŋ kiton tupuruc: eraun ekisilomam edaun anatar aturiokus.

⁴ Itemonokini ŋesi tiritir atalai nukopir loelai loka atala kakonyen nuka EJAKAIT.

⁵ “Ilemuni ijo akiria nuidicic, ipei imugatin itomon ka luarei: itemi iarei kotomon luka epa [12] komugati ediopet.

⁶ Inapanakini kes okokoron iarei, kaŋolikokoro ikanykape, omesa loelai kakonyen nuka EJAKAIT.

⁷Ibwaikini lukesai luelaete kaŋolikokoro, tetere eraun akiitunet naka imugatin, ainakinet naeinakinere kakim mama ejai EJAKAIT.

⁸ Inapanakini imugatin ŋinipaaran nakasabato kakonyen nuka EJAKAIT tiritir: erai aitutuket namam edaun kanuka idwe luka Isirael.

⁹ Eraunos luka Aaron ka odweke; enyamanakinete aibois nakalaunan: naarai eraas lukalaunak noi mamake luka ainakineta nuka EJAKAIT nueinakinere kakim kokisil lomam enaŋi.”

¹⁰Koloma okoku loka aberu naka Isirael loarai papake Emisiriat anyoun kodwe luka Isirael: kopegasi okoku loka aberu naka Isirael ketuŋanan loka Isirael koidukurun;

¹¹ Komoromor okoku loka aberu naka Isirael Ekiror, kiken: koyaŋaarai mama ejai Musa. Ekiror loka totoke Selomit, akoku naka Dibiri, loka ateker naka Dan.

¹² Kibwaikis ŋes aidaris, tetere elimorio kes kaituk naka EJAKAIT.

¹³Kotema EJAKAIT Musa atiar,

¹⁴ “Kitolomasi lokekenon kiŋa kiidukurun; kidokokis kere luapuput ŋes akaninikec akouke, kibiribir ŋes ekodet kere.

¹⁵ Kolimok idwe luka Isirael ebe, ŋinituŋanan yenikeni Edekeke ibwoki adiakareteke.

¹⁶ Ŋin yenemoromoroi ekiror loka EJAKAIT, abeit eario; abeit ibiribirei ekodet kere; imoit ka iuriat, arai emoromoroi ekiror loka EJAKAIT, eario.

¹⁷ Ŋin yeneseni ituŋanan kotwani, abeit eario;

¹⁸ŋin yeneseni itiaŋ kotwani, egeli: aijar itia aijar.

¹⁹ Arai itwaŋali ituŋanan ikeidunyet; kwape ekonakinia, ikonakinio ŋes da kwaŋin;

²⁰ Abulucaret itia abulucaret, akoŋu itia akoŋu, ekelai itia ekelai: kwape itwaŋalia ituŋanan, ikonakinio ŋes da kwaŋin,

²¹ ŋin yeneari etiaŋ egeli: ŋin yeneari ituŋanan eario.

²² Ijaas kekisil ediopet, kanuka imoit ka iuriat; naarai arai eoŋ EJAKAIT Ekusideke.”

²³ Kolimok Musa idwe luka Isirael, kitolomasi ŋol lokekenon kiŋa kiidukurun, kibiribiroto ŋes kamor. Kiswamata idwe luka Isirael kwape kicorakinia EJAKAIT Musa.