Read Ateso Ilebin 26 Bible Online

Ilebin 26 - Ateso bible

Ilebin 26

¹ “Sirikiswamaut aputosia, karaida asipokin aput naegerer, arai epir, karaida asipokin amoru naegerer akwapukus, akukonokin ŋes; naarai arai eoŋ EJAKAIT Ekusideke.

²Koricito asabatonoka, koyoŋito aiboisika nakalaunan: arai eoŋ EJAKAIT.

³ “Arai ilosenenete kokisilaka, koricito akaicorakineta kiswamata kes:

⁴ Kasodi ainakin yes akiru kapakioke, erai akwap amioke, eraete ikito luka emanikor araitokec.

⁵ Edoli aicomokus toma aisakakus, edoli aisakakus roma apak naka aiye: inyamete atapakus kimonikinos, iboikinos akwapukus inapakina.

⁶ Ainakini eoŋ ainapakin kakwap, iperete, emamei yenitukuriani yes: etanaŋi eoŋ itiaŋ lueroko kakwap, komam ekileŋ itori akwapukus.

⁷Irukitotor lukasurupokus, eŋianakinete ekileŋ kakonyenekus.

⁸Erukitotor ikany kayesi akwatat, erukitotor akwatat kayesi ilukumin itomon: eŋianakinete lukasurupokus ekileŋ kakonyenekus.

⁹ Etei eoŋ yes, etuuriari yes, etupui yes; etogogoŋi akaitutuket kayes.

¹⁰Inyamete luŋorok lueŋadakinitai sek, itolomunete luŋorok kanuka lukitetiak.

¹¹ Ebwaikini ewemaka lokalaunan kamakus: mam ekatau kisaci yes.

¹² Aupenena eoŋ kayes, araun Ekusideke, yes da ikatuŋa.

¹³ Arai eoŋ EJAKAIT Ekusideke, loabu ketolom yes kakwap nako Misiri, kinyeis araut ibulesinikec; abu kabil akito nuka ajookotokus, ketolot yes kitenara.

¹⁴ “Konye arai iŋerete apupun eoŋ, iŋerete da aswam aicorakineta nu kere; Arai igirete ikakisila, arai da esacito ikusitauon ikatubesia, tetere iŋerete aswam aicorakinetaka kere, konye ibilete aitutuketeka;

¹⁵ Eoŋ da keswamakini yes nu; ejukakini yes akurian, eluera ka ekamidi, luedopodopoete

¹⁶ akusikonye, lueinakinete ikusitauon aipirisiar: iyeete ikinyomokus atai, naarai enyamete lukasurupokus.

¹⁷ Aluikin eoŋ yes, kidanyio kakonyen nuka lukasurupokus: lukilaito kiyaete yes; ikerete komam yenikirukitor yes.

¹⁸ “Arai eriŋa iŋerito apupun eoŋ kanuka ŋun, kasodi aiyatakin alecor yes irwan akanykaarei kanuka adiakaretakus.

¹⁹ Abili eoŋ apedorikus naiturototor; etuluori akujukus kwape asuat, akwapukus da kwape aisinit:

²⁰ Edacari akusigogoŋ atai: naarai mam akwapukus erai amioke, karaida ikito luka akwap mam eraete araitokec.

²¹“Arai ilosenenete yesi iŋuŋas keoŋ, iŋerete apupun eoŋ; eyatakini eoŋ ainun yes aiticaneta irwan akanykaarei kwape ejaatar adiakaretakus.

²² Ejukakini yes etiaŋ loka ais, loidadaanari ikusidwe, emudiari ibarenekus, itidisiari etiaikus; esilokoros irotinikus.

²³ “Arai iŋerete aboŋun kanuka ŋun kere, konye ilosenenete iŋuŋas keoŋ;

²⁴ Eoŋ da alosi aŋuŋa kayes; adanyi eoŋ yes, eoŋ elopet, irwan akanykaarei kanuka adiakaretakus.

²⁵ Kainuni yes ekileŋ, loinyaŋi aitutuket; itukonokinos oreriakus: kejukakini yes atular; kijaikinio yes akan naka lokasurup.

²⁶ Arai kabil ebelakus loka emugati, epeete aiŋor atomon imugatinikus kokiala ediopet, ijaikinete kesi imugatinikus kaitemis: inyamete komam imonikinos.

²⁷“Arai iŋerete apupun eoŋ kanuka ŋun kere, konye ilosenenete iŋuŋas keoŋ;

²⁸ Eoŋ da alosi aŋuŋa kayes kesiopite; alecori yes irwan akanykaarei kanuka adiakaretakus.

²⁹ Inyamete akiriŋ naka odwekus, inyamete da akiriŋ naka adwekus.

³⁰ Amudiari aiboisiokus nuiceleleete, ajepejepei ipirinokus luka akoloŋ, acakakini atesinakus atesina nuka aputosiakus; esaci ekatau yes.

³¹ Etuluori ireriakus luiswapito, etisiliori aiboisiokus nukalaunak, aŋeri aiŋuun asakat naka luejijimikus.

³² Etisiliori akwap; eumokinete lukasurupokus luiboiete kotoma.

³³ Kesiarakini yes da atekerin, autuni ekileŋ atupakin yes: esilior akwapukus, iswapete ireriakus.

³⁴ “Kosodi akwap alelakin asabatonoke, apak kere naiswapitor, ka yesi da ijaunos kakwap naka lukasurupokus; ibworari do akwap, elelakini asabatonoke.

³⁵Ibworari apak kere naiswapitor; aibworar namam abu kodumunite kasabatonokus, iroko ijaas yesi kotoma,

³⁶ ŋul da luedeunos kayesi, ainakini itauonokec aiilor kakwap naka lukasurupokec: erukitori kes airurum naka akiot naekusi ekwam; ekerete kesi, kwape ekeria etuŋanan ekileŋ; ibiroros komam yenerukitor.

³⁷ Icakacakas bonik, kwape ekeriata ekileŋ, komam yenerukitor: emamuunete yes agogoŋ abwoikin lukasurupokus.

³⁸Ioliorete kotoma atekerin, kinyami yes akwap naka lukasurupokus.

³⁹ “Luedeunos kayesi idokororaros kanumam adolitekec kakwapin nuka lukasurupokus; idokororaros da bala lukapapaakec kanumam adolitekec.

⁴⁰ “Elimorete numam adolitekec; ka numam adolit nuka lukapapaakec, ka aibucaretakec nuapotu kibucasi kamakaŋ, bobo da naarai alototo aŋuŋa keoŋ.

⁴¹ Eoŋ da alot aŋuŋa kakes, abu ketoloma kes akwap naka lukasurupoke: arai kitasonokinos ikecetauon lumam ekepep, iyuunete aiticanet naka numam adolitekec.

⁴² Kasodi eoŋ akiitun akaitutuket ka Yakob; ka akaitutuket ka Isaak, eituni da akaitutuket ka Aburaam; eituni da akwap.

⁴³Ejalete kesi akwap, elelakini asabatonoke, kapak naeswapitor komameete kesi; iyuunete aiticanet naka numam adolitekec; naarai ajalakis ikatubesia, asacata ikecetauon ikakisila.

⁴⁴ Konye kaŋun kere, naejaatar kesi akwap naka lukasurupokec, mam eoŋ ajalakini kes, karaida mam asaci kes, amudiar kes cut, aibil akaitutuket kakes: naarai arai eoŋ EJAKAIT Ekecedeke:

⁴⁵ Konye eituni eoŋ aitutuket naka lukapapaakec kanukec, luabu ketolom kakwap nako Misiri kakonyen nuka atekerin, tetere araun eoŋ Ekecedeke: arai eoŋ EJAKAIT.”

⁴⁶ Ŋun kes aicorakineta ka itubesia, ka ikisila, luabu EJAKAIT kisilak tomake ka idwe luka Isirael komoru Sinai kamaka Musa.