Read Ateso Ilebin 27 Bible Online

Ilebin 27 - Ateso bible

Ilebin 27

¹Kotema EJAKAIT Musa atiar,

² “Kolimok idwe luka Isirael ebe, Naiyapoo ituŋanan aiyaposit mama ejai EJAKAIT naebeit ituŋa, itiriani ijo etiaike.

³ Itiriani etiai loka ekiliokit agear kaloka ikar akaisaarei aitodol loka ikar akaisakanykape, itiriani etiaike isekelin akaisakany luka epuesa, kwape ejaar esekel [14] loka aibois nakalaunan.

⁴Arai erai naberu, itiriani etiaike isekelin akaisauni.

⁵Arai erai yenika ikar ikany aitodol ikar akaisaarei, itiriani do etiai loka yenikiliokit isekelin akaisaarei, ka loka yeniberu isekelin itomon.

⁶Arai erai yenika elap ediopet aitodol ikar ikany, itiriani etiai loka yenisapat isekelin ikany luka epuesa, ka loka yenipese itiriani etiaike isekelin iuni luka epuesa.

⁷Arai erai yenika ikar akaisakanykape ka adepar; arai erai lokiliokit, itiriani etiaike isekelin itomon ka lukany, ka naberu isekelin itomon.

⁸ Konye arai icana ŋesi adepar etiaikon, itobwoi ŋes kakonyen nuka esasedoti, itiriani esasedoti etiaike; kwape ejaar apedor naka ŋol kaloeyapoi itiriani esasedoti etiaike.

⁹“Arai erai etiaŋ, loeinakinete ituŋa araun ainakinet mama ejai EJAKAIT, eraunos kere lukalaunak lueinakini ituŋanan mama ejai EJAKAIT.

¹⁰Mam iloci ŋes, karaida aisiec, yenejok itia yenerono, arai yenerono itia yenejok: arai do isieci ŋesi itiaŋ itia itiaŋ, eraunos ŋin ka yenisiecitere kere lukalaunak.

¹¹Arai erai etiaŋ lomam elai kere, lomam einakinete araun ainakinet mama ejai EJAKAIT, eyauni do etiaŋ akonyen nuka esasedoti:

¹²Itiriani esasedoti etiaike, arai ejok arai erono: kwape itiriania ijo esasedoti etiaike, kojau kwaŋin.

¹³Konye arai ekoto cut alakun ŋes, iyatakini ŋesi idiopet kokany mama ejai etiaikon.

¹⁴ “Arai kitalau etuŋanan etogoke araun lokalaunan mama ejai EJAKAIT itiriani do esasedoti etiaike, arai ejok arai erono: kwape itiriania esasedoti etiaike, kojau kwaŋin.

¹⁵Arai ekoto ŋol loetalaunit alakun etogoke, iyatakini do idiopet kokany mama ejaas apesan nuka etiaikon, eraun lokeŋ

¹⁶“Arai kitalau etuŋanan atutubet naka emanikor loka alupoke, itiriani ijo etiaike kwape ejaar aiyeke; aiye ekomer [15] loka esairi isekelin akaisakany luka epuesa.

¹⁷Arai kitalau ŋesi emanikorike agear kokaru loka eyubili, esalakin kwape ejaar etiaikon.

¹⁸ Konye arai kitalau emanikorike akaulo naka eyubili, imarakini esasedoti ŋes apesan kwape ejaatar ikar luesalito aitodol okaru loka eyubili, iŋoŋoori da etiaikon.

¹⁹Arai ekoto ŋol loetalaunit emanikor: alakun ŋes cut, iyatakini do idiopet kokany mama ejaas apesan nuka etiaikon kosodi itogogoŋio mamakeŋ.

²⁰Arai mam ekoto alakun emanikor, ara itwegelit emanikor ecetuŋanan, mam bobo elakunio:

²¹ Konye naeosikinen koyubili eraun emanikor lokalaunan mama ejai EJAKAIT, kwape emanikor loegitunitai; eraunos alup nuka esasedoti.

²²Arai kitalau ŋesi emanikor loagwelit mama ejai EJAKAIT, emanikor lomam erai loka alupoke;

²³Imarakini esasedoti ŋes ajokis naka etiaikon kiton okaru loka eyubili: einakini etiaikon kapaaran kaŋin, kwape ibore yenikalaunan mama ejai EJAKAIT.

²⁴ Kokaru loka eyubili eboŋori emanikor mama ejai je loagwelari, ŋes elopet loebeitos alup.

²⁵ Itiriani itiaisineikon kere kwape ejaar esekel loka aibois nakalaunan: esekel ŋes igeran akaisaarei.

²⁶ “Dimarai ikiyai kotoma otiaŋ yenerai ikiyai mama ejai EJAKAIT, mam ituŋanan italauni ŋes; arai emoŋ arai emerekek, erai loka EJAKAIT.

²⁷Arai erai yenika etiaŋ lomam elai, elakuni ŋes kwape ejaar etiaikon, iyatakini da idiopet kokany mamakeŋ: arai mam elakunio, egwelario kwape ejaar etiaikon.

²⁸ “Konye mam egwelario karaida alakunio ibore yenegitaritai, yenegitari ituŋanan mama ejai EJAKAIT kotoma kaluejaas kaŋes kere, arai yenika ituŋanan arai itiaŋ, arai yenika emanikor loka alupoke: ŋinibore kere yenegitaritai erai yenikalaunan noi mama ejai EJAKAIT.

²⁹Mam elakunio yenegitaritai, yenegitaritai kotuŋa; abeit eario ŋes.

³⁰ “Idiopet kotomon kere yenika akwap, arai yenika ikinyom luka akwap, arai yenika araito nuka ikito erai yeni ka EJAKAIT: erai yenikalaunan mama ejai EJAKAIT.

³¹Arai ekoto etuŋanan alakun ice kodiopet kotomonoke, iyatakini idiopet kokany mamakeŋ.

³² Idiopet kotomon kere yenika isipanin luka aituk ka luka amerekekin, ŋin yenitori kwap kebela, yenikitomonet eraun yenikalaunan mama ejai EJAKAIT.

³³Mam irerei arai ejok arai erono, karaida aisiec: arai kisiec, eraunos ŋin ka yenisiecitere kere lukalaunak: mam ‘elakunio.’ ”

³⁴Ŋun kes aicorakineta, nuabu EJAKAIT kicorak Musa kanuka idwe luka Isirael komoru Sinai.