Read Ateso Ilebin 6 Bible Online

Ilebin 6 - Ateso bible

Ilebin 6

¹Kotema EJAKAIT Musa atiar,

² “Arai kediaka tuŋanan, aibucar kaneejai EJAKAIT, aiŋal ekeidunyet kakirot naka aiŋad, arai naka etitiŋoi, arai naka aiŋat, arai aŋarunit ekeidunyet;

³ Arai kedum ŋesi yenaoliorit, kiŋalaŋal, kiyapo nuka aisab; arai kiswama ituŋanan adiopet kaŋun kere, ediakarit kwaŋin:

⁴Aso do arai kediaka, egwaunit da akirot, inyakari do ŋin yenaŋatarit, arai ibore yenaoliorit yenadumu ŋesi.

⁵ Arai akirot kere naeyapoi nuka aisab; inyakari do kere, iyatakin ida idiopet kokany: einakini loerai elopet, kapaaran naitodunor ebe egwaunit akirot.

⁶ Eyauni ainakineteke naka aronis mama ejai EJAKAIT, emerekek lomam eŋwalit kosipan, kwape itubokinia ijo, mama ejai esasedoti, araun ainakinet naka aronis.

⁷Ituluci esasedoti ŋes kakonyen nuka EJAKAIT, isionio ŋes; kaŋun kere nuiswamai ŋesi nuagwaunit.”

⁸Kotema EJAKAIT Musa atiar,

⁹“Kicorak Aaron ka odweke ebe, Lo ŋes ekisil loka ainakinet naicweio: ejaanakini ainakinet naicweio akito nukotem akuare kiya kiton tupuruc; inokenonoo akim ŋin nakotem.

¹⁰ Enapenenei esasedoti anapitoke naka ebaputa, enapenenei kakuanake epaleke loka ebaputa; emudanari ekurwon loka ainakinet naicweio naecwe akim kotem, ibwaikini ŋes owai loka etem.

¹¹Elacari ikenapen, konap icenapen, kodaka ekurwon ŋina kiidukurun kaibois naelai.

¹²Inokenonoo akim naejai otem, komam eduŋiori, inokenenei esasedoti akito ŋinitupuruc inapanakini ainakinet naicweio, kicweikini asiepai naka ainakineta nuka ainapakin.

¹³ Inokenonoo akim kotem tiritir; komam eduŋiori.

¹⁴ “Lo ŋes ekisil loka ainakinet naka akiria: einanakinete odwe luka Aaron kakonyen nuka EJAKAIT, koiŋaren ketem.

¹⁵Emuduni akan ileleba akiria nuidicic nuka ainakinet naka akiria, ka naka akinyeteke, ka lueuru maa kere luejaas ainakinet naka akiria, kicwe kotem araun asakat naeuru saa, araun aiituneteke mama ejai EJAKAIT.

¹⁶ Ŋun da nuideunos enyamenenei Aaron ka odweke: enyamenenoo komam itubuunitoi kaibois nakalaunan; enyamanakinete alaro naka ewema loka airiamunun.

¹⁷ Mam epeeneno ka yenikitubuunet; Ainak araun ewaikec loka ainakinetaka nueinakinere kakim; erai nakalaunan noi, kwape ainakinet naka adiakaret, kwape da ainakinet naka aronis.

¹⁸ Enyamenenei ŋolikiliokit kodwe luka Aaron, airumetekus nakitebeitai ikar kere anatar aturiokus, kotoma ainakineta nuka EJAKAIT nueinakinere kakim; ŋol loetirori kes eraun lokalaunan.”

¹⁹Kotema EJAKAIT Musa atiar,

²⁰ “Na ŋes ainakinet naka Aaron ka odweke naeinakinete mama ejai EJAKAIT kapaaran naenyonyoikinere ŋes; idiopet kotomon yenika epa [3] loka akiria nuidicic araun ainakinet naka akiria tiritir, atutubet tupuruc, ka atutubet eboŋ.

²¹Iswamaun kakinyet, kotoma akeit; naebauniata itolomari kes: iinakini ainakinet naka akiria ikamoŋon lukeon araun asakat naeuru saa mama ejai EJAKAIT.

²² Esasedoti loinyonyoikinitai akinyet aiboisike lokodweke ŋes einanakini: icweeneno cut mama ejai EJAKAIT kokisil loka ikar kere.

²³Icweeneno cut ŋiniinakinet naka esasedoti naka akiria; mam enyamenenoo.”

²⁴Kotema EJAKAIT Musa atiar,

²⁵ “Kolimok Aaron ka odweke ebe, Lo ŋes ekisil loka ainakinet naka adiakaret: kaibois nearakinio ainakinet naicweio, nepenen earakinio ainakinet naka adiakaret kakonyen nuka EJAKAIT: erai nakalaunan noi;

²⁶ Esasedoti loeinakini ŋes kanuka adiakaret ŋes enyami: enyamakini aibois nakalaunan, alaro naka ewema loka airiamunun.

²⁷ Yenetirori akiriŋike eraun yenikalaunan: ido naebwatanakinotor aokotoke anapito kere, ilosi ŋin naebwatakina kaibois nakalaunan.

²⁸ Konye ibusakinit aibwaŋ amot naelosere: ido arai ilosio kobore yenika aisinit, iswagario, kilolwarai kakip.

²⁹ Enyami ŋolikiliokit kosasedotin: erai nakalaunan noi.

³⁰ Mam enyamenenoo ainakinet naka adiakaret, naeyaunio aokotoke owema loka airiamunun aituluc kaibois nakalaunan: icweio kakim.