Read Ateso Ilebin 9 Bible Online

Ilebin 9 - Ateso bible

Ilebin 9

¹ Kosodi kanen, kapaaran nakikanyetekauni, konyarau Musa Aaron ka odweke, ka imakio luka Isirael;

² Kotema ŋesi Aaron atiar, “Koyaŋa ijo itaok yenikiliokit araun ainakinet naka adiakaret, ka emerekek araun ainakinet naicweio, lumam eŋwalitos, koinak kes akonyen nuka EJAKAIT.

³ Ilimokini idwe luka Isirael ebe, ‘Koyaŋaasi yesi ekoroi araun ainakinet naka adiakaret; ka itaok ka imerekek, kere luka ekaru ediopet, lumam eŋwalitos, araun ainakinet naicweio;

⁴ Ka emoŋ ka emerekek araun ainakineta nuka ainapakin, araun asubanit kakonyen nuka EJAKAIT; ka ainakinet naka akiria nuinyalakinitai akinyet: naarai kitaanyikin lolo EJAKAIT yes.’ ”

⁵Koyaut ŋuluecorakinit Musa kiŋaren kewema loka airiamunun: kikuny ekodet kere kobwo kakonyen nuka EJAKAIT.

⁶ Kotema Musa atiar, “Na ŋes akirot naicorakinit EJAKAIT yes aswam: kitaanyikin da yes aibuses naka EJAKAIT.”

⁷ Kotema Musa Aaron atiar, “Kikuny otem, koinak ainakinetekon naka adiakaret, ka ainakinetekon naicweio, kolucokin bon ka ituŋa da kijaik ainakinet naka ituŋa, kituluc kes; kwape kicorakinia EJAKAIT.”

⁸Kikuny Aaron otem, koar itaok yenika ainakinet naka adiakaret, yenike kanuke.

⁹ Kijaikis odwe luka Aaron ŋes aokot: kidomak ebokoritike aokot, kojukonok amumwara nuka etem, kobukok aokot kwap ketem:

¹⁰ Konye kicweik asiepai, ka iŋalur, ka asiepai naka emany naka ainakinet naka adiakaret kotem; kwape kicorakinia EJAKAIT Musa.

¹¹ Kicweik da akiriŋ ka emukule kokiŋa kiidukurun.

¹²Koar ainakinet naicweio; kijaikis odwe luka Aaron ŋes aokot, kobwatanak otem owaitin kere.

¹³Kijaikis ŋes ainakinet naicweio, inerio kere ka akou: kicweik kes kotem.

¹⁴Kilot lukotoma ka akeje, kicweik kes kaneajai ainakinet naicweio kotem.

¹⁵ Kijaik ainakinet naka ituŋa, koŋana ekoroi loka ainakinet naka adiakaret loarai kanuka ituŋa, koar, kijaik kanuka adiakaret, kwape kalosodit.

¹⁶Kijaik ainakinet naicweio, koinak kwape ajaar aicorakinet.

¹⁷ Kijaik ainakinet naka akiria, kileleb akekan, kicweik kotem, kogelara kainakinet naicweio naka atupuruc.

¹⁸ Koar da emoŋ ka emerekek, asubanit naka ainakineta nuka ainapakin, nakerai kanuka ituŋa; kijaikis odwe luka Aaron ŋes aokot, kobwatanak otem owaitin kere.

¹⁹Ka asiepai naka emoŋ; ka naka emerekek, ka asonyok, ka naerapit lukotoma, ka iŋalur, ka asiepai naka emany:

²⁰Kibwaikis asiepai katorobusio, kicweik asiepai kotem:

²¹ Kijaŋ Aaron atorobusio ka amurwo nakoteten araun ainakinet naijaŋio kakonyen nuka EJAKAIT: kwape kicorakinia Musa.

²² Kikea Aaron akekanin mama ejaas ituŋa, kilipak kes arereŋ; kodok kedau aijaikin ainakinet naka adiakaret ka ainakinet naicweio, ka ainakineta nuka ainapakin.

²³ Kolomasi Musa ka Aaron owema loka airiamunun; kosodete nakelomuniata, kilipakis ituŋa arereŋ; kitaanyikin ituŋa kere aibuses naka EJAKAIT.

²⁴ Koloma akim kakonyen nuka EJAKAIT, kidopo ainakinet naicweio ka asiepai kotem: keanyut ituŋa kibwoŋas, kibiroros ebuburia.