Read Ateso Yeremia 1 Bible Online

Yeremia 1 - Ateso bible

Yeremia 1

¹ Akiro nuka Yeremia okoku loka Kilikia, lokonabin luajaas Anatot akwap naka Benyamin.

² Loabuni akirot naka EJAKAIT mamakeŋ kapaarasia nuka Yosia okoku loka Amon, ekabaka loka Yuda, kokaru lokitomonet kauni loka airumuke.

³ Kobu da kapaarasia nuka Yekoiakim okoku loka Yosia, ekabaka loka Yuda, kiton osaŋe loka ekaru lokitomonet kalodiop loka Sedekia okoku loka Yosia, ekabaka loka Yuda; kiton neejoreorere luko Yerusalem olap lokikanyet.

⁴Kosodi kobu akirot naka EJAKAIT mama ajai eoŋ kobala ebe,

⁵ “Eriŋa kesuba jo kotoma akoik abu kajen jo, Ido eriŋa ilomuna kakoik abu ketalau jo: Kaseu jo araun enabi mama ejaas atekerin.”

⁶ Kasodi eoŋ atemar atiar, “Wu okwe, EJAKAIT Edeke! Koany, mam apedori einer: naarai arai esapat.”

⁷ Konye kabala EJAKAIT eoŋ ebe, “Sirikiner ebe, ‘Arai eoŋ esapat:’ Naarai ilosenenei mama ejaas ŋul kere lukejukanari jo, Inerenenei da ŋun kere nukecoranakini jo.

⁸ Ebala EJAKAIT ebe: Sirikikurianar kes: Naarai ajaenena kajo ayuun jo,”

⁹ Kosodi EJAKAIT arior akekan kotiroria akaituk; kabala EJAKAIT eoŋ ebe: “Koany, ebwaik akakiro aitukukon:

¹⁰ Koany, kadakak jo lolo ayait atekerin ka ajakanuto, Arutun ka abilibil, Amudiar, ka atiyaikin; Aiduk ka aira da,”

¹¹Ido da kobu akirot naka EJAKAIT mama ajai kobala ebe, “Yeremia, ianyu inyo?” Kabala ebe, “Aany ebela loka ekuŋur,”

¹² Kosodi EJAKAIT atemar eoŋ atiar, “Iany ejok: naarai edarenenei akakirot aitodolikin.”

¹³Kobu akirot naka EJAKAIT nakiareit mama ajai kobala ebe, “Ianyu inyo?” Kabala ebe, “Aany amot naekulai; kipuŋuno da kagolitomei.”

¹⁴Kosodi EJAKAIT atemar eoŋ atiar, “Ebuni aronis abelun kagolitomei mama ejaas kere luiboienenete kakwap kana.

¹⁵ Naarai ebala EJAKAIT ebe, Koany, anyarauni atekerin kere nuka ajakanuto nuka agolitomei; epote do, esipokinete kesi ŋinituŋanan ekeicoloŋ loka ajakanut neelomarere orutei luka Yerusalem, asurokin arwatatinike kere airimor, asurokin da ireria kere luka Yuda.

¹⁶ Ido alimori ikatubesia aluikin kes kanuka nukaronokokec kere; naarai kajalata, kisupurunonokis lukisupurununo icedekesio, komaata da aswamisio nuka akaninikec.

¹⁷ Aso do jo koen aŋabetekon, konyou, kolimok kes kere nukecoranakini jo: sirikiyaloŋoŋ nukec, kenyek eoŋ aisiyaloŋoŋ jo kakonyenekec.

¹⁸Naarai koany, ketuluo jo lolo ere loebwaitai, epir da lokasuat, arwatatin nukaisinin, aluikin akwap kere, aluikin ikabakan luka Yuda, aluikin ikapolokoke da, aluikin isasedotinike, ido aluikin ituŋa luka akwap kana.

¹⁹ Ejiikinos kesi kajo: konye mam kipikorete: naarai ebala EJAKAIT ebe, Ajaenena eoŋ kajo ayuun jo.”