Read Ateso Yeremia 11 Bible Online

Yeremia 11 - Ateso bible

Yeremia 11

¹Akirot naabu kobu mama ejai Yeremia kama ejai EJAKAIT ebe,

²“Kiirasi yesi akiro nuka aitutuket na, kolimokis ituŋa luka Yuda, ka luiboiete ko Yerusalem.

³ Kolimok ijo kes ebe, Ebala kwanata EJAKAIT, Edeke loka Isirael ebe, Kikenoi ituŋanan yenimam epupi akiro nuka aitutuket kana,

⁴ nakecorakinit lukapapaakus kapaaran naketolomunia kes kakwap nako Misiri, koupa loka asuat, enera ebe, Korimarito ekaporoto, kiswamata kwape ejaatar kere nukecorakinit yes: kwaŋin iraunos ikatuŋa, eoŋ da araun Ekusideke.

⁵ Tetere eticasi aiyaposit nakeyapoikinit lukapapaakus, ainakin kes akwap naeleleete akile ka esik, kwape lolo.” Kasodi eoŋ aboŋokin ebe, “Kikote nepenen, wu EJAKAIT.”

⁶ Kabala EJAKAIT eoŋ atiar, “Kolimonok akiro nu kere oreria luka Yuda, korotin da luka Yerusalem ebe, Kiirasi yesi akiro nuka aitutuket kana, kiswamata da.

⁷Naarai abu ketejenik noi lukapapaakus kapaaran naketolomunia kes kakwap nako Misiri, kiton lolo, kadilonokin tupuruc ido ketejenikini ebe, Korimarito ekaporoto.

⁸Konye mam apotu korimasi, ido man apotu kitoikis akiikec, konye kolosenenete ŋinituŋanan kaninik naka etauke lokaronon: kanuka ŋun ketebeik kes akiro kere nuka aitutuket kana, nukecorakinit kes aswam, konye mam apotu kiswamata.”

⁹ Kabala EJAKAIT eoŋ atiar, “Atakanu ainerunet nakaiyeiyea kotuŋa luka Yuda, ka luiboiete koYerusalem.

¹⁰ Aboŋosi mama ejaas numam adolit nuka lukapapaakec, luapotu kogiroto apupun akakiro; atupasi kesi icedekesio aijaanakin: abilata ekek loka Isirael ka ekek loka Yuda akaitutuket naketutukit kalukapapaakec.

¹¹ Kanuka ŋun ebala EJAKAIT kwanata ebe, Koany, ayaun aronis mamakec, namam epedorete ainac; karaida kamonyakis, konye mam eoŋ eirari kes.

¹² Kosodete ireria luka Yuda ka luiboiete koYerusalem alosit amonyakin idekesio luisupuronokino lukisupurununo: konye mam cut itajarete kes kapak naka icanikec.

¹³Naarai kwape imwatatar ireriakon, imwaasi kwaŋin ikonidekesio da, ijo Yuda; ido kwape imwatatar irotin luka Yerusalem, ipotu kosipokis ileic itemwan, kes itemwan aisupurikin Baal lukisupurununo.

¹⁴ “Kanuka ŋun sirikilipak ituŋa lu, sirikitonyou aimony karaida ailipasit kanukec: naarai mam apupuni kes kapak nakamonyakiniata eoŋ kocanikec.

¹⁵ Inyo bo ejaar naminataka togoka, naarai eswama nukasilianut? Epedorete kereka aiyaposio ka akiriŋ nakalaunan aituku yes katwanare? Ipedorete kereka eibwoŋ?

¹⁶Abu EJAKAIT komaik jo ekiror ‘Eseitun loepesit, loejok karaito nuejok’. Keporoto loka ecelet loepol enokoki akim, abilasi da atenunake.

¹⁷ Naarai abu EJAKAIT loka ajoresio lokiraikini jo kolim aronis kamakon, kanuka aronis naka ekek loka Isirael, ka naka ekek loka Yuda, nakiswamakinos bonik ketunyunyurikis eoŋ kanuka aisupuronokin Baal lukisupurununo.”

¹⁸Ketejenik EJAKAIT eoŋ, kajen: Kosodi ijo aitodikin eoŋ aswamisiokec.

¹⁹ Konye kasub bala imerekek yenepatana yenerikorio aiar; Mam abu kajen ebe enerut kaiyeiyea asurokin eoŋ, Kobalasi ebe, “Kamudiasi ekitoi ka araitoke da, Kagelasi ŋes kakwap naka lukajarak, Tetere mam bobo iitunio ekekiror.”

²⁰ Konye, wu EJAKAIT loka ajoresio, loitubi akiro kotenan, Loigimori aomisio ka etau, Kinye ber kaany enyaŋitikon kamakec: Naarai kekuiok jo akakirot.

²¹ Kanuka ŋun ebala kwanata EJAKAIT nuka ituŋa luka Anatot, luemoete aijarakon, kobalas ebe, “Sirikidwar kokiror loka EJAKAIT, kinyek atwanare kakanikosi.”

²²Kanuka ŋun ebala kwanata EJAKAIT loka ajoresio ebe, “Koany, eticani kes: etwakete ikatumunak kekileŋ: etwakete ikecedwe da lusap ka lupesur eteŋei.

²³ Ido mam luideunos kakesi: naarai ayauni aronis kotuŋa luka Anatot, kokaru loka aiticaniokec.”