Read Ateso Yeremia 13 Bible Online

Yeremia 13 - Ateso bible

Yeremia 13

¹Kabala EJAKAIT kwanata ebe, “Kolot kogwel aenet naka ebaputa, konapak aŋabetekon, mam idomakin akipi.”

²Abu do kagwel aenet kwape kejaar akirot naka EJAKAIT, kanapak aŋabeteka.

³Kobu akirot naka EJAKAIT mama ajai nakiareit ebe,

⁴ “Koya aenet naigwelit, naejai aŋabetekon, konyou kolot Eupurate, kibwa kaŋina kobur loka atiida.”

⁵Kwaŋin do kalot, kebwa ŋes kariri naka Eupurate, kwape kecorakinia EJAKAIT.

⁶Kosodi kanen, ketuboros apaarasia nuipu, kabala EJAKAIT ebe, “Konyou, kolot Eupurate, kolem kaŋina aenet, nakecorakinit jo aibwa kaŋina.”

⁷ Kasodi eoŋ alosit Eupurate, kabok, kalem aenet kaibois kama kebwaitor: ido koany, emunaara aenet amamei ajokis.

⁸Kosodi akirot naka EJAKAIT abunore mama ajai ebe,

⁹ “Ebala EJAKAIT kwanata ebe, Amunaari kwape kwaŋin aiturokina naka Yuda, ka aiturokina naepol naka Yerusalem.

¹⁰ Ituŋa lu lukaronok, lueŋerete akiirar akakiro, luelosenenete kaninik naka itauonokec, luetupasi idekesio ice aijaanakin, ka aima kes, eraunos kesi kwape aenet na, naemamei ajokis.

¹¹ Naarai ebala EJAKAIT ebe, Kwape iketakinor aenet aŋabet naka ituŋanan, kwape kwaŋin kesiketikinia ekek kere loka Isirael ka ekek kere loka Yuda, tetere eraunos kamakaŋ ateker, ka ekiror, ka aiturit, ka aibuses da: konye koŋeroto akiirar.

¹²“Kanuka ŋun ilimokini kes akirot na ebe: Ebala kwanata EJAKAIT, Edeke loka Isirael ebe, ‘Ilelebio ŋinimot ebino.’ Kilimokinete jo ebe, ‘Mam ca sio kijeni ebe, ilelebio ŋinimot ebino?’

¹³ Kosodi ijo atemar kes ebe, ‘Ebala EJAKAIT kwanata ebe, Koany, esilelebi emeret luiboiete kere kakwap kana, ikabakan luiboiete koicoloŋ loka Daudi, ka isasedotin, ka inabin, ka luiboiete da kere koYerusalem.

¹⁴Ebala EJAKAIT ebe, Esinaŋanakini kes, lukapapa ka idwekec nepepe. Mam etimi, karaida aideun, karaida aisioni, komam amudiarit kes.’ ”

¹⁵ Kiirasi yesi kitoikis da aki; Sirikipogakinos naarai ener EJAKAIT.

¹⁶ Kitubusikis EJAKAIT Ekusideke, Eriŋa eyauna amuton, Ido eriŋa iguikina akusikeje Koroŋan luka aikamus; Ido naimoiata aica, Kituluo etoribe loka atwanare, Kitarau da amuton nairiono cucucuc.

¹⁷Konye arai iŋerete apupun, Emonyi ekatau kaiyeiyea kanuka akusiiwoŋonut; Emonyete noi akakonyen, eleleete da akiyo, Naarai ijoreoritai esipan loka EJAKAIT.

¹⁸ Kolimok ijo ekabaka ka toto naka ekabaka ebe, “Kitasonikinos, kiboikinos kwap: Naarai itisilitai nuinapito kakwes, Aboko naka aibusesukus.”

¹⁹ Egolitoi ireria luka Eŋalakimak, Emamei da yeneŋaari kes: Yuda kere ijoreoritai; Ijoreoritai cut kere.

²⁰ “Kiteluosi akusikonye, koanyutu kes luepote kagolitomei: Ali bo esipan lokiinakinitai, Ekonisipan loejok noi?

²¹Anyoika nuinera naedakakinia ŋesi ipaperokon kujukon, Naarai jo elopet isisianakinit kes asurokin jo? Mam tope kikamuni jo aiturur, Kwape aberu naeriebi aidoun?

²² Arai kiner kotaukon atiar, ‘Kanukinyo kadoikinioto akiro nu?’ Kanuka ailiil naka numam adolitekon Ŋes epukorere ikonigoen, Eriebatar akonititiban kakaje.

²³Epedori kereka Etiopiat aijulakin amunyoke, Arai bo eris aijulakin amerianutuke? Kosodete yesi aswam nuejok Luinaikinito aswam nueroko.

²⁴Kanuka ŋun ŋes esiarisiaria kes, Kwape agugu nuekutari ekwam loka ais.

²⁵ Ebala EJAKAIT ebe, ŋin ŋes ewaikon, Akorakinet naketemokinit jo; Naarai kimurwokinit eoŋ, komunokina aiŋal.

²⁶ Kanuka ŋun ŋes eolunio ikonigoen akonyenekon, Kotakanut ileicikon.

²⁷ Abu kaany italesiakon, Ka adoteukon, ka aicicinakon, Ka asilianut naka adoteukon, Koukon luka ais. Itukwi ijo Yerusalem! Itodolete ai eriŋa kitalauna?”