Read Ateso Yeremia 15 Bible Online

Yeremia 15 - Ateso bible

Yeremia 15

¹ Kosodi EJAKAIT atemar eoŋ atair, “Karaida kebwoata Musa ka Samuel kakonyeneka, timam ekatau epodo ituŋa lu. Kireŋea kes kakonyeneka, kolomasi!

² Kosodi kanen arai kitemarete jo atiar, ‘Ai bo kilomaria?’ Ŋes konyet ilimokinia kes ebe, ‘Ebala EJAKAIT kwanata ebe: Lukatular neejai atular; Lukekileŋ, neejai ekileŋ; Luketeŋei neejai eteŋei: Ido luijoreorio neejai aijoreorio.’ ”

³ “Ebala EJAKAIT ebe, Aseikini kes iponesio iwoŋon: ekileŋ aaria, iŋokwo apoopoia, akweny nuka apak ka itiaŋ luka akwap aipinyaria ka amudiaria.

⁴ Ainakini kes aisiarakinio toma ajakanuto kere nuka akwap, kanuka Manase okoku loka Kesekia ekabaka loka Yuda, kanueswamat ŋesi koYerusalem.

⁵ “Naarai iŋai kitimi jo, wu Yerusalem? Iŋai gwai kikuudiani jo? Iŋai gwai epauni aiŋitun akonikiro?

⁶ Ebala EJAKAIT ebe, Iŋer eoŋ, Iboŋonori kau: Ŋes arioria akakan asurokin jo, ka amudiar; Kapas eoŋ akiitunun.

⁷ Epukupuk kes kaipukupuket korutei luka akwap; Alema idwekec, amudia ikatuŋa; Mam apotu koboŋut korotinikec.

⁸Etupuu apuserunukec aitelekarit asine naka aŋololin: Ayau mamakec ekamudiaran paaran asurokin nukatoto nuka ikatumunak: Etodoikin kes katipet aditar ka nuketasuro.

⁹ Akalanyanar ŋin naawurit ikanykaarei; Apal aijarake; Aloma akoloŋoke eriŋa erai paaran; Isurumio ileic itirirai. Ido ebala EJAKAIT ebe, Ejaikini aatoŋotokec okileŋ kakonyen nuka lukasurupokec.”

¹⁰ Wu okwe totoka, jo awuruun eoŋ, arai etuŋanan loka aŋolopa ka ediŋet kakwap kere! Mam abu kayu tetere emedauni, ido mam ituŋa apotu kayuut tetere imedaete: konye kekenete kesi kere.

¹¹Kobala EJAKAIT ebe, Abeit ketogogoŋi jo kanuka ajokis; abeit ainakini lokasurup aiŋaiŋa jo kapak naka aronis, kapak da naka aiticanitoi.

¹²Epedori kereka ituŋanan aibil asuat, asuat naebuni kagolitomei, ka aisinit?

¹³ “Ainakini ikoniboro, ka abarakon aŋatario komamei etiai, kanuka aronisiokon kere, koikorunokon kere.

¹⁴ Kainakini yes aijaanakin lukasurupokus kakwap namam ijenete: naarai inepunit akim kakanyunyura, nakicweikini yes.”

¹⁵ Wu EJAKAIT ijeni ijo; Kiitunoi, koanyanarai, Kinyaŋakinai kama ejaas ikareitokoka; Sirikiiyaŋa eoŋ kotoma atitiŋukon: Kojen ebe kamoromoroi eoŋ kanukon.

¹⁶ Aponi kodumunai akirokon, kanyam kes; Keraas akirokon kamaka ailel ka aiyalama naka etauka; Naarai kamaikinitai ekirorikon, Wu EJAKAIT Edeke loka ajoresio.

¹⁷ Mam abu keboi katukot naka ŋul kaluiyalamasi, Mam abu kalel: Abu keboi bon kanuka akanikon; Naarai ibu kilelebik eoŋ akadakin.

¹⁸ Kanukinyo mam akariebo esaŋia, Akamusuŋut da mam eŋaleunio, Naenerit aimukeo? Iraun ijo kamakaŋ kwape aguurut naeŋalai, Kwape akipi nueonikinito?

¹⁹ Kanuka ŋun ebala EJAKAIT kwanata ebe: “Arai iboŋuni, kasodi eoŋ ainyakun jo, Tetere ibwoi kakonyeneka. Arai da ilemuni nuka akais nuipu kotoma nuutai, Iraun do kwape akaituk. Eboŋunete kesi mamakon, Konye mam jo iboŋori mamakec.

²⁰Ketaraun jo arwatat naebwaitai naka aisinit Mama ejaas ituŋa lu; Ijiikinos kajo, konye mam kipikorete; Naarai ebala EJAKAIT ebe, Ajaenena kajo aitajar jo, Ido ayuun jo.

²¹ Kayuuni jo kakan naka ikaronok, Kalakuni da kakan naka luketasuro.”