Read Ateso Yeremia 16 Bible Online

Yeremia 16 - Ateso bible

Yeremia 16

¹Ido kobu akirot naka EJAKAIT mama ajai ebe:

² “Sirikimany aberu, kwabo mam iwurikini idwe lusap ka lupesur aibois na.

³Naarai ebala kwanata EJAKAIT nuka idwe lusap ka lupesur lukeurikinio aibois na, ido nuka nukatotokec nukeuriete kes, ido nuka lukapapakec lukeurikinete kes kakwap kana ebe:

⁴etwakete kanuka adekesia nueroko. Emamuunete luekuudianete kes, karaida aida kes; eraunos kwape aoret kakwap. Ekileŋ ka eteŋei kes epiarete kes; eraunos atesinakec inyamat luka akweny nuka apak, ka itiaŋ da luka akwap.

⁵ “Naarai ebala EJAKAIT kwanata ebe: Sirikiloma togo neibworotor, mam ilosi akuudian, karaida aimony kes: naarai ebala EJAKAIT ebe, Alema eoŋ akainapakin kotuŋa kalu, alema da akasianut-nakamin ka aitim.

⁶ Etwakikinete lukapolok ka ludidik akwap na: mam idaio, ido mam ituŋa ekuudianete kes, karaida ager, ido mam ebarenete akwesikec kanukec.

⁷ Mam ituŋa einarete kes atap ibworosi, aipudun kes kanuka lukatwak; ido mam ituŋa einakinete kes adere naka aitalakaar amasia kanuka papakec arai kanuka totokec.

⁸Ido sirikiloma togo loenyamiata epucit, aiboikin kakes, ainyam ka aimat.

⁹ Naarai ebala kwanata EJAKAIT loka ajoresio, Edeke loka Isirael ebe: Koany, etanaŋi kaibois kana, kakonyenekus, ido kotoma apaarasiakus, eporoto loka aitac, ka eporoto da loka aiyalama, eporoto loka eteran ka eporoto da loka ateran.

¹⁰ “Kosodi kanen nailimokinia ituŋa lu akiro nu kere, kes da etemarete atiar, ‘Kanukinyo kinerakinia EJAKAIT aronis na kere naerono aluikin sio? Anyoika bo numam adolitekosi? Anyoin bo aronis nakidiaka kama ejai EJAKAIT Ewokodeke?’

¹¹ Kosodi ijo atemar kes atiar: ‘Naarai ebala EJAKAIT ebe, Apotu lukapapaakus kajalata eoŋ, kotupata idekesio ice, kijaanakis kes, komaata kes, kajalata eoŋ, komam ericito ikakisila.

¹² Iswamata yesi da nukaronok adepar lukapapaakus; naarai koany ituparete yesi ŋinituŋanan aninik naka eketau loerono, iŋeroto apupun eoŋ.

¹³ Kanuka ŋun kereŋeari yes kakwap kana alomar akwap namam lem ijenete, yes ka lukapapaakus da; kaŋina da ipote aijaanakin idekesio ice paaran ka kuare da; naarai mam ketodikini yes asianut nepetai da.’

¹⁴“Kanuka ŋun, koany, ebala EJAKAIT ebe, Mam bobo ebakai ebe, ‘Kwape ejaria EJAKAIT lokitolomuni idwe luka Isirael kakwap nako Misiri’;

¹⁵konye ebe, ‘Kwape ejaria EJAKAIT lokitolomuni idwe luka Isirael kakwap naka agolitomei, ido kakwapin kere kama ereŋearit.’ Naarai enyakuni kes akwapukec naabu kainak lukapapaakec.

¹⁶ “Koany, ebala EJAKAIT ebe, Anyarauni ikalokak luipu, ikamete kes; akaulo kaŋun anyarauni ikamejak luipu, emejaete kes kaŋoliroŋat, ido kaŋoliukot, ido kabuwan nuka atiidan.

¹⁷ Naarai esesenete akakonye irotinikec kere: mam eŋopito kakonyeneka, ido numam adolitekec mam imunonounos kakonyeka.

¹⁸ Ido esiauni ber atacakin irwan aarei numam adolitekec ka aronisikec, naarai etisiloto akwapuka katesin nuka ikeceboro luketal, elelebata kesi airumeteka kitalesiakec.”

¹⁹ Wu EJAKAIT, akagogoŋ, akabwas da, Neakerianari kapaaran naka ican, Epote atekerin mamakon anyoun kosaŋeta nuka akwap, Ebalasi ebe, “Mam lukapapaakosi irumito idiobore dimarai nukaiŋal, Aamameak ka akiro numam imedaunete.

²⁰ Esubuni kereka ituŋanan idekesio? Mam ŋul eraas idekesio!”

²¹“Kanuka ŋun, koany, etejenikini kes, irwan na atipet etejenikini kes akanika ka apedorika; ejenunete kesi ebe ekakiror ŋes EJAKAIT.”