Read Ateso Yeremia 17 Bible Online

Yeremia 17 - Ateso bible

Yeremia 17

¹ “Iwadikatai aronis naka Yuda kakwara naka asuat; kaitesu naka ekukwai igirakinitai amor nuka itauonokec, ido amumwar nuka itemwanakec.

² Kapak naiitunioto ikecedwe itemwanakec ka Aserimikec, kama ejaas ikito luepesito, koukon da luiceleleete,

³ koroŋan da luka ais. Ainakini ikoniboro ka abarakon kere aŋatario, aiboisiokon nuiceleleete kanuka aronis, anatar iikorunokon kere.

⁴ Ijo da ipaluni kama ejai airumetekon naabu kainakinite jo; kainakini jo aijaanakin lukasurupokon kakwap namam ijeni: naarai esinepu akanyunyura akim naicweenenei ikar kere.”

⁵ Ebala EJAKAIT kwanata ebe: “Kikenoi ituŋanan yenemunokina ituŋanan, Yenitaraun akuan akekan, Eketau da enyoununei kama ejai EJAKAIT.

⁶ Naarai eputokinos kekiot kamodiŋ, Mam eanyuni neeponiata nukajokak. Iboikini aiboisio nuilarioŋoŋos nuka ais, Akwap naka abalaŋ naemameete ituŋa.

⁷ “Isirereŋitoi ituŋanan yenemunokina EJAKAIT, Ido EJAKAIT ŋes akemun.

⁸ Naarai eraun bala ekitoi loeraikinitai ariri naka akipi, Loisiliarit aliasioke ocor, Kwabo mam eyoŋi akoloŋ keca noi, Konye eribiribete akekui; Kwabo mam iyaloŋoŋoi kokaru loka ekure, Kwabo mam inyeini aira araito.”

⁹ Iŋalana etau aitelekarit iboro kere, Ido epol akedek noi: Iŋai bo epedori ajenun ŋes?

¹⁰ “Eoŋ EJAKAIT ererei etau, etemi da iŋereteny, Ainakini ŋinituŋanan kwape ejaatar ikeponesio, Kwape ejaatar da araito nuka akeswamisio.”

¹¹ Kwape irukumia etakura abeei numam eurit, Ikoni nen yenetukonokin abar, kwabo mere kotoma abeit; Kokidiŋ kapaarasiake etiakas kakes, Kawasiake da eraun ibaŋ.

¹²Eicoloŋ lokaibuses loitopolooritai ameun kageunet, Ŋes aiboisiwok nakalaunan.

¹³ Wu EJAKAIT, amun naka Isirael, Lukinyeinete ijo kere irumete rwaru ileic; Lukenyounete kere kaneijai iwadikao toma alup, Naarai enyeis EJAKAIT, Atan naka akipi nukajarak.

¹⁴Kitaŋaleunoi, wu EJAKAIT, ido aŋaleuni; Kitajarai, ido etajaruun; Naarai ijo ekaituritono.

¹⁵ Koany, kabalas ebe, “Ai ca ejai akirot naka EJAKAIT? Kobu cabo!”

¹⁶Eoŋ da mam abu kesunyak ainyein araun ekecokon atupit jo; Mam abu kemiela apaaran naka epola; Ijeni ijo; Nualomunete kaitukuka ajaenenas akonyenekon.

¹⁷Sirikirau loketasuro kamaka: Ijo neekerianarakan kapaaran naka aronis.

¹⁸Kirumata ileic lukareito, Konye eoŋ kenyeis ileic airum; Koburut kes, Konye eoŋ kenyek aburun: Kitodolik kes apaaran naka aronis; Komudia kes kamudiar naka airucakin!

¹⁹Kabala EJAKAIT eoŋ kwanata ebe: “Kolot, kobwo korute loka idwe luka ituŋa, neelomununiata ikabakan luka Yuda neelomanariata da, korutei kere luka Yerusalem.

²⁰ Kolimok kes ebe: Kiirasi yesi akirot naka EJAKAIT, yes ikabakan luka Yuda, ka Yuda kere, ka luiboiete kere koYerusalem, luelomununete korutei kalu.

²¹ Ebala EJAKAIT kwanata ebe: Kocoito bonik, siribwokenenete lubwokon kapaaran naka asabato, karaida aitolomun korutei luka Yerusalem.

²² Ido siribwokenenete lubwokon aitolomun kotogoikus kapaaran naka asabato, sirikiswamata adioswam kere: konye kitalaut apaaran nakasabato, kwape kecorakinitor lukapapaakus.

²³Konye mam kes apotu kiirasi, karaida aitoikin akiikec, konye kitininikata imurisiŋakec, kinyeis akiirar, kinyeis da aituutoorio.

²⁴“Kosodi kanen, ebala EJAKAIT ebe, Arai idunyakinito akiiranar eoŋ, komam itolomununete lubwokon kere korutei luka ere kala kapaaran nakasabato, konye italaunete apaaran nakasabato, komam iswamaete adioswam kere kapaaran kaŋin,

²⁵ ŋes konyet elomununiata korutei luka ere kalo ikabakan ka ikapolok luiboikinos oicoloŋ loka Daudi, ibwanenito agalin ka ibalasin, kes ka ikapolokokec, ituŋa luka Yuda, ka luiboiete da ko Yerusalem: ejaenena ere lo ikar kere.

²⁶ Epote kesi koreria luka Yuda, kaiboisio da nuirimorito Yerusalem, kakwap naka Benyamin, kapuutona, koroŋan, ka Eŋalakimak da, eyaunete ainakineta nuicweio, ka asuban ka ainakineta nuka akiria, ka lukisupurununo, ido eyaunete asuban nuka aimal, togo loka EJAKAIT.

²⁷ Konye arai kiŋeroto akiirar eoŋ komam italaunete apaaran nakasabato, ibwokete da lubwokon ilomunete korutei luka Yerusalem kapaaran nakasabato; kasodi eoŋ ainokokin akim koruteike, epiari da itogoi lukapolou luka Yerusalem, komam ituduŋeori.”