Read Ateso Yeremia 2 Bible Online

Yeremia 2 - Ateso bible

Yeremia 2

¹Kosodi kobu akirot naka EJAKAIT mama ajai, kobala ebe,

² “Kolot, kiworo kaki nuka Yerusalem kiner atiar, Ebala EJAKAIT kwanata ebe, Eitunit asianut naka eiditeukon, Aminakon naka ateran; Kwape kiitupitotor eoŋ kotoma amodiŋ, Toma akwap namam eyeikinio ikinyom.

³ Kerai Isirael lokalaunan mama ejai EJAKAIT, Araito nugeet nuka aidwenyike: Kere luanyamenenete kes itelekarito akiro; Ebala EJAKAIT ebe, Ebunokini kes aronis.”

⁴Kopuputu yesi akirot naka EJAKAIT, ijo ekek loka Yakob, ka ajena kere nuka ekek loka Isirael.

⁵ Ebala EJAKAIT kwanata ebe, “Anyoika numam adolit nuapotu lukapapaakus kodumut kotamakan, Tape ebwataros neelwana kamakaŋ, Kotupito aamameak, koraunos lukaamameak?

⁶Mam apotu kobalas ebe, ‘Ali bo EJAKAIT Lokitolomuni oni kakwap nako Misiri; Lokiŋarenikini oni kotoma ais, Akwap naka amodiŋo ka apanya, Akwap naka akure ka etoribe loka atwanare, Akwap neamamei yenitori, namam iboikin ituŋanan?’

⁷Ketolom yes akwap napusuk, Anyamenen araitoke, ka ajokisike: Konye nailomuniata itisiloto akwapuka, Kitaraut airumeteka naketal.

⁸ Mam isasedotin apotu kobalas ebe, ‘Ali bo EJAKAIT?’ Ŋul luitiŋitos ikisila mam apotu kajenut eoŋ: Kodiakasi da ikayaitok kamakaŋ, Kodwarete inabin kolimitos Baal, Kotupitos da akiro numam ameda.

⁹ “Kanuka ŋun ebala EJAKAIT ebe, Ŋes kipurio kayes, Ido apurokini idwe luka ikusidwe.

¹⁰Naarai kotuboros yesi kapujana nuka Kitim, koanyut; Kijukasi Kedar, kokukuranaros aomoom; Koanyut arai ajai lem akirot naikoni nen.

¹¹ Ejai tope ateker naelocoki idekesioke, Lumam eraas idekesio? Konye elocokis ikatuŋa aibusesukec Kanuka yenimam ameda.

¹²Ebala EJAKAIT ebe, Koumok ŋun, ijo akui, Kokurianar noi noi, kosilior lio.

¹³ Naarai eswamata ikatuŋa nukaronok aarei; Kajalata eoŋ ekicoi loka akipi nukajarak.

¹⁴“Erai kereka Isirael ebulesit? Erai kereka ŋesi ebulesit loeurikinio ore? Kanukinyo araunor imejat?

¹⁵Agatakis ŋes iŋarunyo ludidik, ikunas noi; Amunaasi akwapuke; Ecwei ireriake, emamei yeniboie kotoma.

¹⁶Abelata idwe luka Nop ka Tapanes esiadukukon.

¹⁷Mam kereka jo isudunyikinit ŋun, Naarai ibu kojal EJAKAIT Ekonideke, Nakiŋarenikinitor korot?

¹⁸ Kwana da ikwaikini ai korot loelosi Misiri, Aimat akipi nuka Sikor? Ido da ikwaikini ai korot loelosi Asuria; Aimat akipi nuka Ecor?

¹⁹ Ebala EJAKAIT, EJAKAIT loka ajoresio ebe, Aronisikon ŋes kilecori, Aboŋonorikon kau ŋes kiretakini jo: Aso do kojen koany da ebe erai akirot naerono ido naedwar, Ijo aijal EJAKAIT Ekonideke, Emamei da ayoŋit eoŋ tomakon.

²⁰“Naarai koloŋo abilibil ajookotokon, aŋedeŋed aenetakon; Kosodi atemar atiar, ‘Mam kejaanakini,’ Ibu kirapanakin kaŋoliukot loemukurur, Ido kwap kaŋolikitoi loepesit, kwape naadote.

²¹ Kwabo abu kolo kera jo emusabibu lokajokan, Ekinyomit loetenit cut: Kikwaikini ai iraun kamaka ekiot loemunauna Loka emusabibu lokais?

²² Naarai ebala EJAKAIT Edeke ebe, Karaida iloŋi kesoda, Itwasamai asabunyun nuipu, Konye emasikinito numam adolitekon kakonyeneka.

²³ Ikwaikini ai jo inera ebe, ‘Mam eoŋ emunauna, Mam atupenenei Ibaalin?’ Koany ekonirot kaditot, kojen nuiswamat: Isubit bala akaala naiiriai korotinike;

²⁴Atuko naenaikinit amodiŋ, Naesupi ekwam kotoma oimielike; Toma apakike iŋai bo epedori aisibelokin ŋes? Ŋul kere luemootos ŋes mam itapasitos; Edumunete ŋes kolapake.

²⁵Kimik akonikeje kinyeis ajaut komameete amuk, Kinyek elogorotokon da aonore akure: Konye ibu kiner ebe, ‘Emamei amun: Mam; naarai abu kamin imo, atupakini kes.’

²⁶“Kwape irumiata ileic ekokolan naedumunere, Kwape kwaŋin irumiata ileic ekek loka Isirael; Kes, ikecekabakan, ka ikapolokokec, Ka isasedotinikec, ka inabinokec da;

²⁷ Luelimokinete apunure ebe, ‘Irai ijo papaka’; Amoru da ebe, ‘Ijo kiwuriei eoŋ’: Naarai ebelokis ipuranakec mamakaŋ, Kwabo mere akonyenekec: Konye kapak naka icanikec ebalas ebe, ‘Konyou, kitajarai!’

²⁸ Konye alu bo idekesio lukisubuni? Konyoutu bo kesi, Arai epedorete aitajar jo kapak naka icanikon: Naarai kwape imwatatar ireriakon, Imwaasi kwaŋin ikonidekesio, ijo Yuda.

²⁹Ebala EJAKAIT ebe, Kanukinyo kirurumakinitotor eoŋ? Ipotu kere kodiakasi kamakaŋ.

³⁰ Adany ikusidwe taai; Mam edumunito alecorio: Ajwenya ekusikileŋ ikusinabin, Kwape eŋatuny loemudiari.

³¹Ijo atur, koanyutu yesi akirot naka EJAKAIT. Abu kereka karau ais kama ejai Isirael? Karau akwap naka amuton naijesi ŋaŋ? Kanukinyo ineratar ikatuŋa ebe, ‘Kijakakai; Mam bobo kibuni mamakon’?

³² Epedori kereka apese aimurwokin lukisiroke, Arai ateran inapeneke? Konye ikatuŋa kemurwokis eoŋ Apaarasia numam imarunos.

³³“Itemonokini ca ma ijo ekonirot amoot ipailon! Tape isisianakin aŋor nueroko ikonirotin.

³⁴ Ido edumuna kenapenekon aokot nuka aijar naka lukican luemameete akirot: Mam idumunito epakapakaete, Konye kaŋun kere

³⁵ Ibu kiner ebe, ‘Emamei eoŋ akirot; Abeit ebelokin akenyunyura kamakaŋ.’ Koany, katubokini jo akiro, Naarai inera ebe, ‘Mam eoŋ adiakit.’

³⁶ Kanukinyo irimio ijo noi kwaŋin ailocoloc ekonirot? Misiri da kisurumi jo ileic, Kwape kisurumia Asuria jo ileic.

³⁷ Inyouni kamakeŋ da ibwokit akaninikon kakou: Naarai aŋer EJAKAIT luimunokina, Mam ikerianari kamakec.”