Read Ateso Yeremia 20 Bible Online

Yeremia 20 - Ateso bible

Yeremia 20

¹ Abu Pasur esasedoti, okoku loka Imer, loarai ekapolokiton lokapolon kotogo loka EJAKAIT, kopup Yeremia edwari akiro ŋun.

²Kosodi Pasur aile Yeremia enabi, kibwaik ŋes oloit loejai orute lomukur loka Benyamin, loajai togo loka EJAKAIT.

³Kosodi kanen kapaaran naatupakini, kitolom Pasur Yeremia koloit. Kosodi Yeremia atemar ŋes atiar, “Mam EJAKAIT kimaikinit ekonikiror Pasur, konye Etasuro kowaitin kere.

⁴ Naarai ebala EJAKAIT kwanata ebe: Koany, etaraun jo etasuro kamakon elopet, ido kama ejaas ipaperokon kere. Ibiroros kekileŋ loka lukasurupokec, eanyunete da akonyekon. Ainakini Yuda kere akan naka ekabaka loko Babulon; ijoreori kes Babulon, eari kes kekileŋ.

⁵ Bobo da, ainakini abar kere naka ere kalo, ka amedake kere, ka iboroke kere luka akais nuipu, eebo, abar kere naka ikabakan luka Yuda ainakini akan naka lukasurupokec, lueŋatarete kes, ikamunete kes, eyaŋaarete Babulon.

⁶ Kajo da, Pasur, ka luiboiete kere kotogokon kiioreorio: idolokini Babulon; itwanikini ŋina, kidaikinio ŋina, ijo ka ipaperokon kere, luidwarak nukaiŋal.”

⁷ Wu EJAKAIT, ibu kijodijod eoŋ, kejodijodoor; Itelekari eoŋ kagogoŋ, kipiko. Araun eoŋ akienis aitiwaria akwap; Kesekeli ŋinituŋanan.

⁸ Naarai napenerar, amonyi; Eworoi ebe, “Akaje ka aŋatar!” Naarai arau akirot naka EJAKAIT amorosit kamakaŋ, Ido akienis, aitiwaria akwap.

⁹ Arai katema atiar, “Mam alimit ŋes, Karaida einer bobo kokirorike,” Aso ejai otauka bala akim naenoki Naegolokinitoi akojoka, Eoŋ da kapas aitikokinit, kwabo mam apedori.

¹⁰ Naarai eira aiŋuŋua naka kaluipu. Etasuro kowaitin kere! Ebalasi ipapero lukodicika kere, Luidarito eoŋ aibiror ebe, “Koluikisi, sio da kiluikini ŋes! Elemuni ijodijodoor, Oni da kipikori, ido kinyaŋi.”

¹¹ Konye ejai EJAKAIT keoŋ kwape ekajiot lokaŋosibib: Ŋes iguikinotor lukareito, Kwabo mam kepikorete. Isurumio noi ileic, naarai mam eswamatos nukacoa. Aitisiliokec namam edaun mam imurwokinio.

¹² Konye, wu EJAKAIT loka ajoresio, loitemi ikadoliton, Aanyun iŋereteny ka etau, Kaany cani ainyanakon kamakec; Naarai kapukoki jo akakirot.

¹³ Koyeikis EJAKAIT; Kituroto EJAKAIT! Naarai ayuu aijar naka ŋin kayenilwaritoi Kakanin nuka ikeswamak nueroko.

¹⁴ Kikenoi apaaran nakawurunere! Apaaran nakawuria totoka kinyek aisirereŋio!

¹⁵Kikenoi etuŋanan loainuni papaka akiro ebe, “Kiwurikin ikoku yenitelepat,” Kisiyalamik ŋes noi.

¹⁶ Korau etuŋanan ŋol kwape ireria lukapolok Luatiyaiki EJAKAIT, komam itimi; Kiira aimony tupuruc, Ka elala kidiŋ paaran;

¹⁷ Naarai mam abu kaar ameun kakoik; Kwaŋin tikeraun totoka akailit, Akekoik da tikeraun naepol apaarasia kere.

¹⁸ Kanuka inyo kalomunia kakoik Adumun aitaaritoi ka ican, Amunaunos akapaarasia kanuka ileic?