Read Ateso Yeremia 22 Bible Online

Yeremia 22 - Ateso bible

Yeremia 22

¹Inera EJAKAIT kwanata ebe: “Kijesar togo loka ekabaka loka Yuda, kiner kaŋina akirot na,

²kolimok ebe, ‘Kiira akirot naka EJAKAIT, ijo ekabaka loka Yuda, loiboie koicoloŋ loka Daudi, ijo ka ikonikejaanakinak ka ikonituŋa da luelomununete orutei lu.’

³ Inera EJAKAIT kwanata ebe: Kitodolenenete etube ka adolit, koyuutu iŋatara kakan naka ekareiton. Sirikireata, sirikiswamakis imoit, ka ikoki, ka apuserut, nukepali, sirikibukosi aokot numam akirot kaibois kana.

⁴ Naarai arai teni kiswamata akirot ŋin, kwaŋin elomuniata korutei luka etogo kalo ikabakan luiboiete koicoloŋ loka Daudi, ibwanenito agalin ka ibalasin, kes, ka ikecekejaanakinak, ka ikecetuŋa da.

⁵ Konye arai mam iirarete akiro ŋun, ebala EJAKAIT ebe, Eyapoikin elopet ebe, esilior etogo lo.

⁶ Naarai inera kwanata EJAKAIT nuka ekek loka ekabaka loka Yuda ebe: “Isubit ijo bala Gilead kamakaŋ, Aidia naka Lebanon: Ateni ketuluori jo amodiŋ, Ka ireria luemameete ituŋa.

⁷ Ido kesikapanakini ikamudiarak asurokin jo, Ŋolituŋanan ka lujiisike: Kijepakinete iresiakon luseuna, Kocakanakinete akim.”

⁸ Itorete da atekerin nuipu ore lo, etemanaros atiar, “Kanukinyo kiswamakinia EJAKAIT kwana ere lo loepol?”

⁹ Kosodete aboŋokin ebe, “Naarai apotu kojalata aitutuket naka EJAKAIT Edekekec, komaata idekesio lumo, kijaanakis da.”

¹⁰ Sirikimonya ikatwan, kwabo sirikikuudianata: Konye komonyata noi loipidipiditere; Naarai mam eboŋuni bobo, Karaida aanyun akwap nakobukec.

¹¹ Naarai inera kwanata EJAKAIT nuka Salum okoku loka Yosia, ekabaka loka Yuda, loerumit aibois naka Yosia papake, loanyouni kaibois kana ebe: “Mam bobo eboŋuni nee.

¹²Nabarai ŋipeŋina neijoreoritai ŋes etwanikini, kwabo mam bobo eanyuni akwap na.”

¹³ “Itukwi ŋol loeduki eketogo kairod, Ka agolaike nukokuju kanumam ebeito; Loitubusiani ikeidunyet tai, Komam eropi ŋes:

¹⁴Loebala ebe, ‘Mere kaduk etogo loelal, Ka agolai nukokuju nuepolok’, Kosodi apedonokin adirisan; Kigalio eswi kakito nuka eres, Kinyonyo aitereŋ.

¹⁵ Irumi bo, naarai ikoto aitelekar keres? Mam kereka papakon arai ekanyaman ka ekamatan, Ekatubon loitenara lokabeit? Kwaŋin kojau ejok.

¹⁶ Kotubenenei ŋesi akiro nuka lukican ka luilwaritos, Kwaŋin kojau ejok. Ebala EJAKAIT ebe, Mere kereka ŋin ŋes ajenun eoŋ?

¹⁷ Konye akonikonye ka ekonitau mere kwaŋin, Dimarai aswam nukaiŋobel, Ka abukor aokot numam akirot, Ka areit, ka akaje da.”

¹⁸ Aso inera kwanata EJAKAIT nuka Yekoiakim okoku loka Yosia, ekabaka loka Yuda ebe: “Mam ekuudianete ŋes ebe, ‘Wu okwe onaceka!’ arai bo ‘Wu okwe inac!’ Mam ekuudianete ŋes ebe, ‘Wu okwe Ejakait!’ arai ‘Wu okwe aibusesuke!’

¹⁹ Idaio kwape idaere asigiria, Kiriitete acakar kiŋa kirutei luka Yerusalem,”

²⁰“Kodoka Lebanon, komony; Kikesea eporotokon koBasan: Komony kotoma Abarim; Naarai amudiaros ipaelonokon kere.

²¹ Abu kener kajo nakisikerianere; Konye ibu ijo kobala ebe, ‘Mam eirari.’ Ŋol ŋes eponekon ageun keiditeukon, Mam irimarit ekaporoto.

²² Edaki ekwam ikecokokokon kere, Ipaelonokon da ijoreorio: Kosodi ateni kirumete ileic, Itirirai kanuka aronisikon kere.

²³ Ijo loiboie koLebanon, Loiduki kaikon oresia, Itukwi ijo nakibunokinia ariebo, Aikilianar kwape naka aberu naidouni!”

²⁴ Ebala EJAKAIT ebe, “Kwape ajaria, karaida kerai Konia okoku loka Yekoiakim, ekabaka loka Yuda, egilut lokapolou kakanika nakoteten, ti kautoo jo;

²⁵ ido ejaikini jo akan naka ŋul kaluemoete akoniijar, akan da naka ŋul kaluiyoŋit, ŋes akan naka Nebukadaresar ekabaka loko Babulon, kakan da naka Ikaludean.

²⁶ Kacakari eoŋ da jo, ka totokon nakiiwuriei, ape akwap ace namam kiwurikinitai; itwakikinete ŋina.

²⁷Konye toma akwap naimielas ikecetauon aboŋun, mam eboŋunete cut.”

²⁸ Erai kereka ekesa ŋol Konia amot naemenitai naebwaŋaŋ? Erai kereka ŋesi amot namam isiyalamikinitai? Kanukinyo ereŋearere, ŋes ka akeur, Acakar akwap namam ejenete?

²⁹Wu jo, akwap, akwap, akwap, Kiira akirot naka EJAKAIT!

³⁰Inera EJAKAIT kwanata ebe: “Kiwadikata etuŋanan lo ebe loemameete idwe, Etuŋanan lomam isikerianio apaarasiake kere: Naarai emamei etuŋanan loka aurike loisikerianio, Aiboikin oicoloŋ loka Daudi, Karaida ayait bobo Yuda.”