Read Ateso Yeremia 23 Bible Online

Yeremia 23 - Ateso bible

Yeremia 23

¹ Ebala EJAKAIT ebe, “Itukwi ikecokok luemudiarete, luisiarakinete amerekekin nukoronyika!”

² Kanuka ŋun ŋes inerar kwanata EJAKAIT, Edeke loka Isirael, nuka ikecokok luitanyamete ikatuŋa ebe: “Isiarisiarata yesi ekasipan, ireŋeata, komam ianyanarete kes; koany, ebala EJAKAIT ebe, Edopei kamakus aronis naka aswamisiokus.

³ Atukonokini eoŋ da aatoŋot naka esipanika kotoma akwapin kere nukereŋearit, enyakuni bobo aujoikec; kes da ewuriaros iyatanakinos.

⁴Adakakini eoŋ ikecokok luitanyamete kes. Ebala EJAKAIT ebe, Ido mam eyoŋete bobo, karaida aiyaloŋoŋ, karaida idiopet kakesi aolior.

⁵ “Koany, ebala EJAKAIT ebe, Eponito apaarasia, nuetilibikinia rwaru Daudi Atenu naedolit, ido kirumite kwape ekabaka, kokeriana, ido ipiori itubesia kabeit kotoma akwapin.

⁶ Eyuunio Yuda kotoma apaarasiake, Isirael da iboienenei kainapakina. Emaikinio rwaru ŋes ekiror lo ebe, ‘EJAKAIT ŋes adolitewok.’

⁷“Aso do koany, ebala EJAKAIT ebe, Ŋes eponitotor apaarasia numam bobo ebalananatar ebe, ‘Kwape ejaria EJAKAIT lokolo etolomuni idwe luka Isirael kakwap nako Misiri’;

⁸ konye ebe, ‘Kwape ejaria EJAKAIT lokolo etolomuni kiŋarenik da aur naka ekek loka Isirael akwap naka ari naka agolitomei; ido anyoun kakwapin da kere nuabu kereŋeanarite kes.’ Kosodete aiboikin akwapukec obe.”

⁹ Nuka inabin: “Abila ekatau kotomaka, Ejanijaŋunos akakojo kere; Asub bala ekameran, Ido bala etuŋanan loeniaut ajon; Kanuka EJAKAIT, ido kanuka akekiro nukalaunak.

¹⁰ Naarai elelebun adoteu akwap; Naarai kanuka ekenit ibworo akwap; Aokoto ironyia luka amodiŋ, Erono ekecerot, Akecegogoŋ da mam ejok.

¹¹ Naarai amunaunos enabi ka esasedoti; Ebala EJAKAIT ebe, Eebo, adum aronisikec kiton togoka da.

¹²Kanuka ŋun eraun ekecerot kamakec bala aiboisio nuerurut kamuton; Emeario, ibirokinos nen: Naarai ebala EJAKAIT ebe, Ayauni aronis mamakec, Okaru loka aiticaniokec.

¹³ Aany eoŋ da abaŋaanut naka inabin luko Samaria; Adwarata kama ejai Baal, Aitapaar ikatuŋa Isirael.

¹⁴ Konabin luka Yerusalem da aany akirot nasogim; Edoteete, kolosenenete kaiŋal, Itogogoŋete akanin nuka ikeswamak aronis, Komamei yeninyeini aronisike: Esubito kes kere kamakaŋ bala Sodom, Ka luiboiete kanen bala Gomora.”

¹⁵Kanuka ŋun ŋes inerar kwanata EJAKAIT loka ajoresio nuka inabin ebe: “Koany, etanyami kes aliasit naeta ria, Etamasi da kes akipi nuka epiu: Naarai kotoma onabin luka Yerusalem Alom amunaar akwap kere.”

¹⁶ Inera kwanata EJAKAIT loka ajoresio ebe: “Sirikiirasi akiro nuka inabin kaluedwarete; isisianakinete yes aamameak: inerasi nuepote kotauonokec, kwabo mere nuepote kaituk naka EJAKAIT.

¹⁷ Elimonokinete tiritir ŋul luemwanito akirot naka EJAKAIT ebe, ‘Ijaunos ejok’; kolimonokinete ŋin yenelosi kaninik naka etauke ebe, ‘Mam aronis kidoikini jo.’

¹⁸ Naarai iŋai kakesi kebwoi kaurianet naka EJAKAIT, Yenikeanyuni kiira da akekirot? Iŋai bo yenikecoit akekirot kiira?

¹⁹ Koany, etapipirio loka EJAKAIT alomu! Adedeŋ, eebo etapipirio loipiripiritoi: Edoikini akou naka ikaronon.

²⁰ Mam eboŋuni anyunyura naka EJAKAIT: Aitodol neadaunia akeswam, Kiton aitodolikin nuelosikinit eketau, Apaarasia nukawasia ijenunete jokan.

²¹“Mam abu kejuka inabin lu, Konye apotu kesi kokerata: Mam abu kener kakes, Konye apotu kodwarata.

²²Arai kesi kobwoito kaurianeteka, Tiisiirarito ikatuŋa akiroka, Tiisibelikinito kotoma orotinikec lueroko, Ka aswamisiokec da nueroko.

²³ “Ebala EJAKAIT ebe, Arai kereka eoŋ Edeke lokodie, kwabo mam arai Edeke loelwana?.

²⁴ Ebala EJAKAIT ebe, Epedori kereka ituŋanan aiŋop kotoma aiboisio nukaiyeiyea komam eoŋ apedori aanyun? Ebala EJAKAIT ebe, Mam tope eoŋ eleleba akui ka akwap?

²⁵ Eira nueneras inabin luedwarete nukaiŋal kokirorika ebe, ‘Eruja, eruja!’

²⁶Itodolete ai ŋun ajaut otauon luka inabin luedwarete nukaiŋal; kiton inabin luedwarete aiŋal naka itauonokec?

²⁷ Luelosikinito aisimurwokin ikatuŋa ekakiror kanuka airujasiakec nuelimonokini ŋinituŋanan ekeidunyet, kwape kimurwokiniata lukapapaakec ekakiror kanuka Baal.

²⁸ Enabi loerujai, mere kolimok airujasit; ka ŋin da yenika akakirot, kinera akakirot teni. Ebala EJAKAIT ebe, Ikwaikinete ai agugu eriakakinos alos?

²⁹Ebala EJAKAIT ebe, Mere esubit akakirot akim? Ido bala anyul naebwaŋabwaŋai amor?

³⁰ Ebala EJAKAIT ebe, Aso koany, asurokini inabin, luekokoanakinos akakiro.

³¹Ebala EJAKAIT ebe, Asurokini inabin, luitwasamaete aŋajepakec kobalas ebe, ‘Ebala EJAKAIT ebe’.

³² Koany, ebala EJAKAIT ebe, asurokini ŋul luedwarete airujasia nukaiŋal, aitatamanakin, aitapaar ikatuŋa kanuka aiŋalakec, kanuka ailabilabanutukec naatai, kwabo mam eoŋ ejukarit kes, karaida aicorakin, Ebala EJAKAIT ebe, mam eyaunete adiojokis otuŋa lu.

³³ “Nakiŋisiata jo ituŋa lu, arai enabi, arai esasedoti kineras ebe, ‘Anyoin abwokon naka EJAKAIT?’ kosodi ijo ilimokini kes ebe, ‘Abwokon ani? Ebala EJAKAIT ebe, Kacakari yes.’

³⁴Konye enabi ka esasedoti ka ituŋa luetemarete ebe, ‘Abwokon naka EJAKAIT,’ eticani eoŋ etuŋanan ŋol ka ekekal.

³⁵Itemanaros ŋinituŋanan kikeidunyet, ka ŋinituŋanan konaceke atiar, ‘Biai bo aboŋoki EJAKAIT?’ ido ‘Biai bo atema EJAKAIT?’

³⁶ Mam bobo ilimunete nuka ‘abwokon naka EJAKAIT’: naarai abwokon ŋes akirot naka ŋinituŋanan ilopet; naarai itirioto akiro nuka Edeke lokajaran, nuka EJAKAIT loka ajoresio, Edekewok.

³⁷Ilimokini kwanata enabi ebe, ‘Biai bo kiboŋok EJAKAIT?’ ido ‘Biai bo atema EJAKAIT?’

³⁸Konye arai itemarete atiar, ‘Abwokon naka EJAKAIT’; kanuka ŋun ŋes inerar EJAKAIT kwanata ebe, ‘Naarai inerasi akirot na ebe, “Abwokon naka EJAKAIT”, ido kejukak yes ebe, “Siribalas, Abwokon naka EJAKAIT.”

³⁹ Aso do koany, abeit kekeuni yes, kacakari yes, ka ere da loabu kainak yes ka lukapapaakus, aolior kama ajai.

⁴⁰ Ido kainuni yes amorosit namam edaun ka ileic lumam enaŋete, lumam imurwokinio.’ ”