Read Ateso Yeremia 25 Bible Online

Yeremia 25 - Ateso bible

Yeremia 25

¹ Akirot naabu kobu mama ejai Yeremia nuka ituŋa kere luka Yuda, kokaru lokiwoŋonet loka Yekoiakim okoku loka Yosia, ekabaka loka Yuda: ekaru ŋol ŋes ekaru losodit loka Nebukadaresar ekabaka loko Babulon;

²naalimokini enabi Yeremia ituŋa kere luka Yuda, ka ŋul kere luiboiete koYerusalem kobala ebe:

³ “Ageun kokaru lokitomonet kauni loka Yosia okoku loka Amon, ekabaka loka Yuda, kiton lolo, ikar lu akaisaarei ka luuni, kobunenenei akirot naka EJAKAIT mama ajai, kenerenena kayes, adilonokini tupuruc einer, konye mam yes ipotu kopuput.

⁴ Ido abu EJAKAIT kijukanakini yes ikekejaanakinak kere inabin, edilonokini tupuruc aijukunun; konye yes mam ipotu kopuput, karaida aitoikin akiikus akiirar.

⁵ Ebala ebe, ‘Koboŋutu kinye ŋinituŋanan ekerot loerono, ka aronis naka aswamisiokus, kiboikinos akwap nakiinakinit EJAKAIT yes ka lukapapaakus, ageun apeŋo aitodol ikar kere;

⁶ido siritupanarete idekesio ice aijaanakin ka aima kes, sirikitunyunyuranakis eoŋ kaswamisio nuka akaninikus. Eoŋ da mam keswamakini yes aronis.’

⁷ Ebala EJAKAIT ebe, Konye mam ipotu kopuput eoŋ; kitunyunyurikis kaswamisio nuka akaninikus aiswamakin bonik aronis.

⁸“Kanuka ŋun ŋes inerar kwanata EJAKAIT loka ajoresio ebe: Naarai mam ipotu kopuput akakiro,

⁹ ebala EJAKAIT ebe, Koany, ejukari aomare ikekia kere luka ari naka agolitomei, ka Nebukadaresar ekabaka loko Babulon, ekakejaanakinan, kayau kes aitiji akwap na, ka ŋul da luiboiete kotoma, ka atekerin nu kere nuirimorito; ido amudiari cut, ketuluo kes aumokinet, aimuaret, asilio da namam edaun.

¹⁰ Ido bobo, alemari kamakec eporoto lokaiyalama ka eporoto lokailel, eporoto loka eteran ka eporoto da loka ateran, aruo naka akaŋas, ka aica naka atala.

¹¹ Itisilio akwap na kere, eraun aumokinet; ijaanakinete da atekerin nu ekabaka loko Babulon ikar akaisakanykaarei.

¹² Kosodi kanen, ebala EJAKAIT ebe, Kedaunos ikar akaisakanykaarei, kasodi eticani eoŋ ekabaka loko Babulon, ka ateker ŋin, ka akwap naka Ikaludean, kanuka numam adolitekec, ido etisili ikar kere.

¹³Ido ayauni kakwap ŋin akakiro kere nuabu kenerite, kere nuewadikatai oitabo lo, loadwari Yeremia mama ejaas atekerin kere.

¹⁴ Naarai atekerin nuipu ka ikabakan lukapolok itubusianete kes, eebo, kes da ba; atacakini kwape ejaatar aswamisiokec, ido kwape ejaar aswam naka akaninikec.”

¹⁵ Naarai kabala kwanata EJAKAIT, Edeke loka Isirael ebe: “Kolem adere na naka ebino loka adedeŋ kakanika, kitamat atekerin kere nukejukari jo.

¹⁶ Emasete, igetanaros, ikerepikinete kanuka ekileŋ loejukari mamakec.”

¹⁷Kasodi alemun adere kakan naka EJAKAIT, ketamat atekerin kere nukejukari EJAKAIT eoŋ:

¹⁸ ebe Yerusalem ka ireria luka Yuda, ka ikabakanakec, ka ikapolokokec, aituluor asilio, aumokinet, aimuaret, ka ekenit; kwape ejaar lolo;

¹⁹ Parao ekabaka loko Misiri ka ikekejaanakinak, ka ikapolokoke, ka iketuŋa kere;

²⁰ ka ituŋa kere luinyalinyala, ka ikabakan kere luka akwap naka Us, ka ikabakan kere luka akwap naka Ipilisitian (Asukelon, ka Gasa, ka Ekuron, ka luapiaŋunos luka Asudod);

²¹Edom, ka Moab, ka idwe luka Amon;

²²ka ikabakan kere luka Turo, ka ikabakan kere luka Sidon, ka ikabakan luka apujan naejai okekwa juwai aŋolol;

²³Dedan ka Tema, ka Bus, ka ituŋa kere luebarenete arokio;

²⁴ ikabakan kere luka Arabia, ka ikabakan kere luka ituŋa luinyalinyala luiboiete kamodiŋ;

²⁵ikabakan kere luka Simiri, ka ikabakan kere luka Elam, ka ikabakan kere luka Imedin;

²⁶ ka ikabakan kere luka ari naka agolitomei, luelwaka ka lueapiete, ameanakin; ka ajakanuto kere nuka akwapin, nuejaas akwap. Akaulokec emasi do ekabaka loka Sesak.

²⁷ “Ilimokini kes ebe, ‘Inera kwanata EJAKAIT loka ajoresio, Edeke loka Isirael ebe: Komata, komerikinos, koleka, kibironoros, mam bobo inyounete, kanuka ekileŋ loejukuni mamakus.’

²⁸“Kosodi arai keŋeroto aijaar adere kakanikon aimat, kosodi ilimokini kes ebe, ‘Inera EJAKAIT loka ajoresio kwanata ebe: Kibusakinit yes aimat!

²⁹ Naarai koany, ageuni eoŋ aswam aronis kore loemaikinitai ekakiror, yes da mam kiticanio? Ebala EJAKAIT ebe, Mam iswakete aiticanio: naarai anyarakini ekileŋ asurokin kere luiboiete kakwap.’

³⁰ “Ijo da kodwarak kes akiro nu kere, kolimok ebe: ‘Irurumai EJAKAIT kokuju, Ikeseuni ekeporoto kaiboisike nakalaunan; Irurumakini aujoke kagogoŋ; Ereseikini kere luiboiete kakwap, Bala ikepudapudak emusabibu.

³¹ Edoli ecelet kiton osaŋe loka akwap, Naarai epurete EJAKAIT katekerin; Etubokini luejaas awat kere, Ebala EJAKAIT ebe, Apiari lukaronok kekileŋ.’

³²“Inera kwanata EJAKAIT loka ajoresio ebe: Koany, elomuni aronis anyoun kateker kiton ateker, Itukutuni etapipirio loepol anyoun kosaŋeta luka akwap!

³³ “Ka ŋul da lueari EJAKAIT kapaaran kaŋin ikaikinos anyoun kosaŋe loka akwap kiton osaŋe ece loka akwap. Mam ekuudianio, karaida atukonokinio, karaida aidaio; eraunete aoret kakwap.

³⁴“Kibwololoto, yes ikecokok, komonyata; Kipunupunokinos kotoma okurwon, yes ikayaitok luka esipan: Naarai adolut cut apaarasia nuka aariokus, ka aisiarisiariokus, Yes da ibiroros bala ibore yenisiyalamikinitai.

³⁵Mam ikecokok edumunete erot lokereara, Karaida ikayaitok luka esipan neekuiata.

³⁶Eporoto loka aikalal naka ikecokok. Ka aibwolol naka ikayaitok luka esipan! Naarai amunaa EJAKAIT ekecerony.

³⁷ Esiliŋiŋii aujoi nuinapakina Kanuka anyunyura naededeŋ naka EJAKAIT.

³⁸Enyeki akeŋopis, kwape eŋatuny, Naarai araun akecekwap aumokinet Kanuka adedeŋ naka ekileŋ loereit, Ido kanuka anyunyurake naededeŋ.”