Read Ateso Yeremia 27 Bible Online

Yeremia 27 - Ateso bible

Yeremia 27

¹ Kageunet naka airum naka Sedekia okoku loka Yosia, ekabaka loka Yuda, kobu akirot na naka EJAKAIT mama ejai Yeremia.

² Kabala EJAKAIT kwanata ebe: “Kiswamau aunoi ka ajookon, koenik omurisiŋikon.

³Kijukak ace mama ejai ekabaka loka Edom, ka ekabaka loka Moab, ka ekabaka loka idwe luka Amon, ka ekabaka loka Turo, ka ekabaka loka Sidon, kakanin nuka ikiyakia luepote Yerusalem mama ejai Sedekia ekabaka loka Yuda.

⁴Kitetemik kes akiro nu ainar ikapolokokec kobala ebe: Inera kwanata EJAKAIT loka ajoresio, Edeke loka Isirael ebe: Ilimokinete lukapolokokus kwanata ebe:

⁵ Eoŋ abu kasub akwap, ka ituŋa, ka itiaŋ, luejaas akwap, kapedorika naepol ka akanika naerioro; ainakini eoŋ ŋin yenetojokit.

⁶ Kwana da ainak akwapin nu kere akan naka Nebukadaresar ekabaka loko Babulon, ekakejaanakinan; ainak da itiaŋ luka ais aijaanakin ŋes.

⁷ Atekerin da kere ijaanakinete ŋes ka okokuke, ka otataitike, aitodol needolioto apaarasia nuka akekwap: kosodete itubusianete ŋes atekerin nuipu ka ikabakan lukapolok.

⁸“Kosodi kanen, ateker arai ajakanut naeŋeri aijaanakin Nebukadanesar ŋol, ekabaka loko Babulon, ido lueŋerete aibwaikin imurisiŋakec ajookot naka ekabaka loko Babulon, ebala EJAKAIT ebe, Eticani ateker ŋin, kekileŋ, ka eteŋei, ka atular, aitodol neesimudiaria ŋes kes.

⁹ Konye yes, sirikiirasi inabinokus, karaida ikaroakakus, karaida airujasiakus, karaida ikadwarakakus, karaida ikacudakakus, lukilimokinete ebe, ‘Mam ijaanakinete ekabaka loko Babulon.’

¹⁰Naarai kidwarakinete yes nukaiŋal, ayaŋaar yes naelwana kakwapukus; kasodi eoŋ aireŋear yes, ido iwoliorete.

¹¹Konye ateker naibwaikini emurisiŋike ajookot naka ekabaka loko Babulon, kijaanak, ebala EJAKAIT ebe, Enyeini ŋin aiboi kakwapukec: ido ekoriete iboikinos nen.”

¹² Kalimok Sedekia ekabaka loka Yuda akiro ŋun kere kwape ajaatar, kabala ebe: “Kibwaikis imurisiŋakus ajookot naka ekabaka loko Babulon, kijaanakis ŋes ka iketuŋa, tetere ijarete.

¹³ Kanukinyo ikototor atwakare, ijo ka ikonituŋa, kanuka ekileŋ, ka eteŋei, ka atular, kwape ineritor EJAKAIT nuka ateker naeŋeri aijaanakin ekabaka loko Babulon?

¹⁴ Kwabo sirikiirasi akiro nuka inabin luineras kayes ebe, ‘Mam ijaanakinete ekabaka loko Babulon.’ Naarai edwarete kesi nukaiŋal.

¹⁵Ebala EJAKAIT ebe, Naarai mam ejukununei kes, konye edwarete kokirorika aiŋal: tetere kereŋeari yes, ido iwoliorete yesi, ka inabin lukidwarakinete.”

¹⁶ Ido da alimokin isasedotin ka ituŋa lu kere ebe, “Inera EJAKAIT kwanata ebe: Sirikiirasi akiro nuka inabinokus lukidwarakinete, ebalas ebe, ‘Koany, iboro lukorogo loka EJAKAIT eapiete bobo ainyakunio koBabulon,’ naarai edwarete nukaiŋal.

¹⁷ Sirikiirasi kes; kijaanakis ekabaka loko Babulon, tetere ijarete, Inyo bo ti keraunor ere lo asilio?

¹⁸ Konye arai eraas inabin, ka akirot naka EJAKAIT da arai ejai kakes, kiŋaiŋaata kito kesi EJAKAIT loka ajoresio, kinyeis iboro luesalito kotogo loka EJAKAIT, kotogo da loka ekabaka loka Yuda, koYerusalem da ayaŋaario Babulon.

¹⁹ Naarai inera kwanata EJAKAIT loka ajoresio nuka ipirin, ka nuka aŋolol, ka nuka aicegeria, ido nuka luapiaŋunos luka iboro luesalito kore kalo,

²⁰ lumam iritonorit Nebukadanesar ekabaka loko Babulon, naejoreoria Yekonia okoku loka Yekoiakim ekabaka loka Yuda, alemar koYerusalem, koyaŋaa Babulon, ka ikapolok kere luka Yuda ka Yerusalem;

²¹ eebo, inera kwanata EJAKAIT loka ajoresio, Edeke loka Isirael, nuka iboro luapiaŋunos kotogo loka EJAKAIT, kotogo da loka ekabaka loka Yuda, koYerusalem da ebe:

²² Eyaŋaario Babulon, ido ebala EJAKAIT ebe, Ejaenenas ŋina, aitodol apaaran naaanyanaria kes, Kasodi alemuni enyakuni bobo aibois na.”