Read Ateso Yeremia 28 Bible Online

Yeremia 28 - Ateso bible

Yeremia 28

¹ Kosodi kanen, kokaru kaŋope kaŋol, kageunet naka airum naka Sedekia ekabaka loka Yuda, okaru lokiwoŋonet, olap lokikanyet, abu Kanania okoku loka Asur, enabi, lokerai loka Gibeon kiner keoŋ kotogo loka EJAKAIT, kojaas isasedotin ka ituŋa da kere nepenen, kobala ebe,

² “Inera kwanata EJAKAIT loka ajoresio, Edeke loka Isirael ebe: Abil eoŋ ajookot naka ekabaka loko Babulon.

³ Eriŋa cut edauna ikar iarei enyakuni bobo toma aibois na iboro kere lukotogo loka EJAKAIT, luabu Nebukaderesar ekabaka loko Babulon kolema kaibois kana kosodi ayaŋaar Babulon.

⁴Ido ebala EJAKAIT ebe, Enyakuni bobo toma aibois na Yekonia okoku loka Yekoiakim, ekabaka loka Yuda, ka ikijoreoritono kere luka Yuda, lualosito Babulon: naarai abili ajookot naka ekabaka loko Babulon.”

⁵Kosodi enabi Yeremia alimokin enabi Kanania kojaas isasedotin, kojaas da ituŋa kere ebwoete kotogo loka EJAKAIT.

⁶ Kiner enabi Yeremia ebe, “Kikote nepenen! Kikonak EJAKAIT kwaŋin: kitodol EJAKAIT akiro nuidwar, ainyakun bobo iboro lukotogo loka EJAKAIT, ka ŋul kere luejoreoritai, alemun koBabulon ayaun aibois na.

⁷Konye ca kiira akirot na naenera kopupi ijo, kopupete da ituŋa kere ebe,

⁸Inabin lukageikinete eoŋ ido lukigeikinete ijo kolo, kedwarenenete ejie, ka aronis, ka atular nueponikinete akwapin nuipu, ka ajakanuto nuepolok.

⁹ Enabi loedwari nuka ainapakin, kedol akirot naka enabi kaŋol, ŋes konyet ejenunere ebe, abeit EJAKAIT ejukunit enabi ŋol.”

¹⁰ Kosodi Kanania enabi, kolem akitoi komurisiŋ loka enabi Yeremia, kobil.

¹¹ Kiner Kanania kojaas ituŋa kere ebe, “Ebala EJAKAIT kwanata ebe: Abili kwaŋin ajookot naka Nebukadaresar ekabaka loko Babulon komurisiŋa luka atekerin kere eriŋa cut edauna ikar iarei.” Kosodi enabi Yeremia asuenyikin.

¹²Kosodi kedau enabi Kanania aibil akitoi komurisiŋ loka enabi Yeremia, kobu akirot naka EJAKAIT mama ejai Yeremia kobala ebe:

¹³“Kolot, kolimok Kanania ebe, ‘Inera EJAKAIT kwanata ebe, Ibila ijo ajookot naka akito; konye iswamauni do ajookon nuka asua aiboisikec.

¹⁴ Naarai inera kwanata EJAKAIT loka ajoresio, Edeke loka Isirael ebe: Ebwaik ajookot naka asua omurisiŋa luka atekerin kanu kere, kijaanakis Nebukadanesar ekabaka loko Babulon; ido ijaanakinete: ainak da itiaŋ luka ais.’ ”

¹⁵ Kosodi enabi Yeremia kotema enabi Kanania atiar, “Kiira kito, Kanania; mam EJAKAIT kiyakienenet: konye iinak ituŋa lu amunokina aiŋal.

¹⁶Ŋes ebalar EJAKAIT ebe: ‘Koany, kereŋeari jo kakwap: itwani kokaru kalo, naarai iner nuka epali mama ejai EJAKAIT.’ ”

¹⁷ Kosodi kotwana enabi Kanania kokaru kaŋol kolap kalokikanyetekaarei.