Read Ateso Yeremia 29 Bible Online

Yeremia 29 - Ateso bible

Yeremia 29

¹ Nu kes akiro nuka ebalua loabu enabi Yeremia kijuka ejai Yerusalem mama ejai aatoŋot naka imakio luejoreoro, ka isasedotin, ka inabin, ka ituŋa kere luejoreorit Nebukadaresar alemar koYerusalem ayaŋaar Babulon.

²Kedau Yekonia ekabaka, ka toto naka ekabaka, ka ibwacin, ka ikapolok luka Yuda ka Yerusalem, ka ikeswamak, ka ikatatak, anyoun koYerusalem.

³Kijuka ebalua kakan naka Elasa okoku loka Sapan, ka Gemaria okoku loka Kilikia, luabu Sedekia ekabaka loka Yuda kijuka Babulon mama ejai Nebukadaresar ekabaka loka Babulon, ebe:

⁴“Inera kwanata EJAKAIT loka ajoresio, Edeke loka Isirael mama ejaas luejoreoro kere, luainakin aijoreoreo anyoun koYerusalem ayaŋaar Babulon, ebe:

⁵Kodukoto itogoi, kiboienenete kanen; kiraata imanikoria, konyama araitokec.

⁶Komanya aŋor, kowuriata idwe lutelepai ka lupesur; komanyanakis odwekus aŋor, kokorenenete apesurukus adukonokinio, kowurienenete idwe lutelepai ka lupesur; kilelebunos ŋina kwabo mam iŋoŋaros.

⁷ Kokototor ere lokesijoreorit ainapakin, kilipakis kama ejai EJAKAIT: naarai kanuka ainapakinike ŋes idumuniata yesi da ainapakinikus.

⁸ Naarai inera kwanata EJAKAIT loka ajoresio. Edeke loka Isirael ebe: Kinyeis inabinokus, luejaas kayes, ka ikaroakakus aiŋal yes, kwabo sirikicamut airujasiakus nuirujaete.

⁹Naarai kidwarakinete nukaiŋal kokirorika: ebala EJAKAIT ebe, Mam keyakienenei kes.

¹⁰ “Naarai ebala EJAKAIT kwanata ebe: Kedau Babulon aitodolikinio ikar akaisakanykaarei, kaanyanari yes, ka aitodolikin akakirot naejok mamakus, ainyakun yes bobo aibois na.

¹¹Naarai ebala EJAKAIT ebe, Ajeni eoŋ aomisio nuaomit kanukus, aomisio nuka ainapakin, kwabo mere nueroko, ainakin yes amunokina nuepote.

¹² Iwoneete yesi da eoŋ, ilosete ailip eoŋ, ido eirari yes.

¹³ Yes da kimoete eoŋ, kianyunete; arai kito kiimoata kikusitauon kere.

¹⁴ Ebala EJAKAIT ebe, Kianyunete eoŋ; ebala EJAKAIT ebe, Ebelokini eoŋ aijoreoriokus, katukonokini yes alemun kotoma atekerin kere, ka aiboisio da kere, nukereŋearit, ido kenyakuni yes bobo toma aibois nakesijoreoria.

¹⁵“Naarai inerata ebe, Kitonyoik EJAKAIT inabin kotoma Babulon.

¹⁶Ŋes inerar kwanata EJAKAIT nuka ekabaka loiboie koicoloŋ loka Daudi, ka nuka ituŋa kere luejaas ore lo, iinacanakus lumam aupara kayes aijoreorio:

¹⁷ inera kwanata EJAKAIT loka ajoresio ebe, Koany, ejukakini kes ekileŋ, ka eteŋei, ka atular, ido etuluori kes bala etini loebos, lomam epedori anyamio, naarai erono noi.

¹⁸ Ido arukitori kes kekileŋ, ka eteŋei, ka atular, ainakini kes aisiarisiario kotoma ajakanuto kere nuka akwap, araut ekenit, ka aumokinet, ka aimuario, ka amorosit, kotoma atekerin kere kama kereŋearit.

¹⁹ Ebala EJAKAIT ebe, Naarai mam apotu kiirasi akakiro, nuejukakinitor kes ikakejaanakinak inabin, adilonokini tupuruc aijukunun kes; ebala EJAKAIT ebe, Konye ipotu koŋero akiirar.

²⁰ Aso do kiirasi yesi akirot naka EJAKAIT, yes kere ikijoreoritono, lukayaŋaari Babulon anyoun koYerusalem.

²¹ Inera kwanata EJAKAIT loka ajoresio, Edeke loka Isirael nuka Akab okoku loka Kolaia, ido nuka Sedekia okoku loka Maaseia, lukidwarakinete yes aiŋal kokirorika, ebe: Koany, ainakini kes akan naka Nebukadaresar ekabaka loko Babulon: eari do ŋesi kes kakonyenekus.

²² Naarai kanukec ŋes ikenioto ikijoreoritono luka Yuda luejaas Babulon ebe, ‘Kituput EJAKAIT jo kwape Sedekia ka Akab, luabu ekabaka loko Babulon kitisis kakim.’

²³ Naarai kiswamata nukabaŋaanut kotoma Isirael, ido kite eloete aŋor nuka iidunyetakec, ido kineras kokirorika akiro nukaiŋal, numam ecorakinit kes. Ebala EJAKAIT ebe, Eoŋ lo loajeni, ido arai ekajenan.”

²⁴Nuka Semaia Enekelamit ilimokini ebe:

²⁵ “Ebala kwanata EJAKAIT loka ajoresio, Edeke loka Isirael ebe: Naarai ijuka ibaluan kokirorikon mama ejaas ituŋa kere luejaas Yerusalem, ka neejai Sepania okoku loka Maaseia esasedoti, ido neejaas isasedotin kere ebe,

²⁶ ‘Kituluo EJAKAIT esasedoti aibois naka Yekoiada esasedoti, koraut ijaka kotogo loka EJAKAIT kanuka ŋinituŋanan yenikikerep, ka yenituluor enabi, kibwaik toma oloit ka akito nueridakinete emurisiŋ.

²⁷ Aso do kanukinyo mam itoronia Yeremia loka Anatot, loituluoro elopet bon enabi kamakus?

²⁸Naarai ejuku mamakosi Babulon ebala ebe, “Erai aijoreoriokus naka apak naepol: aso do kodukoto itogoi, kiboienenete kanen; kiraata imanikoria, konyama araitokec.” ’ ”

²⁹Kosodi Sepania esasedoti kosiom ebalua ŋol kopup enabi Yeremia.

³⁰Kosodi kobu akirot naka EJAKAIT mama ejai Yeremia ebe,

³¹ “Kijukak ŋul kere ikijoreoritono kobala ebe, ‘Inera kwanata EJAKAIT nuka Semaia Enekelamit ebe: Naarai kidwarak Semaia, kwabo mam eoŋ ejukunit, kiinak yes amunokina aiŋal;

³² ŋes inerar EJAKAIT kwanata ebe: Koany, eticani Semaia Enekelamit, ka akeur; ebala EJAKAIT ebe, Emamuun ituŋananike yeniboikin otuŋa lu, ido mam ŋes eanyuni ajokis naeswamakini ikatuŋa: naarai ener nukepali mama ejai EJAKAIT.’ ”