Read Ateso Yeremia 34 Bible Online

Yeremia 34 - Ateso bible

Yeremia 34

¹ Akirot naka EJAKAIT naabu kobu mama ejai Yeremia, nakejiotor Nebukadaresar ekabaka loko Babulon, ka ajoreke kere, ka ajakanuto kere nuka akwap nuayait ŋesi, ka ituŋa kere, aitiji Yerusalem, ka ireriake kere, kobala ebe:

² “Inera kwanata EJAKAIT, Edeke loka Isirael ebe: Kolot, kinera ka Sedekia ekabaka loka Yuda, kolimok ebe, ‘Inera EJAKAIT kwanata ebe: Koany, ainakini ere lo akan naka ekabaka loko Babulon, ŋes da icweikini kakim.

³ Mam ikui ijo kakanike, konye abeit kikamario, kiinakinio akanike; eanyunete akonikonyen akonyen nuka ekabaka loko Babulon, ŋes da inerakinos kajo kaituke, ido ilosi Babulon.’

⁴Konye ca kiira akirot naka EJAKAIT, ijo Sedekia ekabaka loka Yuda. Inera EJAKAIT kwanata kanukon ebe: ‘Mam kiari ekileŋ.

⁵ Itwani kainapakin. Ido kwape kisupuronokiniata lukapapaakon, ikabakan lulem kigeikinete jo, kwape kwaŋin kisupuronokiniata jo. Ekuudianete kesi jo, kobalasi ebe, “Wu okwe ekosijakait!” ’ Naarai ebala EJAKAIT ebe, eoŋ ener akirot ŋin.”

⁶ Kosodi enabi Yeremia alimokin Sedekia ekabaka loka Yuda akiro ŋun kere kotoma Yerusalem.

⁷ Kojiosi ajore naka ekabaka loko Babulon ka Yerusalem, ka ireria kere luka Yuda luapianuna, Lakis ka Aseka; naarai ŋul bon asalito koreria luka Yuda lukebwaitai.

⁸ Akirot naka EJAKAIT naabu kobu mama ejai Yeremia, kodaunite ekabaka Sedekia aitutuk aitutuket kituŋa kere luajaas Yerusalem, alimor aosikinio kamakec.

⁹ Ŋinituŋanan aosikin ekebulesit, ka ŋinituŋanan aosikin akebulesit, arai erai Eburaniat, arai Aburaniat; kinye ajaut yenitubusiani Eyudayat, onaceke.

¹⁰Kosodete ikapolok kere ka ituŋa kere arimar, ŋul luetutukito aitutuket, ŋinituŋanan aosikin ekebulesit, ka ŋinituŋanan aosikin akebulesit, kinyeis aitubusianio bobo; korimasi, koosikis.

¹¹ Konye kokau kibelokinos, kinyakutu ibulesin ka abulesin luaosikinito, koyaata kitubulesenoto bobo ibulesin ka abulesin.

¹²Ŋes abunio akirot naka EJAKAIT mama ejai Yeremia naebuni kama ejai EJAKAIT, kobala ebe:

¹³“Inera kwanata EJAKAIT, Edeke loka Isirael ebe: Abu ketutuk aitutuket ka lukapapaakus kapaaran naetolomunia kes kakwap nako Misiri, kotogo loka ebulesene, kabala ebe,

¹⁴ ‘Ketuboros ikar ikanykaarei ewosianakini ŋinituŋanan onaceke loBuraniat, lokitwegelitai, lokijaanak ikar ikanykape, iwosianakini ŋes anyoun kamakon.’ Konye mam apotu lukapapaakus keirasi, kwabo mam apotu ketoikis akeceki.

¹⁵ Yesi da koloje pac ipotu kibelokinos, kiswamata nuejok kakonyeneka, ilimorete aosikinio ŋinituŋanan aupake; ido ipotu kitutukis aitutuket kotoma togo loenyaritai ekakiror.

¹⁶ Konye kibelokinos, kisimoromoroto ekakiror, kinyakutu ŋinituŋanan ekebulesit ka ŋinituŋanan akebulesit, luipotu koosikinito kwape ekototor; kitubulesenoto bobo, araut kamakus ibulesin ka abulesin.

¹⁷ Ŋes enerar EJAKAIT kwanata ebe: Mam ipotu kiirasi eoŋ, alimor aosianakin, ŋinituŋanan onaceke, ka ŋinituŋanan aupake, Ebala EJAKAIT ebe, Koany, alimori aosianakin kama ejai ekileŋ, ka atular, ka eteŋei; ido kainakini yes aisiarisiario toma ajakanuto kere nuka akwap.

¹⁸ Ido ituŋa luadiaka akaitutuket, lumam eswamato akiro nuka aitutuket naetutukete kakonyeneka, etuputoori itaok yenetubio katutubeta aarei, kosodete aitor kidiŋ katutubetake;

¹⁹ikapolok luka Yuda, ka ikapolok luka Yerusalem, ka ibwacin, ka isasedotin, ka ituŋa kere luka akwap luetorete kidiŋ atutubeta nuka itaok.

²⁰ Ainakini teni kes akan naka lukasurupokec, akan da naka ŋul kaluemooto aijarakec. Akecewat da nukatwak eraunete inyamat mama ejaas akweny nuka akuj, ka neejaas itiaŋ luka ais.

²¹ Ainakini Sedekia ekabaka loka Yuda, ka ikapolokoke akan naka lukasurupokec, ka akan da naka ŋul kaluemooto aijarakec, akan da naka ajore naka ekabaka loko Babulon, luanyout kamakus.

²² Ebala EJAKAIT ebe, Koany, ecorakini, etoboŋuni kes ore lo; ido itijiete ŋes, ipikorete, icweikinete kakim, Etuluori ireria luka Yuda ameje, komamei yeniboie kotoma.”