Read Ateso Yeremia 35 Bible Online

Yeremia 35 - Ateso bible

Yeremia 35

¹ Akirot naka EJAKAIT naabu kobu mama ejai Yeremia kapaarasia nuka Yekoiakim okoku loka Yosia, ekabaka loka Yuda, kobala ebe:

² “Kolot okekia luka Irekabin, kinera kakes, kitolomik togo loka EJAKAIT, agola adiopet, koinak ebino aimat.”

³Kasodi kayaŋa Yaasania okoku loka Yeremia, okoku loka Kabasinia, ka ikeinacan, ka odweke kere, ka ekek kere loka Irekabin.

⁴ Ketoloma kes togo loka EJAKAIT, toma agola naka odwe luka Kanan okoku loka Igidalia, etuŋanan loka Edeke, naidunyas kagola naka ikapolok, naajai kuju kagola naka Maaseia okoku loka Salum, ekagolon.

⁵Kebwaik ituol lueleleba ebino, ka aderekai, kakonyen nuka odwe luka ekek loka Irekabin; katema atiar, “Komata ebino.”

⁶ Konye kes kobalas ebe, “Mam kimasi ebino: naarai abu Yonadab okoku loka Rakab, papaakosi, kicorak kobala ebe, ‘Mam imasenenete ebino, yes, karaida odwekus ikar kere.

⁷ Kwabo mam idukenenete etogo, ido mam iyeenenete ikinyom, karaida aira amanat nuka emusabibu, mam ijaenenas kakes; konye iboienenete koweman akusipaarasia kere; kobuto ikar luipu kakwap naiboioto.’

⁸ Kipou karimasi eporoto loka Yonadab okoku loka Rekab, papaakosi, kakiro kere nukiititiŋi, amamus amasenen ebino, akosipaarasia kere, isio ka akosiŋor, ka ikosidwe lusap ka lupesur,

⁹karaida adukun itogoi lukibois, Ido emamei sio amana naka emusabibu, karaida imanikoria, karaida ikinyom;

¹⁰konye kiboienenei kowemam, karimarito, keswamaete kere nukicorakinit Yonadab papaakosi.

¹¹ Kosodi kanen nakebunio Nebukadaresar ekabaka loko Babulon aitiji akwap, kenerata ebe, ‘Kopotu, kaloto Yerusalem, kanuka akurian ajore naka Ikaludean, ka nuka akurian ajore naka Isurian.’ Aso ŋes kiboio koYerusalem.”

¹²Kosodi kobu akirot naka EJAKAIT mama ejai Yeremia, kobala ebe:

¹³ “Inera kwanata EJAKAIT loka ajoresio, Edeke loka Isirael, ebe: Kolot, kolimok ituŋa luka Yuda ka luiboiete koYerusalem ebe, Ebala EJAKAIT ebe, Mam kereka yes iyuunete aisisianakinio akiirar akakiro?

¹⁴ Etodolikinitai akiro nuka Yonadab okoku loka Rekab nuecorakinit odweke amamus amasenen ebino, kwabo mam emasenenete aitodol lolo, naarai erimarete aicorakinet naka papaakec: konye eoŋ abu kener kayes, adilonokin tupuruc einer; ido mam ipotu kopuput eoŋ.

¹⁵ Kejukanakini da yes ikakejaanakinak kere inabin, adilonokin tupuruc aijukunun kes, kabala ebe, ‘Koboŋu cabo ŋinituŋanan ainyein ekerot loerono, kitetenata akusiswamisio, siritupanarete icedekesio aijaanakin kes, ido iboiete kakwap naabu kainak yes ka lukapapaakus.’ Konye mam itoonokinete akusiki, kwabo mam ipotu kopuput eoŋ.

¹⁶Naarai etodolikis odwe luka Yonadab okoku loka Rekab aicorakinet naka papaakec naecorakinit, konye ituŋa lu mam apotu karimasi eoŋ.

¹⁷ Ŋes enerar kwanata EJAKAIT, Edeke loka ajoresio, Edeke loka Isirael, ebe: Koany, ayauni kotoma Yuda ka ŋul kere luiboiete koYerusalem, aronis kere naenerakinit kes: naarai abu kener kakes, konye mam apotu kapuput; ido eworo, konye mam apotu kaboŋokis.”

¹⁸ Kotema Yeremia ekek loka Irekabin atiar, “Inera kwanata EJAKAIT loka ajoresio, Edeke loka Isirael ebe: Naarai irimasi aicorakinet naka Yonadab papaakus, koricata aituutooretake kere, kiswamata kere nukicorakinit yes,

¹⁹ ŋes inerar kwanata EJAKAIT loka ajoresio, Edeke loka Isirael ebe: Mam Yonadab okoku loka Rekab emamikini etuŋanan loebwoi kakonyeneka ikar kere.”