Read Ateso Yeremia 42 Bible Online

Yeremia 42 - Ateso bible

Yeremia 42

¹ Kosodete kikunyakis ikapolok kere luka irioŋeta, ka Yokanan okoku loka Karea, ka Yesania okoku loka Kosaia, ka ituŋa kere ageun kalu didik kiton lukapolok,

² kotemasi enabi Yeremia atiar, “Kiŋaiŋait, kocam akosiilip, kilipak sio mama ejai EJAKAIT Ekonideke, ilipakini aatoŋot na kere; (naarai kisal idis taai kotoma luetia nen, kwape aanyuniata akonikonye sio).

³ Kitodik EJAKAIT Ekonideke sio erot lokibusakinit aitorenen, ka akirot da nakibusakinit aiswamaenen.”

⁴ Kosodi kotema enabi Yeremia atiar, “Keira yes; koany, elipi EJAKAIT Edekekus kwape ejaatar akusikiro; kosodi kanen akirot kere nakibonokini yes EJAKAIT, kalimokinete; mam kemunonikin adiokirot kere.”

⁵Kosodete kotemasi Yeremia atiar, “Korau EJAKAIT ekajenan lokabeit lomunot kamawok, arai mam kiswamai kwape ejaar akirot kere nakijukunia EJAKAIT Ekonideke mamakosi.

⁶ Arai ejok, arai erono, kirimari eporoto loka EJAKAIT Ewokodeke, lokijukarit isio jo mama ejai; tetere kijaun ejok, arai kiirima eporoto loka EJAKAIT Ewokodeke.”

⁷Kosodi kanen ketuboros apaarasia atomon, kobu akirot naka EJAKAIT mama ejai Yeremia.

⁸Kosodi konyarau ŋesi Yokanan okoku loka Karea, ka ikapolok kere luka irioŋeta luajaas kaŋes, ka ituŋa kere ageun ka ludidik kiton lukapolok.

⁹Kotema atiar, “Inera kwanata EJAKAIT, Edeke loka Isirael, lokiijukaritos mama ejai alimor akusiilip kakonyeneke ebe:

¹⁰ Arai kicamutu aiboi kakwap kana, aso kaduki yes, kwabo mam kebirorete, kerai yes, kwabo mam karutorete; naarai eitok aronis naabu keswama.

¹¹ Ebala EJAKAIT ebe, Sirikikuriakata ekabaka loko Babulon, loikuriaka; sirikikuriakata ŋes, Naarai ajai eoŋ nepepe kayes aitajar, ka ayuun da yes kakanike.

¹² Ido ainakini yes aitimio, tetere kitimi ŋesi yes, kisiboik akwapukus.

¹³ Konye arai ibalas ebe, ‘Mam kiboikin akwap na’; komam irimarete eporoto loka EJAKAIT Ekusideke;

¹⁴ibalas ebe, ‘Mam; konye kilosi akwap nako Misiri, nemam kianyuni ejie, kwabo mam kiirari eporoto loka arupepe, ido mam kiriebi eteŋei loka inyamat; ŋina ŋes kiboikin,’

¹⁵ aso do kiirasi akirot naka EJAKAIT, yes aatoŋot naka Yuda. Inera kwanata EJAKAIT loka ajoresio, Edeke loka Isirael ebe: Arai kitogogoŋoto akusikonyen cut alomar akwap nako Misiri, kolototo aiboi ŋina;

¹⁶ kosodi kanen, kidolokini ekileŋ loiyoŋito kaŋina kakwap nako Misiri, eteŋei da loikuriaka, kiduduŋi yes kaŋina koMisiri, ido itwakikinete ŋina.

¹⁷ Ikonakinio nen ituŋa kere luitogogoŋito akecekonyen alosit Misiri aiboi ŋina; eari ekileŋ, ka eteŋei, ka atular da: emamei idio yenesali yenekui karonis naainuni kes.

¹⁸ “Naarai inera kwanata EJAKAIT loka ajoresio, Edeke loka Isirael ebe, Kwape abu akanyunyura ka akadedeŋ kobukokinor mama ejaas luiboiete koYerusalem, kwape kwaŋin ebukokinor akadedeŋ mamakus, arai kilomas Misiri; iraunete yesi aimuario, ka aumokinet, ka ekenit, ka amorosit, mam bobo ianyunete aibois na.

¹⁹ Ener EJAKAIT mamakus, yes aatoŋot naka Yuda ebe, ‘Sirikiloto Misiri’: kojenutu cut ebe kekwenyarit yes lolo.

²⁰Naarai iswamata nukaimod kotauonokus, yes ikulepek; naarai ipotu kijukasi eoŋ mama ejai EJAKAIT Ekusideke, ibalas ebe, ‘Kilipakinai kama ejai EJAKAIT Ewokodeke: kere da nuetemari EJAKAIT Ewokodeke, kolimok sio, kiswamai isio da.’

²¹ Lolo da ketejenu yes; konye mam ipotu korimasi eporoto loka EJAKAIT Ekusideke kakiro kere nukejukunia mama ijaas.

²² Aso do kojenutu cut ebe kiari ekileŋ, ka eteŋei, ka atular da, kotoma akwap naikotosi alosit aiboi.”