Read Ateso Yeremia 5 Bible Online

Yeremia 5 - Ateso bible

Yeremia 5

¹ Aso kokerata laije ka laije korotin luka Yerusalem, Koanyut bo, kojenut, komoata kaiboisioke nuelalak, Arai ipedorete aanyun ituŋanan, Arai ejai yeniswamai nuebeito, yenemoot amunonut; Aso etimi eoŋ ere.

² Karaida kineras atiar, “Kwape ejaria EJAKAIT”; Abeit iyapoete nukaiŋal.

³ Wu EJAKAIT, mere ma esesenete akonikonye abeit? Inom kes, konye mam itururwete; Idany kes, konye agiro aicorio: Etogogonoto akecekonyen aitelekarit atiiba; Agiro aboŋun.

⁴ Kasodi einer atiar, “Abeit icanas lu: ebaŋaaka; Naarai mam ejenete erot loka EJAKAIT, Karaida ekisil loka Ekecedeke.

⁵ Alosionori do mama ejaas lukapolok, kenera kakes; Naarai ejenete kesi erot loka EJAKAIT, ka ekisil loka Ekecedeke.” Konye abila ŋul eloit kediopetau, aŋedata aeneta.

⁶ Kanuka ŋun eari rwaru kes eŋatuny loelomuni kamoni, Eŋasi kes epeet loka amodiŋ, Eperuni eris koreriakec, Ŋinituŋanan yenelomuni kotoma enyilinyilio; Naarai ipu adiakanaretakec, Eyatakin akecepaar.

⁷ “Apedori biai aitim jo? Kajala ikonidwe eoŋ, Eyapoikis ŋul lumam eraas idekesio: Abu kesimon kes kosodete adotiar, Kotukonokinos katukon otogoi luka nudotia.

⁸ Esubito bala ibalasin lukitadakio tupuruc: Ŋolituŋanan icicina kaberu naka yenice.

⁹ Ebala EJAKAIT ebe: Mam kereka eticani kanuka ŋun? Ido mam tope inyaŋi ekatau kateker naikoni nen?

¹⁰ “Kodokasi arwatatinike, komudiasi: Konye sirikitanaŋa cut: Kolemasi aketenun; Naarai mam eraas nuka EJAKAIT.

¹¹ Ebala EJAKAIT ebe, Naarai keŋala noi noi ekek loka Isirael, Ka ekek loka Yuda.

¹² Anerokis EJAKAIT, kineras atiar, ‘Mam nuiswamai ŋesi; Kwabo mam kidoikini oni aronis, Kwabo mam kianyuni ekileŋ karaida eteŋei.

¹³Eraunos inabin da ekwam, Kwabo emamei akirot kotomakec: Iswamakinio kes kwaŋin.’ ”

¹⁴ Kanuka ŋun ebala kwanata EJAKAIT, Edeke loka ajoresio, ebe: “Kanu ineratar akirot ŋin, Koany, etuluori akakiro kaitukukon araun akim, Ka ituŋa lu da araun akito, icwei kes.

¹⁵ Ebala EJAKAIT ebe: Koany, ayauni mama ijaas ateker naebuni kama elwana, Ijo ekek loka Isirael: Ateker nakagogoŋon, ateker nakolo sek, Ateker namam ijeni akeceŋajep, Kwabo mam ijenuni nuineras.

¹⁶Ecoekec loka ikojoi erai ailit naesabara, Eraas kere ikiliok lukirigin.

¹⁷ Ido enyamete ikonidwenyan, ka ikoninyamat, Lutikenyama ikonidwe lusap ka lupesur: Enyamete ikonisipanin luka aituk ka luka amerekekin; Enyamete ekonimusabibu, ka etinikon: Ejepejepeete kekileŋ ikonireria luebwaitai, luimunokina.”

¹⁸“Konye ebala EJAKAIT ebe, karaida kapaarasia kaŋun, mam ketanaŋete cut.

¹⁹ Kosodi kanen, naineriata atiar, ‘Kanukinyo kiswamakinia EJAKAIT Ewokodeke akiro ŋun kere?’ Kosodi Koboŋok kes ebe, ‘Kwape kinyeiniata yesi eoŋ, kijaanakis idekesio lumo kakwapukus, ijaanakinete kwape kwaŋin imo kakwap namere nakus.’ ”

²⁰Kolimosi nu kokek loka Yakob, Kolimonokis koYuda, kineras atiar,

²¹ “Kiirasi nu, yes ituŋa luibaŋaaka, luemamei aijen; Luejaas akonye, komam ianyunete; Luejaas aki komam ipupunete.

²² Ebala EJAKAIT ebe, Mam ca kiyoŋito eoŋ? Mam imaranete kakonyeneka? Ebwaik asine araun eikor loka aŋolol, Kokisil lomam edaun, tetere mam etubor, Karaida edakununos akailan, mam epedorete aipikor; Karaida irurumaete, mam epedorete atubor.

²³Konye ejaas ituŋa lu itauon luepaarete ido luepaliikis; Apaasi aloto.

²⁴ Kwabo mam ebalas kotauonokec ebe, ‘Kayoŋate EJAKAIT Ewokodeke, Loeinakini akiru kapakike; Akiru naka aiporo ka naka akamu da; Loinadakini oni asabaton nuseuna nuka aidweny.’

²⁵Aremosi numam adolitekus akiro ŋun, Erebokis aronisiokus ajokis kamakus.

²⁶Naarai edumunos ikaronok kotuŋaka: Idarete, kwape eperunioto ikalokak akweny; Elokete atacit, ipokete ituŋa.

²⁷Kwape ilelebunotor akweny aruja, Kwape kwaŋin ilelebunotor itogoikec aiŋal: Ŋes apolokorotor, kobarata.

²⁸ Etumitos, inutakina: Eebo, elitoro kaswamisio nukaronok: Mam etubete kabeit akiro nuka ikokiok, Tetere ekeriakaros; Mam epurokinete luilwaritos nuebeito.

²⁹ Ebala EJAKAIT ebe, Mam kereka eticani kanuka ŋun? Mam ekatau inyaŋi ateker naikoni nen?”

³⁰Adoloki akirot nakaumokin ka nasogim akwap;

³¹ Edwarete inabin lukeŋalak, Eyaito isasedotin kanuka aisigalikinikec; Ekotosi ikatuŋa kwaŋin; Ikwaikinete yesi ai kedolu esaŋe?