Read Ateso Yeremia 6 Bible Online

Yeremia 6 - Ateso bible

Yeremia 6

¹ Kokerata kolakunos, yes idwe luka Benyamin, Konyout kokidiŋ Yerusalem, Kokutata arupepe koTekoa, Kikeasi aanyunet koBet-kakerem: Naarai etakani aronis ebuni kagolitomei, Ka amudiar naepol.

²Agelari akoku naka Sion, Naitemelel naijamamai.

³ Epote ikecokok kisipaninikec luka amerekekin asurokin ŋes; Ibubuete iwemanakec airimor; Itadakete kes, ŋinituŋanan kaiboisike.

⁴“Kokapanakinos ejie kaŋes; Konyoutu, kadokasi kidiŋ paaran!” “Itukwi oni! naarai aiotaki akoloŋ, Aojaaros itolimon luka atiboŋ!”

⁵“Konyoutu, kadokasi kuare, Kamudiasi itogoike lukapolok!”

⁶ Naarai ebala EJAKAIT loka ajoresio ebe: “Kojeput ikito, kitutuoto etut, Asurokin Yerusalem: Lo ŋes ere lokitieana; Ileleba emwaŋit pas kidiŋike.

⁷ Kwape ibwelibwelio atan akekipi, Kwape kwaŋin da ibwelibwelio aronisike: Iirario akaje ka aiŋat kotomake; Ejai adek ka amusuŋun kakonyeneka tiritir.

⁸ Kituutoor, ijo Yerusalem, Kinyek ekatau anyoun kama ijai; Kenyek aitaraun jo asilio, Akwap namam ituŋanan.”

⁹Ebala EJAKAIT loka ajoresio kwanata ebe: “Inyogokinete aidepidep cut aatoŋot naka Isirael kwape emusabibu: Kinyakanyak bobo akonikan katenun kwape yenedeŋi emusabibu.”

¹⁰ Alimokini ŋai ka aikwenyar da tetere epupunete? Koany, mam akeceki ekepep, Kwabo mam epedorete akiirar: Koany, araun akirot naka EJAKAIT amorosit kamakec; Mam isiyalamikinito.

¹¹ Kanuka ŋun ŋes elelebunor eoŋ anyunyura naka EJAKAIT; Kapas aitikokinit. “Kobukok odwe korot, Ido katukot naka ikatumunak nepepe: Naarai eyaŋaario ekile ka nakowaike, Lomojoŋ ka ŋol da loileleba apaarasia.

¹² Eluoros itogoikec luka ice, Nepepe kaŋorokec ka imanikoriakec: Naarai ebala EJAKAIT ebe, Ariori akakan mama ejaas luiboiete kakwap kana.

¹³ Naarai ageun kaloedit kakesi kiton lokapolon kakesi, Eraŋani ŋinituŋanan aimedaun; Ido ageun konabi kiton osasedoti, Emodi ŋinituŋanan.

¹⁴ Etaŋaleut da amusuŋut naka ikatuŋa kaitapapanit, Kobalas ebe, ‘Ainapakin, ainapakin,’ Kereka emamei ainapakin.

¹⁵ Eruma kereka kes ileic naadauniata aswam naketal? Be! Mam cut erumito ileic, Ido mam apedorete aitirir. Kanuka ŋun ebiroros nepepe kaŋul luebiroros: Ebala EJAKAIT ebe, Kapak naeticania kes elataros.”

¹⁶ Ebala EJAKAIT kwanata ebe, “Kobwaata yesi korotin, koanyut, Kiŋita isokono lukoloŋo, Neejai erot loejok, koloto kotoma, Ido idumunete aiyeŋun kotauonokus: Konye kobalas ebe, ‘Mam kilosi kotoma.’

¹⁷ Abu kebwaik ikedarak kamakus ebe, ‘Kopuputu eporoto loka arupepe!’ Konye kobalas ebe, ‘Mam kipupuni.’

¹⁸Aso do kopuputu, yes atekerin, Kojen, ijo ekodet, nuedoikinete kes.

¹⁹ Kopup, ijo akwap; koany, ayauni aronis otuŋa lu, Araito nuka akeceomisio, Naarai mam apotu kiirasi akakiro; Ido aŋeroto ekakisil.

²⁰ Anyoin kereka ajokis naka lukisupurununo luepote mamaka anyoun koSeba, Eitola da loebuni kakwap naelwana? Ainakinetakus nuicweio mam ecamunio, Asubanakus da mam kesiyalamikinito.

²¹ Kanuka ŋun ebala EJAKAIT kwanata ebe: ‘Koany, ebwaikini ikomion akonyen nuka ituŋa kalu: Iguikinete lukapapa ka odwekec kere nepepe; Eoliori eidunyet ka epaperoke da.’ ”

²²Ebala EJAKAIT kwanata ebe: “Koany epote ituŋa kakwap naka agolitomei; Ekwenyuni ateker naepol kowaitin luelwaka luka akwap.

²³ Itiŋito akabwai ka akwaras; Ibworitos kesi, mam itimenenete; Irurumaete ikeceporotoi kwape aŋolol, Ibwanenito ibalasin; Ekapanakina ŋolituŋanan kwape ekajiot, Asurokin jo, wu akoku naka Sion.”

²⁴ Kipou keirasi eemutukec; Koleiekekaros akaniniwok; Kikam aditar, Ka ariebo kwape naka aberu naidouni.

²⁵ Sirikilomas okitui, karaida alosit korot; Naarai ejai ekileŋ loka lokasurup ka aitasuro kaŋoliwai.

²⁶ Wu jo akoku naka ikatuŋa, konap epuko, Kipunupunokin kotoma okurwon: Kibworo, kwape ibworor ikoku yenilemura, Akuudian naepol noi noi, Naarai kitiuni oni ekamudiaran.

²⁷“Ketarau jo ekegimoron, ekeniŋon da kotoma otuŋaka; Tetere ijenuni igimori da ekecerot.

²⁸ Epaliikis kesi kere noi, Irimete kasabanakin; Eraas kesi aisinit ka asuat: Iswamaete kere nukamunaar.

²⁹Ekusi acukut kagogoŋ; Idopori akim asasit; Iyatanakinete ailiaun atai; Naarai mam ikaronok edemario.

³⁰ Enyaritai epuesa loepalitai, Naarai agiri EJAKAIT kes.”