Read Ateso Yeremia 9 Bible Online

Yeremia 9 - Ateso bible

Yeremia 9

¹Wu okwe arai kerai akouka akipi, Akakonye da koraas ikico luka akiyo, Tetere amonyenenei akiyo paaran ka akuar Kanuka luearitai luka akoku naka ikatuŋa!

²Arai kajai kaiyenet naka ikalotok kamodiŋ; Tikajal ikatuŋa, anyoun kamakec! Naarai eraas kere ludotia, Atukot naka ituŋa kaluemodaka.

³ Ikesete akeceŋajepa kwape akabwaikec aiŋal; Agogonoros kakwap, konye mere kanuka abeit; Naarai ebala EJAKAIT ebe, Iwotonokinete anyoun karonis kiton aronis, Mam kajenete.

⁴ Kocoito yesi ŋinituŋanan ekeidunyet, Sirikimunokinos onace kere; Naarai onace kere elomakini numere nuke Elatonori ŋiniidunyet kasabanakin.

⁵Emodete kesi ŋinituŋanan ekeidunyet, Mam ineras nukabeit: Esisianakis aŋajepakec einer nukaiŋal; Itapasitos bonik aswam numam adolit

⁶ Ebala EJAKAIT ebe, Ejai aiboisikon kidiŋ aimod; Kanuka aimod ŋes agirioto ajenun eoŋ.

⁷ Kanuka ŋun ebala EJAKAIT loka ajoresio kwanata ebe, “Koany, acalari kes, egimori da; Naarai ti kekwaik ai kanuka akoku naka ikatuŋa?

⁸Aŋajepekec ŋes ekoj loeari; inera nuka aimod; Inera ituŋanan kekeidunyet nuka ainapakin kaŋajepeke, Konye kotauke eperunit ŋes.

⁹Ebala EJAKAIT ebe, Mam kereka eticani kes kanuka ŋun? Mam ekatau inyaŋi ateker naikoni nen?

¹⁰“Ageuni eoŋ aimony ka elulu da kanuka iroŋan, Ido akuudian kanuka ironyia luka ais, Naarai icweio tetere emamei yenitori nen: Ido mam epedorete ituŋa akiirar eporoto loka ibaren; Akera akweny nuka apak ka itiaŋ da, aloto.

¹¹Etarauni do Yerusalem aapoŋor, Aibois naka ikuwei; Etisiliori da ireria luka Yuda, Komamei yeniboie kotoma.”

¹² Iŋai bo yenikacoa, yenejenuni ŋun? Iŋai da ŋin yenabu aŋajep naka EJAKAIT kolimok, tetere elimori? Kanukinyo amunaunor akwap icweio kwape kais, tetere emamei yenitori nen?

¹³Ido ebala EJAKAIT ebe, “Naarai ajalata ikakisila luebwaikinit kakonyenekec, ido mam erimarito ekaporoto, ido mam elosenenete kotoma;

¹⁴ konye elosenenete kwape ejaar aninik naka itauonokec korupitos Ibaalin, lukisisianakinete lukapapaakec:

¹⁵ kanuka ŋun ebala kwanata EJAKAIT loka ajoresio, Edeke loka Isirael ebe, Koany, etanyami kes, ituŋa ŋupeŋul, aliasit nakadwaris, etamasi da akipi nuka epiu.

¹⁶ Esiarakini kes toma atekerin, numam lem kes ejenete karaida lukapapaakec: ejukari da ekileŋ atupakin kes, aitodol neamudiaria.”

¹⁷ Ebala EJAKAIT lokajoresio ebe: “Koomoomata yesi, konyarautu aŋor nuibworos, kopotu: Kijukasi anyaraun aŋor nuepiriaka, kopotu kesi da;

¹⁸ Kiwonyut, kogeut ailulukin kanukosi, Koleleete akiyo kakonyekosi, Kibwelibwelete akip kabukiokosi.

¹⁹ Naarai epupio eporoto loka elulu koSion ebe, ‘Kiŋasi cut! Kitirira noi; Naarai kipou kenyeis akwap, Naarai ebirosi ikositogoi.’ ”

²⁰Konye yes aŋor, kiirasi akirot naka EJAKAIT, Kijaut akusiki akirot naka aŋajepeke, Kisisianakis adwekus elulu, Kisisianak ŋinituŋanan akeidunyet akuudian.

²¹Naarai adoku atwanare kadirisanawok, Aloma otogoiwok lukapolou; Agela idwe kina, Ka ikatumunak da korotin.

²²Kinerasi ebe, “Ebala EJAKAIT kwanata ebe: Ibiroros atesina nuka ituŋa kwape aoret kamanat, Ido kwape luedeunos akaulo kekasakan, Emameun yenedei kes.”

²³ Ebala EJAKAIT kwanata ebe, “Kinyek yenikacoa aolobobot kotoma acoake, kinyek da lokirigi aolobobot kotoma agogoŋuke, kinyek ekabaran da aolobobot kotoma abarake.

²⁴ Konye yeneolobobot koolobobote kana ebe kamisiikinit, ido kajeni eoŋ, ebe arai eoŋ EJAKAIT loeswamai nukasianut, nuketube, ka nukadolit da kakwap: naarai ebala EJAKAIT ebe, Kesiyalamikinito akiro ŋun.”

²⁵ Ebala EJAKAIT ebe, “Koany, epote apaarasia nueticania ŋul kere luekepep kotoma numam ekepepukec:

²⁶ Misiri, ka Yuda, ka Edom, ka idwe luka Amon, ka Moab, ka ŋul kere da luekebeb itimakec, luiboiete kais: naarai atekerin ŋun kere mam ekepep, ekek da kere loka Isirael mam ekepep kotau,”