Read Ateso Akuudian 2 Bible Online

Akuudian 2 - Ateso bible

Akuudian 2

¹ Arapak ca ma EJAKAIT akoku naka Sion kedou Kotoma anyunyurake! Aeaku aibuses naka Isirael Anyoun kakuj kiton akwap, Kwabo mam iitunit iicoloŋ yenika akejeke Kapaaran naka anyunyurake.

² Eliko EJAKAIT aiboisio kere nuka Yakob, Komam itimit, Ebiru kotoma adedeŋuke abwasio nuka akoku naka Yuda; Atiyatiya kiton kwap: Amunaa ajakanut ka ikapolokoke.

³ Ajepa amumwara kere nuka Isirael Kakenyunyura naededeŋ; Enyaka akekan nakoteten kakonyen nuka lukasurup: Etisis ŋesi Yakob kwape akim naesarani, Nairiamarit iwaitin kere.

⁴ Eket akekabwa kwape lokasurup, Ebwoi kakekan nakoteten kwape loitokokoli. Aar kere luetalakarito akonyen Kowema loka akoku naka Sion; Abukok akededeŋ kwape kakim.

⁵ Asub EJAKAIT bala lokasurup, Eliko Isirael; Eliko iketogoi kere lukapolou, Amunaa akebwasin: Eyataki ŋesi akoku naka Yuda Aibworo ka akuudian.

⁶ Eweliwel ikeswam kagogoŋ, Kwape yenikomanikor; Amunaa aiboisike natukonokina: Esumurwok EJAKAIT koSion Atukokinet naeseunitai ka asabato, Ido kanuka adedeŋ naka akenyunyura Amwaŋa ekabaka ka esasedoti.

⁷ Acaka EJAKAIT eketem, Asac akeibois nakalaunan; Akoraki akanin nuka lukasurup Arwatatin nuka itogoike lukapolou: Acelut kotogo loka EJAKAIT Kwape kapaaran naka atukokinet naeseunitai.

⁸ Eneru EJAKAIT amudiar arwatat Naka akoku naka Sion; Atera auno, Mam inyakara akekan kamudiar; Konye etukuudian abwas ka arwatat da; Ijunepepas kere.

⁹ Alumo iruteike toma akwap; Amunaa abilibil cut atiketa: Ekabakake ka ikapolokoke ejaas atekerin; Emameete bobo ikisila, Inabinoke da mam edumunete aitapoet Kama ejai EJAKAIT.

¹⁰ Imakio luka akoku naka Sion Iboiete kokwap, ililiŋete; Ipurito apua akwesikec; Enapitos ipukoi: Itukumonokinito abekon nuka Yerusalem Akwesikec kiton alup.

¹¹ Ikabubutos akonyeneka kanuka akiyo, Itururwei ekatau, Abukokin emanyika kwap, Kanuka amudiar naka akoku naka ikatuŋa, Naarai iiloros idwe ludidik ka imukerun Korotin lukore.

¹²Emonyete mama ejaas nukatotokec, ebe, “Alu bo inyamat ka ebino?” Naiilorotor kwape luimusuŋitai korotin lukore, Naebukoror aijarakec atorobusio nuka nukatotokec.

¹³ Ketejenuni anu? Ketupusi kinyo, ijo akoku naka Yerusalem? Ketiiriani kinyo ketalaka, Wu jo akoku nabekot naka Sion? Naarai epol akonicilat kwape kaŋolol: Iŋai kitaŋaleuni?

¹⁴ Kidwaranakis ikoninabin Aitapoeta nuka aamameak ka abaŋaanut; Kwabo mam apotu kopukosi numam adolitekon, Tetere kinyakunete kaijoreoriokon: Konye kidwaranakis abwokon Nuka aamameak ka nukitapaarete.

¹⁵ Kibapanakinete akanin luitorete kere, Isuarete imuŋimuŋete akecekwes Mama ejai akoku naka Yerusalem, Kobalas ebe, “Lopelo tope ŋes ere Loamaikinitai Ajokis naedolit cut, Aiyalama naka akwap kere?”

¹⁶ Lukasurupokon kere kiwooŋanakis aituke: Kisuasi, kiriamanakinete ikel; Kobalas ebe, “Kiliko ŋes: Abeit na ŋes apaaran nakipou kemielas; Adolu do, kianyu da!”

¹⁷ Eswama EJAKAIT nualosikinit; Etodoliki akekirot; Kwape ecorakinitor kolo sek, Ebiru, komam itimit: Esiyalamik lokasurupikon, Etopoloo amumwarat naka lukitokokolete jo.

¹⁸ Komonyiatar ikecetauon EJAKAIT; Wu jo arwatat naka akoku naka Sion, Koleleata akiyo kwape ecor, Paaran ka kuare! Mam iyeŋuni nepetai da; Mam erwakakin ecopot loka akoŋukon.

¹⁹ Konyou, komony kuare, Kagcuneta nuka akwenyuneta; Kobuko ekonitau kwape akipi Kakonyen nuka EJAKAIT; Kikia akonikanin mamakeŋ Kanuka aijar naka ikonidwe ludidik, Luekotos atwakare eteŋei Kasisiarin nuka irotin kere.

²⁰ Koŋolia, wu EJAKAIT, koany! Lukaŋai luibu kiswamak nuikote nen? Ti tope aŋor kenyama aurikec, Idwe luilepanarete kakaninikec? Ti tope kearakin esasedoti ka enabi Aibois nakalaunan naka EJAKAIT?

²¹ Eperete esapat ka ekimat kapua nakorotin; Aar ekileŋ akabekon ka ikakatumunak: Iar kes kapaaran naka anyunyurakon; Iar, kwabo mam itimit.

²² Inyarau luketasuroka kowaitin kere Kwape kapaaran naka atukokinet naeseunitai; Kwabo emamei idio yenabu koku karaida aisal Kapaaran naka anyunyura naka EJAKAIT; Amudia lokasurupika Ŋul luelepanari ka luasait.