Read Ateso Akuudian 4 Bible Online

Akuudian 4 - Ateso bible

Akuudian 4

¹Amasiki ca ma esabu! Elocokin ca ma esabu loalai noi! Acakanakin amor nuka aibois nakalaunan Asisiarin nuka ŋolirot.

² Itelepai luka etiai loepol luka Sion Lueriakasi kesabu loililiauna, Emari ca ma kwape amoti nuka elupe, Aswam naka akanin nuka ekajean!

³ Ikuwei da einakinete ikisin, Konakete ludidikikec: Konye ebwor akoku naka ikatuŋa, Kwape ikuului luka amodiŋ.

⁴ Emakakin aŋajep naka imukeru Odokolike kanuka akure: Ilipitos idwe ludidik inyamat, Kwabo emamei yenedutakini kes.

⁵ Aoliosi korotin ŋul luanyamenenete kosogasi: Ŋul luapolokinete ogoen lukareŋak Eperete otutio luka ekurwon.

⁶ Naarai numam adolit nuka akoku naka ikatuŋa Itelekaritos aronis naka Sodom, Loketiyakinio katipet, Emamei akan naaponi kibwaikinai.

⁷Asegara isotiake adepar akako, Eliacanito adepar akile, Areŋak awatekec adepar amor nukareŋak, Apwatarakec da esubit bala asapiro.

⁸ Kwana iriono aputokec aitelekar etulia; Mam ejenunos korotin: Eminaikin akecemunyo kakojokec; Aono, esubit bala akitoi.

⁹Ejok lukeari ekileŋ itia lukeari eteŋei; Naarai adokororata, Icumitai kanu amamikiniata araito Nukomanikor.

¹⁰ Apotu aŋor nuitimitoi kipooto ikecedwe Kakaninikec akulepek; Korautu inyamatakec Kanuka amudiario naka akoku naka ikatuŋa.

¹¹ Etodolik EJAKAIT akededeŋ, Abuku akenyunyura naededeŋ; Enokoki akim Sion, Etisisi da apetetake.

¹² Mam apotu ikabakan luka akwap kiyuunito, Karaida luiboiete kotoma akwap kere, Ebe, epedorete loitokokoli ka lokasurup Alomar korutei luka Yerusalem.

¹³ Kanuka aronisio nuka inabinoke, Ka numam adolit nuka isasedotinike, Luapotu kobukosi aokot Nuka ikadolitok kokidiŋike.

¹⁴ Eturiaitos korotin bala imudukiok, Amunaaros kaokot, Mam cut epedorete ituŋa Atiror anapitokec.

¹⁵Iworoete ituŋa ebe, “Irwa! Mam ilaete! Irwa! Irwa! Sirikitirosi!” Kwaŋin koraut ikasiak ka ipasoitin, Kobalasi ituŋa kotoma atekerin ebe, “Mam iboikinos bobo kasio.”

¹⁶ Esiarisiar kes anyunyura naka EJAKAIT; Mam eroko ibwaikinit kes etau: Mam eyoŋete akonyen nuka isasedotin, Mam eminasi da imakio.

¹⁷ Apasata akonyenewok amoot aiŋarakinio naatai: Nakidaria kipou kedara ateker Namam epedori aitajar oni.

¹⁸ Emejaete nekilosi kere, Mam kipedori alosit korotiniwok, Eapie awasiawok adolun, Etodolikinos awokopaarasia; Naarai adolu awasiawok.

¹⁹Atiroko lukirukitotor Aitelekarit imorukaalei luka apak: Kibwapitos koroŋan, Kiperunete kamodiŋ.

²⁰ Eiyeŋane loka ikumesiwok,[1] Lokinyonyoikitono akinyet naka EJAKAIT, Epok kotoma apanyiakec; Lokipou keneras ebe, “Kiboie kotoribeke kotoma atekerin.”

²¹Kolakar, kolel, ijo akoku naka Edom, Naiboie kakwap naka Us: Ikopuni akoli mamakon da; Imerikin, kosodi amujalalar.

²²Etodolikin aiticanet naka numam adolitekon, Ijo akoku naka Sion; Mam bobo kiioreorio; Konye iticani numam adolitekon, Ijo akoku naka Edom; Ilepilepi aronisiokon.