Read Ateso Esekiel 1 Bible Online

Esekiel 1 - Ateso bible

Esekiel 1

¹ Kosodi kanen kokaru loka akaisauni, kolap lokiwoŋonet, kapaaran nakikanyet naka elap, naajaar nepepe kalukijoreoritono, ariri naka ecor Kebar, koŋaarai akuj, kaany aitapoeta nuka Edeke.

² Kapaaran nakikanyet naka elap, ŋes arai ekaru lokikanyet loka aijoreorio naka ekabaka Yekoiakin,

³ kobu teni akirot naka EJAKAIT mama ejai Esekiel esasedoti, okoku loka Busi, kakwap naka Ikaludean, kariri naka ecor Kebar; kojau akan naka EJAKAIT mamakeŋ kaŋina.

⁴ Kasesen, ido koany, kobu ekwam loepol kari naka agolitomei, edou loeiliili, ka akim naesarani, kirimorit amwekemwek, kotakan kokidiŋike ejese loka esabu loimilia, loejai kidiŋ kakim.

⁵ Ido kokidiŋike kolomut luesubito bala isuban iwoŋon lukajarak. Kikoni ne atakanukec; asubito bala etuŋanan.

⁶Ŋinidiopet ajaas ireeta iwoŋon, ŋinidiopet da ajaas abebenoka aoŋon.

⁷ Etenara akecekejen: aicaketa da nuka akejenekec asubito bala aicaket naka itaok; komwekimwekete kwape aisinit naepwatat.

⁸ Ajaas kes akanin nuka etuŋanan kwap kabebenokakec kosiepionokec iwoŋon. Ido ŋul iwoŋon ajaas ireetakec ka abebenokakec kwanata:

⁹eriamanakina abebenokakec; mam ebelonokinos naelosioto, kolototo ŋinidiopet ederit.

¹⁰ Asubito ireetakec kwanata, ajai ŋillidiopet ereet loka etuŋanan; ido ŋul luoŋon ajai ŋinidiopet ereet loka eŋatuny kosiep lokoteten; ido ŋul luoŋon ajai ŋinidiopet ereet loka emoŋ kosiep lokokediany; ŋul luoŋon da ajai ŋinidiopet ereet loka emorukaalet.

¹¹ Ekote nen ireetakec. Egararaete abebenokakec kokuju; eriamanakina abebenoka aarei nuka ŋinidiopet, arapitos aarei awatekec.

¹²Kolototo ŋinidiopet ederit; neekot emoyo alosit, ŋes elosete; mam ebelonokinos naalosenenoto.

¹³ Kidiŋ kisuban lukajarak kojai ibore yenesubit bala atotol nuesaranete akim, bala akalasia; kirimi kokidiŋ kisuban lukajarak: asarani akim, kolom eimilia kakim.

¹⁴ Kokerata isuban lukajarak, kohoŋut, kwape keimilia.

¹⁵ Kosodi napaseseni isuban lukajarak, abu kaany akokoro kalup kosiep kisuban lukajarak, akokoro kaŋinidiopet kakesi luoŋon.

¹⁶ Atakan naka akokoron ka aswamukec asubit bala ejese loka aberulo: ido kere aoŋon araas nuka aput adiopet: asubit atakanukec ka aswamukec bala akokoro kotoma akokoro.

¹⁷Naalosenenoto, kolosenenete kosiepionokec iwoŋon; mam ebelonokinos naalosenenoto.

¹⁸ Ajaas akokoron ireren, ajaas da ipirin; kileleba akonye airimor ireren ŋul iwoŋon.

¹⁹ Ido naalosenenoto isuban lukajarak, kolosenenete akokoron kosiepikec: ido naetonyoununere isuban lukajarak kalup, kitonyoununio da akokoron.

²⁰Neekot emoyo alosit, ŋes elosete; kouparos akokoron da kakes; naarai ajai emoyo loka isuban lukajarak toma akokoron.

²¹Naalosenenoto ŋul alosete nu da; ido nakebwoeneniata ŋul abwoete nu da; ido naetonyounere ŋul kalup, kouparos akokoron da kakes; naarai ajai emoyo loka isuban lukajarak toma akokoron.

²² Ido kuju kakou ka isubat yenikajaran ajai naesubit bala apak, ejese loka akurisitalo nakaŋosibib, aterakinitai kuju kakwesikec.

²³Ido kwap kapak kitenara abebenokakec, adiopet kiteos kanaceke; ajaas ninidlopet abebenoka aarei nukeraparitor akuanake.

²⁴ Naalosenenoto, keira airurum naka abebenokakec, kwape airurum naka akipi nuipu, kwape eporoto loka Lokapedor kere, airurum naka ecelet kwape airurum naka ajore: nakebwoeneniata, kijolulununete abebenokakec.

²⁵Kejai eporoto kokuju apak nakejai kuju akwesikec: nakebwoeneniata, kijolulununete abebenokakec.

²⁶ Kuju kapak nakejai kuju akwesikec, ajai loasubit bala eicoloŋ, loetakani bala amoru nasapiro: ido kiboie loesubit bala etuŋanan kokuju kaloesubit bala eicoloŋ.

²⁷ Ido kaany bala ejese loka esabu loepwatat, bala akim kotomake airimor, ageun kaneasubit bala aŋabeteke kiton kuju; ido ageun kaneasubit bala aŋabeteke kiton kwap, kaany bala akim, kojai amwekimwek nairiamarit.

²⁸ Bala aput naka etaluka loejai odou kapaaran naka akiru, ekoni nen ejese loka amwekimwek kowaitin kere. Ŋin ŋes arai aput naasubit bala aibuses naka EJAKAIT. Kosodi nakaany, kebiror ebuburia, keira eporoto loka ŋol lokinera.