Read Ateso Esekiel 12 Bible Online

Esekiel 12 - Ateso bible

Esekiel 12

¹Kobu akirot naka EJAKAIT bobo mama ajai ebe:

² “Okoku loka etuŋanan, iboie kokidiŋ kekek loka epali, luejaas akonye aanyun, kwabo mam eanyunete, ejaas aki apupun, kwabo mam epupunete, naarai eraas ekek loka epali.

³Aso do, ijo okoku loka etuŋanan, kitemok iboro luka aitwobosio, konyou aibwot paaran kosesenete kesi; ibwosi anyoun kaiboisikon kiton aibois ace kosesenete kesi, Diat eomoomoete, karaida eraas ekek loka epali.

⁴Itolomuni iborokon paaran kosesenete kesi, kwape iboro luka aitwobosio: ilomuni elopet eboŋ kosesenete kesi, kwape elomuniata ituŋa luitwobosio.

⁵Kobok ijo arwatat kosesenete kesi, kitotor iboro.

⁶ Korioŋ kokeperinikon, kosesenete kesi, kitolom kamuton; irapi akonikonyen, komam ianyuni alup: naarai kebwaik jo araun aanyunet mama ejai ekek loka Isirael.”

⁷Kasodi keswama kwaŋin kwape kecorakinitere: ketolom ikaboro paaran, kwape iboro luka aitwobosio, eboŋ da kabok arwatat kakakanin, ketolom kamuton, karioŋ kokeperinika kosesenete kesi.

⁸Kosodi tupuruc kobu akirot naka EJAKAIT mama ajai ebe:

⁹ “Okoku loka etuŋanan, mere kiŋisit jo ekek loka Isirael, ekek loka epali ebe, ‘Inyo bo iswamai?’

¹⁰ Kolimok kes ebe, ‘Inera kwanata Ejakait EDEKE ebe, Abwokon na naka ekapolon lokotoma Yerusalem, ka ekek kere loka Isirael loejai toma.’

¹¹Kolimok ebe, ‘Eoŋ aanyunetekus: kwape abu keswamaa, kwape kwaŋin iswamakinere kes: itwobosio, ijoreorio.’

¹² Ekapolon loejai kidiŋikec erioŋi kokeperike kamuton, elomari: ebokete arwatat aitotor iboro: erapi akonyeneke, naarai mam eanyuni alup kakonyeke.

¹³ Ido aterakini ŋes ekaboi, ipoki katacitika: ayauni ŋes Babulon akwap naka Ikaludean; konye mam eanyuni, karaida etwanikini nen.

¹⁴ Eweliweli okwamin kere ŋul kere luirimorito aiŋarakin, ka ikekodeta da kere; autuni eoŋ ekileŋ loetupari kes.

¹⁵ Ejenunete do ebe arai eoŋ EJAKAIT, naesiarisiaria kes kotoma atekerin, naeweliwelia kes kotoma akwapin.

¹⁶ Konye apianuni ituŋa iuikidioko kakes, luekuete ekileŋ, ka eteŋei ka atular da; tetere elimorete italesiakec kere kotoma atekerin nuedolete; ejenunete do ebe arai eoŋ EJAKAIT,”

¹⁷Bobo da kobu akirot naka EJAKAIT mama ajai ebe:

¹⁸ “Okoku loka etuŋanan, konyam ikoninyamat, komarani, komat akipikon komarani, kisorirai.

¹⁹ Kolimok ituŋa luka akwap ebe, Inera kwanata Ejakait EDEKE nuka luiboiete ko Yerusalem, ka akwap naka Isirael ebe: Epote ainyam inyamatakec kisoriraete, emasete da akecekipi kitiriraete, naarai edokidokori iboro kakwapukec, kanuka akaje naka ŋul kere kaluiboiete kotoma.

²⁰Iswapete ireria luiboioto ituŋa, itisilio akwap; ijenunete da ebe arai eoŋ EJAKAIT.”

²¹Kobu akirot naka EJAKAIT mama ajai ebe:

²² “Okoku loka etuŋanan, awaragan nanyoin na naijaatar kakwap naka Isirael, kineras ebe, ‘Eyapata apaarasia, aolio da ŋiniitapoet’?

²³ Aso do kolimok kes ebe, ‘Inera kwanata Ejakait EDEKE ebe: Etanaŋi awaragan na, mam bobo inerai kwape awaragan kotoma Isirael.’ Konye kolimok kes ebe, Aaput apaarasia, ka aitodolikinio da naka ŋiniitapoet.

²⁴ Naarai mam ejaun bobo aitapoet natitai karaida aidwar naiteleli kotoma okek loka Isirael.

²⁵ Naarai eoŋ EJAKAIT eneri, ido itodolikinio akirot naeŋeri. Mam bobo itilorio. Ebala Ejakait EDEKE ebe, Naarai kapaarasiakus, ijo ekek loka epali, eneri eoŋ akirot, ido etodolikini.”

²⁶Kobu bobo akirot naka EJAKAIT mama ajai ebe:

²⁷ “Okoku loka etuŋanan, koany, ebalasi lukokek loka Isirael ebe, ‘Aitapoet naeseseni ŋesi erai naka apaarasia nuipu koiŋaren, edwari ŋesi nuka apakio nuelwaka.’

²⁸ Aso do kolimok kes ebe, Inera kwanata Ejakait EDEKE ebe: Mam bobo itilorio adio kakakiro. Ebala Ejakait EDEKE ebe, Konye akirot naeŋeri itodolikinio.”