Read Ateso Esekiel 13 Bible Online

Esekiel 13 - Ateso bible

Esekiel 13

¹Kobu akirot naka EJAKAIT mama ajai ebe:

² “Okoku loka etuŋanan, kodwarak inabin luka Isirael luedwarete, kolimok ŋul luedwarete nuepote kotauonokec ikulepek ebe, ‘Kiirasi akirot naka EJAKAIT’.

³Inera kwanata Ejakait EDEKE ebe: Itukwi inabin lubaŋiok, luetuparete imoyonokec ikulepek, kwabo emameete nueanyunito!

⁴ Wu jo Isirael, asubitos ikoninabin bala ikuwei kaiboisio nuiswapito.

⁵ Mam idokanarete karorwaitin, karaida aiteteunun abwas kanuka ekek loka Isirael, tetere ebwoi kojie kapaaran naka EJAKAIT.

⁶ Aanyut aamameak ka aidwar nakaiŋal, luineras ebe, ‘Ebala EJAKAIT’: kwabo mam EJAKAIT iyakit kes, konye emunosi ebe itodolikinio akecekirot.

⁷Mam kereka ianyunito aitapoet natai ido mam idwarito nukaiŋal, naarai ineras ebe, ‘Ebala EJAKAIT’; kwabo mam eoŋ enerit?”

⁸Aso do inera kwanata Ejakait EDEKE ebe: “Naarai inerata aamameak, ido ianyutu nukaiŋal, ebala Ejakait EDEKE ebe, Aso koany, arai eoŋ lokasurupikus.

⁹ Itusurupi akakan inabin lueanyunete aamameak, kaidwar nukaiŋal: mam ejaunete aurianet naka ikatuŋa, ido mam iwadikao aiwadikaeta nuka ekek loka Isirael, ido mam elomarete akwap naka Isirael; ijenunete do ebe arai eoŋ Ejakait EDEKE.

¹⁰ Naarai, eebo, naarai etapaarito ikatuŋa, kobalas ebe, ‘Ainapakin’; kwabo emamei ainapakin; ido naedukioto ituŋa arwatat iladaete inabin ŋul aitwakaŋ.

¹¹ Kolimok ŋul luiladaete aitwakaŋ ebe, Ibirori. Ejauni akiru naibiruni noi; ibiruni da akaka naepol; etiyaikini da ekwam loededeŋ.

¹²Koany, naetiyaikinor arwatat, mam kereka kiŋisio yes ebe, ‘Ai bo ejai akwaŋis naipotu kiladata?’

¹³Aso do inera kwanata Ejakait EDEKE ebe: Atiyaikini kekwam loededeŋ kotoma aisiopoka; ido ejauni akiru naibiruni noi kanyunyuraka, ka akaka naepol kadedeŋ amudiar.

¹⁴ Kwaŋin atiyaikini arwatat naipotu kiladata aitwakaŋ, aitodolikin kwap, tetere epukorio apetetake; naibirunor, yes da kimudiario kokidiŋike; ijenunete do ebe arai eoŋ EJAKAIT.

¹⁵Ebala Ejakait EDEKE ebe, Kwaŋin etodolikini akaisiop arwatat, ka ŋul da lukiladaete aitwakaŋ; atemari yes atiar, Emamei arwatat, karaida ŋul lukiladaete;

¹⁶ kes inabin luka Isirael luedwarete nuka Yerusalem, lueanyunete aitapoeta nuka ainapakin kanukeŋ, kwabo emamei ainapakin.

¹⁷ “Ijo da, okoku loka etuŋanan, kitogogoŋ akonikonyen mama ejaas apesur nuka ikonituŋa, nuedwarete nuepote kotauonokec akulepek; kodwarak kes,

¹⁸ kinera ebe, Inera kwanata Ejakait EDEKE ebe: Itukwi aŋor nuedonyete imakakin luka akanin kere, nuesonyete itabalan luka akwes nuka ituŋa luka ŋinirian amejaa aijar! Imejaete ca ma aijar naka ikatuŋa, ka aitajar da aijar ace kanukus?

¹⁹ Ipotu komoromoroto eoŋ kotoma otuŋaka kanuka aoduneta nuka esairi, ka aluŋureta nuka atap, aiar aijar naka ŋul kalumam tiketwaka, aitajar da aijar naka ŋul kalumam tikejara, aiŋal ikatuŋa luecamunete nukaiŋal.

²⁰“Aso do inera kwanata Ejakait EDEKE ebe: Koany, etusurupi imakakinikus, luimejaata aijar kwape akweny, anyilununei kakaninikus; aosikini aijar, aijar naka ŋul kaluimejaete kwape akweny.

²¹Anyilununei da itabalanakus, ayuuni ikatuŋa kakanikus, mam bobo ejaunete akaninikus amejao; ijenunete do ebe arai eoŋ EJAKAIT.

²² Naarai itakadikinete etau loka ikadoliton kaiŋal, yenimam eoŋ etakadikinit; ka aitogogoŋ akanin nuka ikaronon, komam aibelokin korotoke lokaronon aitajar akeijar.

²³ Kanuka ŋun mam bobo ianyunete aamameak, karaida aidwar adwaresia; ayuuni da ikatuŋa kakaninikus. Ijenunete do ebe arai eoŋ EJAKAIT.”