Read Ateso Esekiel 14 Bible Online

Esekiel 14 - Ateso bible

Esekiel 14

¹ Kosodete kopotu ice komakio luka Isirael mama ajai, kiboikinos kakonyeneka.

²Kosodi kobu akirot naka EJAKAIT mama ajai ebe:

³ “Okoku loka etuŋanan, ayaŋaasi ituŋa lu aputosiakec kotauonokec, ebwaikis da ekomyo loka numam adolitekec kakonyenekec: epedorete ŋul biai aiŋit eoŋ nepetai da?

⁴Aso kiner kakes kobala ebe, Inera kwanata Ejakait EDEKE ebe: Ŋinituŋanan yenikotogo loka Isirael yeneyanaari aputosiake kotauke, kibwaik ekomyo loka numam adoliteke kakonyeneke, kosodi abunore mama ejai enabi: Eoŋ EJAKAIT aboŋokini kaŋun kwape ejaar aipues naka aputosiake;

⁵ tetere ekamuni itauon luka ekek loka Isirael, naarai agitaros kere kaneajai kanuka aputosiakec.

⁶“Aso kolimok ekek loka Isirael atiar, Inera kwanata Ejakait EDEKE ebe: Koboŋutu, kibelokinos ainyein aputosiakus; kibelokis da akusikonyen ainyein ikusitalesia kere.

⁷ Naarai ŋinituŋanan yenikokek loka Isirael, arai yenika imo luiboiete kotoma Isirael, yenegitar kama ajai, koyaŋa akeputosia kotauke, kibwaik ekomyo loka numam adoliteke kakonyeneke, kobu mama ejai enabi aiŋitun eoŋ: eoŋ EJAKAIT elopet ŋes aboŋokini;

⁸ ido etogogoŋi akakonyen mama ejai ituŋanan ŋin, etuluori da aumokinet, araun aanyunet ka awaragan, agelari da kokidiŋ otuŋaka; ijenunete do ebe arai eoŋ EJAKAIT.

⁹ Ido arai kiŋalai enabi kiner akirot, eoŋ EJAKAIT eŋalat enabi ŋol, ariori da akakan mama ejai, kamudia ŋes kokidiŋ otuŋaka Isirael.

¹⁰Ibwokete da aiticanet naka numam adolitekec: aiticanet naka enabi erianakin cut kaiticanet naka ŋol kalokiŋisit ŋes.

¹¹ Inera Ejakait EDEKE ebe: Kinyek ekek loka Isirael apaar bobo anyoun kama ajai, karaida amunaar bobo kakecediakanareta kere; tetere konyet eraunos ikatuŋa, eoŋ da araun Ekecedeke.”

¹²Kobu akirot naka EJAKAIT mama ajai ebe:

¹³ “Okoku loka etuŋanan, arai kiswama akwap aronis adiakanar mamakaŋ, ariori eoŋ akakan kamake, abilari da ebela loka inyamatake, ejukuni eteŋei, amudiari da ituŋa ka itiaŋ.

¹⁴ Ebala Ejakait EDEKE ebe, Karaida kejaas ituŋa lu luuni kotomakeŋ, Noa, ka Daniel, ka Yob, tikeyuut aijarakec ikulepek bonik kanuka adolitekec.

¹⁵ Arai ketotor itiaŋ lueroko toma akwap, emunaarete iswapi do, tetere emamei ituŋanan yenitori kanuka itiaŋ ŋul;

¹⁶ebala Ejakait EDEKE ebe, Kwape ajaria, karaida kejaas ituŋa ŋul luuni kotomakeŋ, timam keyuut idwekec lusap ka lupesur; kes bonik tikeyuun, konye iswapi akwap.

¹⁷ Arai da kayau ekileŋ akwap ŋin, kabala ebe, Ekileŋ, kitor akwap; kadau ituŋa ka itiaŋ;

¹⁸ebala Ejakait EDEKE ebe, Kwape ajaria, karaida kejaas ituŋa ŋul luuni kotomakeŋ, timam keyuut idwekec lusap ka lupesur, konye kes bonik tikeyuun.

¹⁹ Arai da kejuk atular akwap ŋin, kabukok ca akadedeŋ kaokot, amudiar ituŋa ka itiaŋ:

²⁰ebala Ejakait EDEKE ebe, Kwape ajaria, karaida kejaas Noa, ka Daniel ka Yob kotomakeŋ, timam keyuut idwekec lusap ka lupesur; tikeyuut aijarakec bonik kanuka adolitekec.

²¹ “Naarai inera kwanata Ejakait EDEKE ebe: Itelekari ca ma noi naejukaria itubesiaka iwoŋon luetioko Yerusalem, ekileŋ, ka eteŋei, ka itiaŋ lueroko, ka atular da, amudiar ituŋa ka itiaŋ!

²² Konye arai kesal aatoŋot kotomakeŋ naitolomuni idwe lusap ka lupesur, naelomuniata mamakus, ianyunete yesi da ikecerotin ka akeceswamisio: kitalakario kotoma aronis naayau eoŋ Yerusalem, ŋun kere nuayau kotomakeŋ.

²³ Ebala Ejakait EDEKE ebe, Kitalakarete kesi yes, naianyuniata ikecerotin ka akeceswamisio: ijenunete do ebe mam keswamakinit atitai kere nueswamat.”