Read Ateso Esekiel 17 Bible Online

Esekiel 17 - Ateso bible

Esekiel 17

¹Kobu akirot naka EJAKAIT mama ajai ebe:

²“Okoku loka etuŋanan, kolim asogol, kiner awarag mama ejai ekek loka Isirael:

³ Kiner ebe, Inera kwanata Ejakait EDEKE ebe: Abu emorukaalet loepol lokejaas abebenoka nuepolok ka akopir nueojak, loeleleba ajul, loka ijesesia luipu kobu Lebanon, koyaŋa aidi naka eres:

⁴kobila nakokuju naka aibutunetake, kodaka akwap naka agwelanar; kibwaik ore loka ikagwelanarak.

⁵ Koyaŋa da ikinyom luka akwap kira alup nupusuk, abu kosipok neajaas akipi nuipu, Kibwaik kwape aderut.

⁶Kopoloor, koraun emusabibu loepesit kouriana, kibelokinos atenueikike mamake, kojaas aliasioke kwapuke. Aso koraun emusabibu, kopet atenun, kolibi akidikidin.

⁷“Kejai da emorukaalet ece loepol, lokejaas abebenoka nuepolok ka ajul nuipu: ido koany, kitukud emusabibu ŋol akeliasio mamake, kolibi atenueikike abear neejai, tetere icocoi. Kouko kapanya nueraitai,

⁸kiraik alup nuejok neajaas akipi nuipu, tetere epesi atenun, ido kora araito, koraun emusabibu loejok.

⁹ Kiner ebe, Inera kwanata Ejakait EDEKE ebe: Isirereŋio? Mam kereka erutuni ŋesi aliasioke, kodeŋ akeraito, tetere erinyori? Tetere erinyorete akekwi kere nuepalal nuelibunete; mere kanuka agogoŋ naepol karaida kanuka ituŋa luipu arutun akelias.

¹⁰ Eebo koany, kiraikin, isirereŋio? Mam kereka erinyori cut, kijaŋ ekwam lokokide? Erinyori kotoma apanya nuapolokini.”

¹¹Bobo da kobu akirot naka EJAKAIT mama ajai ebe,

¹² “Kolimok ekek lokepali ebe, Mam kereka ijenete apolou naka akiro kaŋun? Kolimok ebe, Koany, abu ekabaka loko Babulon kobu Yerusalem, kikama ekabakake, ka ikapolokoke, koyaŋau kes neajai Babulon.

¹³ Koyaŋa ediopet kaur naka ekabaka, kitutukoto kaŋes aitutuket; ido kisiyapo ŋes. (Koyaŋa ikagogoŋok luka akwap:

¹⁴ aitisil ajakanut, kinyek adakara, konye kicat kanuka airic aitutuketeke.)

¹⁵ Konye kipaliik kiyakia ikekiyakia Misiri, koinakinai ibalasin ka ituŋa luipu. Isirereŋio kereka ŋes? Ekui tope ŋol loiswamai nuikote nen? Ebili aitutuket, kosodi aiku?

¹⁶ Ebala Ejakait EDEKE ebe, Kwape ajaria, abeit etwanikini loamwaŋi aiyapositike, kobili akeitutuket, kidiŋ Babulon, aibois neiboio ekabaka lokitarau ŋes ekabaka.

¹⁷ Kwabo mam Parao ka akejore nakagogoŋ ka ekekodet loepol iŋarakinete ŋes kojie, naitutuoto itutio, edukete abwasin amudiaria ituŋa luipu.

¹⁸ Naarai amwaŋ aiyaposit ka aibil aitutuket; ido koany, itogogoŋit kakanike, konye eswama ŋun kere; mam ekui.

¹⁹Aso do inera kwanata Ejakait EDEKE ebe: Kwape ajaria, abeit aiyapositika naabu komwaŋa, ka akaitutuket nakebili, etodolikini akouke.

²⁰ Aloki ekaboi mamake, ipoki akatacit, ayaŋauni Babulon, kipuri kaŋes kaŋina kanuka akediakaret naadiakarit kamakaŋ.

²¹ Ibiroros ikakerakake kere lukorioŋetake kere kekileŋ, isiarisiario ŋul kere luideunos kokwamin kere: ijenunete do ebe eoŋ EJAKAIT ener.”

²² Inera kwanata Ejakait EDEKE ebe: “Alemari eoŋ aidi naicelelei naka eres, ebwaikini; abilanari kotoma nukokuju nuka aibutunetake, naenonok, ka aira kuju oroŋat loeoj loimukurur.

²³ Eraikini oroŋat loimukurur loka Isirael: elibi ŋesi atenun, ka aira araito, eraun eres loejok: iboiete akweny nuka iponesio kere kotolim loka atenueikike.

²⁴Ejenunete ikito kere luka ais ebe eoŋ EJAKAIT etisili ekitoi loeoj, etopoloo ekitoi loeuriana, esirinyori ekitoi loepesit, esilibi da ekitoi loeonit. Eoŋ EJAKAIT ener, eswama da.”