Read Ateso Esekiel 18 Bible Online

Esekiel 18 - Ateso bible

Esekiel 18

¹Kobu bobo akirot naka EJAKAIT mama ajai ebe:

² “Apoloukus anyoin, inerasi awarag na nuka akwap naka Isirael ebe, ‘Anyamata lukapapa emusabibu loedwar, aliokos idwe ikel’?

³Ebala Ejakait EDEKE ebe, Kwape ajaria, mam bobo inerasi awarag na koIsirael.

⁴ Koany, eraas itauon kere lukaŋ; kwape etau loka papa, kwape kwaŋin etau loka ikoku da erai lokaŋ; etau loiswamai aronis, ŋes etwani.

⁵“Konye arai edolit ituŋanan kiswamai nuicoranakinio nuibusakinito,

⁶ kwabo mam enyamakinit oroŋan, ido mam iteluorit akekonye mama ejaas aputosia nuka ekek loka Isirael, komam emunaarit aberu naka aupake, komam ikunyakinit aberu apakio nuka atiakarike;

⁷ komam erodit idiotuŋanan, konye kinyakak lokapesenike akeititiŋet, kwabo mam eŋasit idiotuŋanan kagogoŋ, ido kitanyamenenei yeniketeŋei inyamat, kimukonokini da yenemujalal anapito;

⁸ yeneyuununei komam aimedaun, kwabo mam ecamununei luitedeparito kere, yenelemari akekan kama kanumam edolito, yenikitodolenenei etube lokabeit loka etuŋanan ka aupake,

⁹ yenikelosenenei kokisilaka, ido koricenenei itubesiaka, aswam nukabeit; ebala Ejakait EDEKE ebe, ‘Edolit ŋin, abeit ejari.’

¹⁰ “Arai keuri ŋesi ikoku yenerai ikokolan, yenebukonori aokot, yeniswamai adio kakiro kaŋun,

¹¹ kwabo mam iswamai nuibusakinito kere, konye enyamakinit oroŋan, komuna aberu naka aupake,

¹² yenabu korod yenikican ka yenilwaritoi, koŋat kagogoŋ, komam enyakakinit aititiŋet, eteluo akekonye mama ejaas aputosia, eswama nuketal,

¹³ yenayuununei kanuka aimedaunia, yenacamunit luedeparito; aso eraun kereka ŋin ikajaran? Mam ejari. Eswama italesia ŋul kere: abeit etwani; ebeikinete ŋes akeokot.

¹⁴“Koany, arai keuri ŋesi ikoku, yeneanyuni aronisio kere nuka papake nueswamat, koyoŋ, komam iswamai nuikote nen,

¹⁵yenimam enyamakinit oroŋan, ido mam iteluorit akekonye mama ejaas aputosia nuka ekek loka Isirael, yenimam emunaarit aberu naka aupake,

¹⁶ komam erodit ituŋanan kere, yenimam ayanaarit aititiŋet, karaida aiŋat kagogoŋ, konye kitanyamenenei yeniketeŋei inyamat, kimukonokini yenemujalal anapito.

¹⁷ Yenelemari akekan kama kanumam edolito, yenimam ecamunit aimedaun karaida luitedeparito, yenitodolenenei ikatubesia, kolosenenei kokisilaka; mam ŋin etwani kanuka numam adolit nuka papake, abeit ejari.

¹⁸ Konye papake, naarai amwaŋit kadedeŋ, koŋat onaceke kagogoŋ, kiswama numam ejok kotuŋake, koany, etwani kanuka numam adoliteke.

¹⁹ “Konye itemarete yesi atiar, ‘Kanukinyo mam ikoku ibwokia aronis naka papake?’ Arai iswamai ikoku nuicorakinio nuibusakinito, koricenenei ikakisila kere aswam kes, abeit ejari.

²⁰ Etau loeswamai aronis, ŋes etwani. Mam ikoku ibwoki numam adolit nuka papake, kwabo mam papake ibwoki numam adolit nuka okokuke; ejaun adolit naka ikadoliton mamakeŋ, ejaun da aronis naka ikaronon mamakeŋ.

²¹ “Konye arai kibelokin yenikaronon kotoma aronisioke kere nueswamat, koric ikakisilaka kere, kiswama nuicorakinio nuibusakinito, abeit ejari, mam etwani.

²² Mam iitunio akediakanareta nueswamat: ejari kadoliteke nueswamat.

²³ Ebala Ejakait EDEKE ebe, Esiyalamikinit tope atwanare naka ikaronon? Konye gwai kibelokin korotoke, kojar?

²⁴ Konye arai kibelokin ikadoliton kadoliteke, kiswama numam adolit, kiswama da kwape ejaatar italesia kere nuiswamai ikaronon, eraun kereka ŋin ikajaran? Mam iitunio adio kaswamisioke nukadolit nueswamat: kapaarike naepaarit, karonisike naeswamat, etwani kanuka ŋun.

²⁵ “Konye itemarete atiar, ‘Mam eriana erot loka EJAKAIT.’ Aso kiirasi, wu ekek loka Isirael: Mam teni ekarot eriana? Mere ikusirotin lumam erianasi?

²⁶Arai kibelokin ikadoliton kadoliteke, kiswama numam adolit, kotwana kaŋun; kanumam adoliteke nueswamat, etwani kanuka ŋun.

²⁷ Bobo da, arai kibelokin ikaronon karonisike naeswamat, kiswama nuicorakinio nuibusakinito, itajari eketau.

²⁸Naarai eomoomoi, ibelokini kapaaretake nueswamat, abeit ejari, mam etwani.

²⁹Konye etemari ekek loka Isirael atiar, ‘Mam eriana erot loka EJAKAIT.’ Wu ekek loka Isirael, mam teni ikarotin erianasi? Mere ikusirotin lumam erianasi?

³⁰ “Ebala Ejakait EDEKE ebe, Kanuka ŋun ŋes katubokinia akirokon, ijo ekek loka Isirael, ŋinituŋanan kwape ejaatar ikerotin. Koboŋutu, kibelokinos ainyein akusipaar kere, kinyeis numam adolitekus amudiar yes.

³¹ Kocakasi neelwana akusipaar kere nuipaarito; kiswamaut etau lokitetet ka emoyo lokitetet. Kanukinyo ikotor atwanare, ijo ekek loka Isirael?

³² Ebala Ejakait EDEKE ebe, Naarai mam esiyalamikinit atwanare naka ŋin yenetwani: aso do kibelokinos, kojarata.”