Read Ateso Esekiel 20 Bible Online

Esekiel 20 - Ateso bible

Esekiel 20

¹ Kosodi kanen kokaru lokikanyetekaarei, kolap lokikanyet, kapaaran nakitomonet naka elap, kopotu ice komakio luka Isirael aiŋit EJAKAIT, kiboikinos kakonyeneka.

²Kobu akirot naka EJAKAIT mama ajai ebe:

³ “Okoku loka etuŋanan, kinera kimakio luka Isirael, kolimok kes ebe, Inera kwanata Ejakait EDEKE ebe: Iponito aiŋit eoŋ? Ebala Ejakait EDEKE ebe, Kwape ajaria, mam kiŋisete eoŋ.

⁴ Okoku loka etuŋanan, itubokini kereka ijo kes? Itubokini kereka ijo kes? Kitejenik italesia luka lukapapaakec.

⁵ Kolimok kes ebe, Inera kwanata Ejakait EDEKE ebe: Apaaran naaseunia Isirael, kekeu akakan mama ejai aur naka ekek loka Yakob, ketejenun mama ejaas kesi kakwap nako Misiri, naekeunia akakan mamakec, kener atiar, Arai eoŋ EJAKAIT Ekusideke.

⁶ Apaaran ŋin kekeu akakan mamakec, aitonyoun kakwap nako Misiri aitolomar akwap naarotakinit kes, naeleleete akile ka esik, ŋes aibuses naka akwapin kere.

⁷ Kabala kes ebe, Kocaka ŋinituŋanan italesia luimielas akonyekus, ido sirikimunaaros kaputosia nuko Misiri; arai eoŋ EJAKAIT Ekusideke.

⁸Konye kepaliikis, kagiroto akiirar; mam ecakara ŋinituŋanan italesia luimielasi akonyeke, ido mam inyeina aputosia nuko Misiri. “Kasodi kener abukokini kes akadedeŋ, aitodolikin akanyunyura mamakec kokidiŋ kakwap nako Misiri.

⁹ Konye eswama eoŋ ŋun kanuka ekakiror, kinyek amoromoroo kakonyen nuka atekerin nukejaas kesi, nuketejenunor mamakec, ketolomu kakwap nako Misiri.

¹⁰Kwaŋin ketolomu kes kakwap nako Misiri, kayaŋa modiŋ.

¹¹ Kainak ikakisila, ketejenu ikatubesia, luejaria ituŋanan arai kiswama kes.

¹² Bobo da kainak akasabaton, araut aanyunet kidiŋikec ka eoŋ, tetere ejenunete ebe arai eoŋ EJAKAIT loetalauni kes.

¹³ Konye kepaliik ekek loka Isirael kamodiŋ: mam alosenenete kokisilaka, kogiroto ikatubesia luejaria ituŋanan arai kiswama kes; komunaasi noi akasabaton. “Kasodi kener abukokini kes akadedeŋ kamodiŋ, amudiar kes.

¹⁴Konye eswama eoŋ ŋun kanuka ekakiror, kinyek amoromoroo kakonyen nuka atekerin, kanuetolomunia kes kakonyenekec.

¹⁵ Bobo da kekeu akakan mamakec kamodiŋ, kenyek ayaun kes toma akwap naainakinit, naeleleete akile ka esik, ŋes aibuses naka akwapin kere.

¹⁶ Naarai aŋeroto ikatubesia, komam elosenenete kokisilaka, komunaasi da akasabaton: naarai atupanarete ikecetauon aputosiakec.

¹⁷ Konye kitim akakoŋu, kenyek amudiar kes, kwabo mam abu kapia kes cut kamodiŋ.

¹⁸“Kasodi alimokin ikecedwe kamodiŋ ebe, Sirilosenenete kokisila luka lukapapaakus, ido siriricenenete itubesiakec, kwabo sirikimunaaros kaputosiakec.

¹⁹ Arai eoŋ EJAKAIT Ekusideke, kolosenenete kokisilaka, koricenenete ikatubesia, kiswamaenenete,

²⁰ ido kitalautu akasabaton; eraunete aanyunet kidiŋikus ka eoŋ, tetere ijenunete ebe arai eoŋ EJAKAIT Ekusideke.

²¹ Konye kepaliikis idwe; mam kelosenenete kokisilaka, kwabo mam kericenenete itubesiaka aiswamaenen, luejaria ituŋanan, arai kiswama kes; komunaasi da akasabaton. “Kasodi kener abukokin kes akadedeŋ, aitodolikin akanyunyura mamakec kamodiŋ.

²² Konye kenyaku akakan, keswama kanuka ekakiror, kinyek amoromoroo kakonyen nuka atekerin kanuetolomunia kes kakonyenekec.

²³ Bobo da kekeu akakan mamakec kamodiŋ ebe, eweliweli kes toma atekerin, esiarisiari kes toma akwapin;

²⁴ Naarai mam apotu kiswamata ikatubesia, konye koŋeroto ikakisila, komunaasi da akasabaton, ido emielas akecekonye aputosia nuka lukapapaakec.

²⁵ Bobo da abu kainak kes ikisila lumam ejok, ka itubesia lumam ejariata.

²⁶ Kamuna kes kanuka ainakinetakec, naarai kitotorenenoto ikiyaikec kere akim, tetere etisiliori kes, kojenutu ebe arai eoŋ EJAKAIT.

²⁷ “Aso do, okoku loka etuŋanan, kinera kekek loka Isirael, kolimok ebe, Inera kwanata Ejakait EDEKE ebe: Kanuka nu bobo ŋes kamoromorooto lukapapaakus, naarai apotu kepaliikis eoŋ.

²⁸ Naarai naadaunia ayaun kes akwap, nakekeu akakan ainakin kes, kosodete nakeanyuniata eukot loeoja, ka ekitoi loetumit, koinakis kanen asubanakec, koinakis kanen ainakinetakec nuitunyunyurikinete; kanen da kisupuruut asakatakec nueuru saa, kobukonokinete kanen ainakinetakec numatan.

²⁹Kasodi alimokin kes ebe, Aibois naicelelei nailosete apolouke inyo? Kosodi komaikinai ekekiror Bama [3] kiton lolo.

³⁰Aso do kolimok ekek loka Isirael ebe, Inera kwanata Ejakait EDEKE ebe: Imunaaros ca kwape kejaar epone loka lukapapaakus? Ido idotearos ca atupar italesiakec?

³¹ Naiinanakiniata ainakinetakus, naitotorioto idwekus akim, imunaaros ca kaputosiakus kere kiton lolo. Aso kiŋisete ca eoŋ, wu ekek loka Isirael? Ebala Ejakait EDEKE ebe, Kwape ajaria, mam kiŋisete eoŋ.

³² “Kaŋin da naelomari otauonokus mam ejaun nepetai da; naarai ineras ebe, ‘Kirauni kwape atekerin, kwape ikekia luka akwapin, aijaanakin ikito ka amor.’

³³ “Ebala Ejakait EDEKE ebe, Kwape ajaria, abeit arauni ekabakakus kakan nakagogoŋ, kakan da naerioro, kadedeŋ naebukoro.

³⁴Ido kalemuni katekerin, katukonok yes alemun kakwapin nukiisiarakinio, kakan nakagogoŋ, kakan da naerioro, kadedeŋ naebukoro.

³⁵ Kayauni amodiŋ naka atekerin, ido kipuri kaŋina kayes kasesenas kakonyen.

³⁶ Ebala Ejakait EDEKE ebe, Kwape kapurio kalukapapaakus kamodiŋ naka akwap nako Misiri, kwape kwaŋin ŋes kipurio kayes da.

³⁷ Ketotori yes kwap kebela, ketolomari olomorut loka aitutuket;

³⁸ apiari lukepali kotomakus, ka ŋul da luediakarete mama ajai: alemuni kakwap naiboioto, konye mam elomarete akwap naka Isirael. Ijenunete do ebe arai eoŋ EJAKAIT.

³⁹ “Inera kwanata Ejakait EDEKE ebe: Ka jo da, wu ekek loka Isirael, koloto kijaanak ŋinituŋanan aputosiake, amear lolo, arai kiiŋeroto akiirar eoŋ: konye mam bobo imunaarete ekakiror lokalaunan kainakinetakus, ka aputosiakus.

⁴⁰ “Ebala Ejakait EDEKE ebe, Naarai koroŋataka lokalaunan, koroŋat loka aicelel naka Isirael, kanen kejaanakinia ekek kere loka Isirael, kes kere, kakwap: kanen ŋes acamunia kes, kanen da eburaa ainakinetakus, ka araito nugeet nuka ainakinetakus, ka iborokus kere lukalaunak.

⁴¹Acamuni yes kwape asakat naeuru saa, nakalemunia ayaun katekerin, katukonok alemun kakwapin nukiisiarakinitai; ketalaunio kamakus kakonyen nuka atekerin.

⁴² Ijenunete do ebe arai eoŋ EJAKAIT, naketolomaria akwap naka Isirael, akwap naabu kekeu akakan ainakin lukapapaakus.

⁴³ Kosodete iitunete kaŋina ikusirotin, ka aswamisiokus kere, nuipotu komunaarotor; kikadakinete kanuka aronisiokus kere nuiswamato.

⁴⁴ Ebala Ejakait EDEKE ebe, Ijenunete ebe arai eoŋ EJAKAIT nakeswamakiniata yes kanuka ekakiror, mere kwape ejaatar irotinikus lueroko, karaida kwape ejaatar aswamisiokus nukasilianut.”

⁴⁵Kobu akirot naka EJAKAIT mama ajai ebe:

⁴⁶“Okoku loka etuŋanan, kitete akonikonyen eŋalakimak, kolimonok akonikirot kobei eŋalakimak, kodwarak amagoro naka ais nakotoma Eŋalakimak.

⁴⁷ Kolimok amagoro naka Eŋalakimak ebe, Kiira akirot naka EJAKAIT: inera kwanata Ejakait EDEKE ebe, Koany enokokini akim mamakon, kicwe ŋolikitoi loepesit kotomakon, ka ŋolikitoi loeonit: mam itudeŋio aipelonoreta nuka akim naesarani, enyami akim akonyen kere ageun keŋalakimak kiton agolitomei.

⁴⁸Eanyunete awat kere ebe eoŋ EJAKAIT enokokinit: mam itudeŋio.”

⁴⁹Kasodi atemar atiar, “Wu okwe Ejakait EDEKE! Kabalas eoŋ ebe, ‘Mere ŋes eketataman loka awaragasia?’ ”