Read Ateso Esekiel 21 Bible Online

Esekiel 21 - Ateso bible

Esekiel 21

¹Kobu akirot naka EJAKAIT mama ajai ebe:

² “Okoku loka etuŋanan, kitete akonikonyen Yerusalem, kolimonok akonikirot kobei aiboisio nukalaunak; kodwarak akwap naka Isirael.

³ Kolimok akwap naka Isirael ebe, Inera kwanata EJAKAIT ebe: Koany, arai lokasurupikon, ido autuni ekakileŋ kalem kakuraruke, kapiaria cut ikadoliton ka ikaronon.

⁴ Aso naarai kapiari cut ikadoliton ka ikaronon, ŋes einakini ekakileŋ alomun kakuraruke asurokinia awat kere ageun keŋalakimak kiton agolitomei.

⁵ Ejenunete do awat kere ebe eoŋ EJAKAIT autunit ekakileŋ kakuraruke; mam eboŋokini bobo.

⁶ Aso ijo okoku loka etuŋanan, kidiny; kidiny kiŋereteny luebilil, kaiturur naepol kakonyenekec.

⁷Kosodi kanen, kiitemasi atiar, ‘Kanukinyo idinyar?’ kiner ebe, ‘Kanuka apupon, Naarai epote, eburuni ŋolitau, ilajakakaros akanin kere, iilori ŋolimoyo, ekalanyakaros akuŋin kere kwape akipi.’ Ebala Ejakait EDEKE ebe, Koany, epote, iswamao da.”

⁸Kobu akirot naka EJAKAIT mama ajai ebe:

⁹ “Okoku loka etuŋanan, kodwar, kiner ebe, Inera kwanata EJAKAIT ebe: Kiner ebe, Ekileŋ, ekileŋ, ipenitai, epwasitai da!

¹⁰Ipenitai tetere eari, epwasitai da tetere imilia! Aso kiyalamikini baca? Okokuka, imenit ijo ebela, ka ŋinibore kere yenikakitoi.

¹¹Einakinitai ekileŋ apwasio, tetere itiŋio; ipenitai, eebo, epwasitai da, aijaikin akan naka ekaaran.

¹² Okoku loka etuŋanan, komony, kibwolol: naarai esurokinit ituŋaka, esurokinit ikapolok kere luka Isirael: ekorakinitai mama ejai ekileŋ nepepe kikatuŋa, Aso kibap ekonitul.

¹³ Ebala Ejakait EDEKE ebe, Naarai mam eraun eitemis; ikwaikini bo do ŋes ai arai imenit ebela?

¹⁴ “Aso do ijo okoku loka etuŋanan, kodwar, kibap akanin; kitetemono ekileŋ irwan aarei, eebo irwan auni, ekileŋ loka ŋul kalueario; ŋes ekileŋ loka earit loepol, loiriamarit kes.

¹⁵Ebwaik emidet loka ekileŋ oruteikec kere, tetere eburunete ikecetauon, kiyatanakinete aiguikin. Wu okwe! etusubi bala eimilia, eisitai aaria.

¹⁶ Kitemokin, kojep teten; kiderakin, kojep kediany; nen kere neebeit akwanisikon.

¹⁷ Ebapi eoŋ da akakanin, esimoni akanyunyura: eoŋ EJAKAIT ener.”

¹⁸Kobu bobo akirot naka EJAKAIT mama ajai ebe:

¹⁹“Ijo da, okoku loka etuŋanan, kitodik irotin iarei, luebunio ekileŋ loka ekabaka loko Babulon; elomunete ŋul iarei kakwap adiopet. Kigir aibois, kigir neegeunitor erot loebei ore.

²⁰ Kitodik erot loka ekileŋ abunore Raba loka idwe luka Amon, ka Yuda kotoma Yerusalem loebwaitai.

²¹Naarai ebwoi ekabaka loko Babulon kaneetiakar erot, neegeunitotor irotin iarei, airo: ilamilami imalia, kiŋit iterapim,[4] koro emany.

²² Kakanike nakoteten eroet loka Yerusalem, aitemokin akuta nutiyanakinet, awooŋ aituk aiar, aikeseun eporoto keibwoŋ, aitemokin akuta nutiyanakinet orutei, aitut itutio, aiduk arwatatin.

²³ Eraun kamakec bala aidwar naatai kakonyenekec, luiyapoikinete aiyaposio: konye isiituni kes numam adolit, tetere ikamunio.

²⁴“Kanuka ŋun inera kwanata Ejakait EDEKE ebe: Naarai kisiituut numam adolitekus, naarai apukor adiakanaretakus, kotakanut aronisiokus kotoma aswamisiokus kere; ido naarai kiitunio kikamunio kakan.

²⁵ Ijo da, lokaronon Ioimusuŋitai cut, ekapolon loka Isirael, kidolok apaaranikon, apak naka aiticaniokon nakawasia;

²⁶ Inera kwanata Ejakait EDEKE ebe: Kolac egoe lokienieni akou, koou aboko: mam bobo ejaunos ŋun kwaŋin: kitopoloo yenejai kwap, kitisil yenejai kuju.

²⁷ Abuburiari, abuburiari, abuburiari: mam bobo ŋun ejaunete, aitodol neabunio elopet: ido ainakini ŋes.

²⁸ “Ijo da, okoku loka etuŋanan, kodwar, kiner ebe, Inera kwanata Ejakait EDEKE nuka idwe luka Amon, ido nuka amorositikec; kiner ebe, Ekileŋ, ekileŋ loeutunitoi, epwasitai aaria, ajwenyaria, araun kwape eimilia:

²⁹naeanyuniata aamameak kanukon, naedwariata nukaiŋal kanukon, aisiperikin jo omurisiŋa luka ikaronok luimusuŋitai noi, lukedoloki akecepaaran, apak naka aiticaniokec nakawasia.

³⁰Kinyakak akuraruke, Aibois nakisubakinitai, akwap nakiwurikinitai, nepenen katubokinia.

³¹Ido kabukokini jo akaisiop; kakutakini jo akim naka akanyunyura: kejaikini akanin nuka ituŋa luesubito bala itiaŋ, luepiriaka amudiar.

³²Iraun akito nukinoka; ejaunos akoniwokot kidiŋ akwap; mam kiitunio bobo: naarai eoŋ EJAKAIT ener.”