Read Ateso Esekiel 24 Bible Online

Esekiel 24 - Ateso bible

Esekiel 24

¹Bobo da, kokaru lokikanyetekaoŋon, olap lokitomonet, kapaaran nakitomonet naka elap, kobu akirot naka EJAKAIT mama ajai ebe:

² “Okoku loka etuŋanan, kiwadik ekiror loka apaaran, apaaran napena. Ekunyu do ekabaka loko Babulon Yerusalem apaaran napena.

³ Kinerak ekek lokepali awarag, kolimok ebe, Inera kwanata Ejakait EDEKE ebe: Kidorok amot, kidorok, Kobukok akipi:

⁴Kotukonok inerioke, Ŋoliiner loejok, amurwo ka akuat; Kileleb akojo nueseunitai.

⁵Koyaŋa lueseunitai kosipan, Kotukok akojo kwapuke; Kitukul noi; Eebo kipooto noi akojoke kotomake.

⁶ “Kanuka ŋun inera kwanata Ejakait EDEKE ebe: Itukwi ere lokaokot, amoti nairourounit, airourounike namam alomuni kotomake! Kisujau einer ka einer komam eroet edoikinit.

⁷ Naarai ejaas akeokot kidiŋike; ebwaiki atiida naelapat; mam ebukokinit alup, arapar kapua.

⁸ Tetere kitodoku adedeŋ ainyaŋia, ebwaik eoŋ akeokot atiida naelapat, kinyeis arapara.

⁹ Kanuka ŋun inera kwanata Ejakait EDEKE ebe: Itukwi ere lokaokot! Etopoloori da atukot nakakito.

¹⁰Kicul akito, kinokok akim, kipo noi akiriŋ, kisidiki acece, kosisioto akojo.

¹¹ Kosodi aibwaikin amot atotoleke komamei ibore kotoma, komwanuu, kidop aisinitike, kocalar amadokokoke, kodaun airourounike.

¹²Ketapas aitaaritoi; kwabo mam elemar airourounike naepol; mam airourounike elemar kakim.

¹³ Airourounike ŋes eporokon lomodok. Naarai abu ketesega jo, komam jo isegar, mam bobo kitesegaario aitodol naesimonikinia akadedeŋ mamakon.

¹⁴ Eoŋ EJAKAIT ener: edoli, eswamai da. Ebala Ejakait EDEKE ebe, Mam aboŋori kau, ido mam etimi, ido mam eitokini; kwape ejaatar ikonirotin, ido kwape ejaatar akoniswamisio, kitubokinete akiro.”

¹⁵Ido da kobu akirot naka EJAKAIT mama ajai ebe:

¹⁶“Okoku loka etuŋanan, koany, ademari katipet kamakon naimielas akonikonye: konye mam ikuudiani karaida aimony, karaida akiyo alele kakonyekon.

¹⁷ Kidiny, konye eililiŋa; sirikikuudian nakatwan. Koen ekonigoe loka akou, konap akonimuk kakejekon; sirikirapak aituk, karaida ainyam atap naka ikebworok.”

¹⁸Abu kener kituŋa tupuruc; kotwana akaberu eboŋ. Keswama atupuruc nace kwape kecorakinetere.

¹⁹ Kalimokis ituŋa ebe, “Kitejenunai sio anyoika akiro nu kamakosi, iswamaa kwana?”

²⁰Kabala kes ebe, “Abu akirot naka EJAKAIT kobu mama ajai ebe:

²¹ ‘Kolimok ekek loka Isirael ebe, Inera kwanata Ejakait EDEKE ebe: Koany, amunaari akaibois nakalaunan, eitur loka apedorikus, naimielas akonyekus, eipud da loka aijarakus; ibiroros ikusidwe lusap ka lupesur kekileŋ, luipotu kojalakis.

²² Iswamaete yesi da kwape eswamaa eoŋ: mam irapakinete aitukekus, kwabo mam inyamete atap naka ikebworok.

²³ Ejaunos igoenekus akwesikus, ka amukakus akejekus: mam ikuudianete karaida aimony; konye idokororiaros kanumam adolitekus, idinyanakinos ŋinituŋanan kaupake.

²⁴ Kwaŋin eraun Esekiel aanyunet kamakus; kere nueswama ŋesi iswamaete yesi da. Naejauniata ŋun, kosodi do ijenunete ebe arai eoŋ Ejakait EDEKE.’

²⁵“Ka jo da, okoku loka etuŋanan, kapaaran naalemaria agogoŋukec, aiyalama naka aibusesukec, naimielas akonyekec, ka ŋin naebwaikinito ikecetauon, ka ikecedwe da lusap ka lupesur,

²⁶apaaran ya ebuni yenekui mamakon, kisiira jo kaki.

²⁷ Kapaaran kaya iwooŋaari aitukukon mama ejai ŋin yenekui, ineri da, komam bobo ibaŋaana. Kwaŋin iraunor aanyunet mamakec: ejenunete do ebe arai eoŋ EJAKAIT.”