Read Ateso Esekiel 26 Bible Online

Esekiel 26 - Ateso bible

Esekiel 26

¹Kosodi kanen kokaru lokitomonet kadiopet, kapaaran nasodit naka elap, kobu akirot naka EJAKAIT mama ajai ebe:

² “Okoku loka etuŋanan, naarai enerak Turo Yerusalem ebe, ‘Uus, abila ŋol lokerai erute loka ituŋa; ebelokin neajai: elelebun do, naarai kwana eswap ŋesi.’

³Aso inera kwanata Ejakait EDEKE ebe: Koany, ijo Turo, kasurokini jo, ketonyoikini atekerin nuipu, kwape itonyounio aŋolol akekailan.

⁴Emudiarete kesi arwatatin nuka Turo, ka atiyatiya itogoike lueojak; ekisari apuake, etuluori atiiba naelapat.

⁵ Ebala Ejakait EDEKE ebe, Eraun aibois naeterarere iboyan kokidiŋ aŋolol: naarai eoŋ ŋes ener: eraun ŋesi enatat loka atekerin.

⁶ Eario apesuruke nuejaas orony kekileŋ, Ejenunete do ebe arai eoŋ EJAKAIT.

⁷ “Naarai inera kwanata Ejakait EDEKE ebe: Koany, ayauni Nebukadaresar ekabaka loko Babulon, ekabaka loka ikabakan, anyoun kagolitomei, asurokin Turo, ejaas kibalasin, ka agalin, ka ikebwanenok, ka ajore, ka ituŋa da luipu.

⁸ Eari apesurukon nuejaas orony kekileŋ: eduki arwatatin asurokinia, itutuei etut asurokinia, kikeikini eupal.

⁹Ibwaikini akutake nutiyanakinet arwatatinikon, ido ejepejepei cut abwasinikon kaepeike.

¹⁰Kirapari apua naka ibalasinike naarai ipu: ilokilokos arwatatinikon kanuka ecelet loka ikebwanenok, ka loka akokoron, ka loka agalin, naelomaria koruteikon, kwape elomariata ituŋa ore loebelitai arorwa.

¹¹Ipudapudai ikonirotin kere kimageger luka ibalasinike: eari ikonituŋa kekileŋ, ijesunos ipirin luka agogoŋukon kwap.

¹²Ido enaŋete akonibar, emejaete lugwelanarakon: etiyatiyaete cut arwatatinikon, emudiarete itogoikon lukaisiyalamikina: ecakanakinete amorukon ka akitokon ka apuakon kidiŋ akipi.

¹³ Ido etanaŋi eoŋ eporoto loka ikososiokon; mam iirario bobo aruo naka adeudeunokon.

¹⁴Ido ketuluori atiiba naelapat: iraun aibois naeterarere iboyan; mam kidukio bobo, Naarai ebala Ejakait EDEKE ebe, Eoŋ EJAKAIT ener.

¹⁵ “Elimokini Ejakait EDEKE Turo kwanata ebe: Mam kereka emaranete apujana kanuka airetun naka aibirorikon, naidinyatar luimusuŋitai, naejaar earit kidiŋikon?

¹⁶ Kosodete ijesunos ikapolok kere luka aŋolol koicoloŋokec luka ajakanut, elemunete ikecegoen, elacunete ikecenapen luesonyitai: enapete amaran; iboikinos kwap, emaranete ŋinipak, kiumokinete jo.

¹⁷ Kikuudianete, kobalas ebe, ‘Imudiari ca, loeboienenoto ikekwaŋak aŋolol, Ere loajena, Lokegogoŋ kaŋolol, Ŋol ka lukiboiete kotoma, Lokititasurokinit ŋul kere lueboiete kotoma.

¹⁸Kwana emaranete apujana Kapaaran naka aibirorikon, Eebo, apujana nuejaas aŋolol Eburunete kanuka alositekon.’

¹⁹“Naarai inera kwanata Ejakait EDEKE ebe: Naketuluoria jo ere lokitisilio, kwape ireria luemameete luiboiete kotoma; naketadakikinia akar, nakirapariata akipi nuipu;

²⁰ ŋes konyet kesijesunia jo nepepe kaŋul luijesunos toma Aipany, mama ejaas ituŋa luŋo, kesiboikini atutubeta nukokwap nuka akwap, aiboisio nuesilok nuŋo; nepepe kaŋul luijesunos toma Aipany kinyek ajaut kituŋa; ido ebwaikini aibuses akwap naka ikajarak.

²¹ Ebala Ejakait EDEKE ebe, Ketuluori jo etasuro, mam bobo ijaun: karaida kiimoi, mam kianyunio bobo.”