Read Ateso Esekiel 27 Bible Online

Esekiel 27 - Ateso bible

Esekiel 27

¹Kobu bobo akirot naka EJAKAIT mama ajai ebe:

² “Ijo da, okoku loka etuŋanan, kokuudian Turo;

³ kolimok Turo ebe, Wu jo loiboie kaneelomarere aŋolol, loirai ekagwelanaran loka atekerin mama ejaas apujana, inera kwanata Ejakait EDEKE ebe: Ijo, wu Turo, iner ebe, ‘Adolit eoŋ kajokis.’

⁴Ejaas iikorunokon otau loka aŋololin; Itodolito ikadukokokon ajokisikon.

⁵ Eswamata abaoikon kere Koberosin lueyaunio koSenir: Ayaut iresia koLebanon Aiswamakinia jo epir.

⁶ Eswamata akiŋolakon koluan luko Basan; Eswamata atutubetakon nukokwap koteasurin Lueyaunio kapujana nuka Kitim, Kitwalitete kikela luka itomei.

⁷ Korai emederakon loka ebaputa loejok Loesonyitai loeyaunio koMisiri, Koraun aanyunetekon; Ijesesinei lubulului ka lumugeik Lueyaunio kapujana nuka Elisa Kiswapito jo.

⁸Keraas ikonikekwaŋak Luiboiete koSidon ka Arubad; Ijo Turo, kejaas lukacoakon kotomakon, Keraas ikeŋarenokokon.

⁹ Imakio luko Gebal, ka lukacoake Keraas ikanwokakakon kotomakon; Atakerin kere nuka aŋolol nepepe kikenareŋokokec Kejaas tomakon aisiecanar igwelanarakon.

¹⁰ “Perusia ka Lud ka Put kejaas ajorekon, ikajiokokon: kikajanakinete ibukui ka akopiran tomakon; kiturito akonijokis.

¹¹Kejaenenas ituŋa luka Arubad nepepe kajorekon kuju arwatatinikon airimor, kejaenenas Igamain toma abwasinikon: kikajanakinete ibukuikec arwatatinikon airimor; itodolito ajokisikon.

¹² “Kerai Tarusis ekagwelanaranikon kanuka aipues naka abar nakiponesio luipu; kisiceanarete epuesa, ka asua, ka adebe, ka asasin kanuka iborokon.

¹³ Yaban, ka Tubal, ka Mesek, keraas ikagwelanarakakon; kisiceanarete kesi awat nuka ituŋa ka iboro luka aisinin kanuka igwelanarakon.

¹⁴ Kisiceanarete lukokek loka Togaruma ibalasin ka ibalasin luka ejie ka inyubun kanuka iborokon.

¹⁵ Keraas ituŋa luko Dedan ikagwelanarakakon: keraas apujana nuipu agwelanaret naka akanikon: kiinununete ikela luka itomei ka eboni,[5] aisiecanar.

¹⁶Kerai Edom ekagwelanaranikon kanuka aipues naka aswamisiokon: kisiceanarete imeralidin, ka lumugeik, ka aswam naesonyitai, ka ebaputa loejok, ka koral,[6] ka amor da nukareŋak kanuka iborokon.

¹⁷ Yuda ka akwap naka Isirael keraas ikonikagwelanarak: kisiceanarete akima nuka Minit, ka Panag, ka esik ka akinyet, ka emim kanuka igwelanarakon.

¹⁸Kerai Damasiko ekagwelanaranikon kanuk: aipues naka aswamisiokon, kanuka aipues naka abar nakiponesio luipu kebino loka Kelubon, ka ajul nuekwaŋak nuka amerekekin.

¹⁹Kisiecanaret Bedan ka Yaban iusio kanuka iborokon: asua nuepwatat, ekasia, ka akalamu keraas igwelanarakon.

²⁰ Kerai Dedan ekagwelanaranikon loka igoen luketiai lukibwanenis.

²¹ Arabia, ka ikapolok kere luko Kedar, keraas ŋul ikagwelanarak luka akanikon; imerekekin ludidik, ka imerekekin ka akinei keraas ikagwelanarakakon luka ŋul.

²² Ikagwelanarak luko Seba ka Raama keraas ikagwelanarakakon: kisiceanarete luitelekarito kere kalueuru maa, ka amor kere nuketiai, ka esabu, kanuka iborokon.

²³ Karan, ka Kane, ka Eden, ikagwelanarak luko Seba, ka Asur ka Kilimad, keraas ikagwelanara kakon.

²⁴Keraas ŋul ikagwelanarak luka iboro lueseunitai, iloun lubululu ka luesonyitai, ka asadukun nuka inapen luibusak, nueenitai kaunoi nueswamaunio keres, kalugwelanarakon.

²⁵ Keraas ameerin nuka Tarusi nukalotok nuka igwelanarakon. Kitelelebi, kitubusikinitete noi Kotoma otau loka aŋololin.

²⁶ Kiyanaasi ikekwaŋakakon akipi nuipu: Kibili ekwam lokokide kotau loka aŋololin.

²⁷ Abarakon, ka iborokon igwelanarakon, Ikekwaŋakakon, ka ikeŋarenokokon, Ikanwokakakon, ikesiecanarak luka igwelanarakon, Ka ituŋakon kere lukajiok, luejaas tomakon, Nepepe katukotokon kere naejai kidiŋikon, Ibirokinos otau loka aŋololin Apaaran naka aibirorikon.

²⁸Emaranete ironyia Kanuka eporoto loka aimony naka ikeŋarenokokon.

²⁹ Ijesunos kameerinikec Kere luitiŋito akiŋolia. Ikekwaŋak, ka ikeŋarenok kere luka aŋolol, Ebwoete do kaneonit.

³⁰ Isiirarete ikeceporotoi mamakon, Edelorete, Iwelanakinos apua akwesikec, Ibelibelos kokurwon.

³¹Ebarenos kanukon, enapete ipukoi, Ido emonyete akiyo kanukon kokadakinito itauonokec Kaibworo naedwar.

³²Kotoma aimonyokec ekuudianete kanukon, Kikuudianikinete ebe, ‘Iŋai ma eputosi bala Turo, Bala ŋol loisililinio kokidiŋ aŋolol?

³³Nakelomuniata iborokon kotoma aŋolol, Kisimonik ituŋa luipu; Kanuka aipues naka abarakon ka igwelanarakon Kitabar ikabakan luka akwapin.

³⁴Kwana kibilata aŋololin Kataro naka akipi, Kolumosi igwelanarakon ka atukotokon kere Nepepe kajo.

³⁵ Kiumokis luiboiete kere kapujana, Akuriakata noi ikabakanakec, Anyorididoto ireetakec.

³⁶ Kisuasi ikagwelanarak kokidiŋ otuŋa; Iraun etasuro, Mam bobo ijaun.’ ”