Read Ateso Esekiel 29 Bible Online

Esekiel 29 - Ateso bible

Esekiel 29

¹Kokaru lokitomonet, kolap lokitomonet, kapaaran nakitomonet kaarei naka elap, kobu akirot naka EJAKAIT mama ajai ebe:

² “Okoku loka etuŋanan, kite Parao ekabaka loko Misiri, kodwarak ŋes, ka Misiri da kere.

³ Kiner, kobala ebe, Inera kwanata Ejakait EDEKE ebe: Koany, kasurokini jo, Parao ekabaka loko Misiri, Apiu naepol naeperi kokidiŋ ocorinike, Naabu kiner ebe, ‘Ekacor ekaŋ, Eoŋ elopet asubuni.’

⁴ Ebwaikini igolun abokonyakon, Eminaikini agaria nukocorikon aabelekon; Kebwosuni jo kokidiŋ ocorinikon, Ijo ka agaria kere nukocorinikon Nuiminaikina aabelekon.

⁵ Kenyeini kicakakinitai amodiŋ, Ijo ka agaria da kere nukocorinikon: Ibirokin kiŋa ais; Mam kitukonokinio, kwabo mam kimudio, Kainaki jo araun inyamat Luka itiaŋ luka akwap, ka akweny da nuka apak.

⁶ “Ejenunete do luiboiete kere koMisiri ebe arai eoŋ EJAKAIT. Naarai keraas ebela loka egada mama ejai ekek loka Isirael.

⁷ Kiitiŋi kakan, kobila, kocil ikeperinikec kere: kegoŋakinos jo, kobila, kisimaran aŋabesikec.

⁸Kanuka ŋun inera kwanata Ejakait EDEKE ebe: Koany, kainuni ekileŋ, amudiari ituŋa ka itiaŋ.

⁹ Eraun akwap nako Misiri naesil naiswapit. Ejenunete do ebe arai eoŋ EJAKAIT. “Naarai abala ebe, ‘Ecor ekaŋ, eoŋ asubuni.’

¹⁰ Aso koany, arai eoŋ lokasurupikon ka ikonicorin da, etarauni akwap nako Misiri naiswapit cuc naesil, ageun kotogo loeoja loka Sebene kiton oikor loka Etiopi.

¹¹ Mam itorete akeje nuka ituŋanan, ido mam itorete akeje nuka itiaŋ, mam da ituŋa iboikinos toma adaun ikar akaisaoŋon.

¹² Etarauni akwap nako Misiri naesil kokidiŋ akwapin nuesilok, ka ireriake da kokidiŋ oreria luiswapito eraunete luesilok adaun ikar akaisaoŋon. Esiarisiari Imisirian toma atekerin, eweliweli kes anatar akwapin.

¹³ “Naarai inera kwanata Ejakait EDEKE ebe: Ketuboros ikar akaisaoŋon atukonokini Imisirian kotoma otuŋa kama esiarakina.

¹⁴Enyakuni aijoreorio nako Misiri, etoboŋuni kes kiton akwap nako Pataros, kiton akwap naewurikinitai; ejaunete ŋina ajakanut nakokwap.

¹⁵Eraun nakokwap aitelekarit ajakanuto kere; ido mam bobo itopoloor aitelekarit atekerin: eŋoŋori kes, komam bobo eyaito atekerin.

¹⁶ Mam bobo eraun amun naka ekek loka Isirael kisiitununei numam adolitekec, naibelokinotor asesen kes. Ejenunete do ebe arai eoŋ Ejakait EDEKE.”

¹⁷Kosodi kanen kokaru loka akaisaarei ka lukanykaarei kolap losodit, kapaaran nasodit naka elap, kobu akirot naka EJAKAIT mama ajai ebe:

¹⁸ “Okoku loka etuŋanan, abu Nebukadaresar ekabaka loko Babulon koinak ajoreke aitaaritoi naepol asurokinia Turo: adum ŋinikou epata, abulucar ŋolikeper: kwabo mam eropio ŋes karaida ajoreke koTuro, kanuka aitaaritoike naetaaritoi asurokin.

¹⁹Kanuka ŋun inera kwanata Ejakait EDEKE ebe: Koany, ainakini Nebukadaresar ekabaka loko Babulon akwap nako Misiri; eyaŋaari ŋesi ekodeteke, eŋasi, emejai da; eraun eropit loka ajoreke.

²⁰ Ebala Ejakait EDEKE ebe, Ainak ŋes akwap nako Misiri atacia aitaaritoike, naarai keswamakis eoŋ.

²¹ “Apaaran ŋin esibwanikini ekek loka Isirael amumwarat, esiwooni akoniituk kokidiŋikec. Ejenunete do ebe arai eoŋ EJAKAIT.”