Read Ateso Esekiel 31 Bible Online

Esekiel 31 - Ateso bible

Esekiel 31

¹Kosodi kanen kokaru lokitomonet kadiopet, kolap lokiwuniet, kapaaran nasodit naka elap, kobu akirot naka EJAKAIT mama ajai ebe:

²“Okoku loka etuŋanan, kolimok Parao ekabaka loko Misiri, ka ekekodet ebe: Iputosi kaŋai kapoloukon?

³ Koany, kerai Eyasuriat eres loka atenueik nuejok koLebanon, Loejai etolim loerapari, loeoja: Kojai aidike odouon.

⁴Kitanete akipi ŋes, Kitopol aidules naka icorinike, Lueleleete airimor emanikorike; Abu kitodol alelesiake Okito kere luka ais.

⁵ Kanuka ŋun kitopolooroi Aitelekarit ikito kere luka ais; Kopeta atoromake, Koojakaros atenueikike, Kanuka akipi nuipu kotoma akidikidinike.

⁶ Kodukoto akweny kere nuka apak Akaisikec atenueikike, Kouriata itiaŋ kere luka ais idwekec Kwap katoromake, Kiboioto atekerin kere nukapolok Kotolimike.

⁷Kwaŋin korai loejok kapolouke, Kaojau naka atenueikike; Naarai kejaas akeliasio neejaas akipi nuipu.

⁸ Iresia lukomanikor loka Edeke Mam apedorete aibwa ŋes: Mam iberosin ariakas katoromake, Mam iaremok eputosi atenueikike; Kwabo amamei ekitoi kere komanikor loka Edeke Loaputotor ŋes kajokis.

⁹ Etojoka ŋes kanuka aipues naka atenueikike: Kwaŋin kitokokoloto ŋes ikito kere luka Eden, Luajaas omanikor loka Edeke.

¹⁰ “Kanuka ŋun inera kwanata Ejakait EDEKE ebe: Naarai itopoloor kanuka aojau, ido ejai aidike odouon, ikeuna eketau kanuka aiceleleke;

¹¹ejaikini ŋes akan naka lokapedor loka atekerin; abeit iswamakini ŋes kwape ejaatar nukaronokoke, Ereŋea ŋes.

¹² Ajepata ŋes imo, lusogim luka atekerin, enyekis. Ibiroros atenueikike koroŋan kaditono da kere, abilas atoromake kotoma alelesia kere nuka akwap; anyoutu atekerin kere nuka akwapin kotolimike, enyekis ŋes.

¹³ Iboikinos akweny kere nuka apak akuanake naibiroro, ejaunos itiaŋ kere luka ais atenueikike:

¹⁴ tetere mam itopoloori imodiokitoi kere yeneapias kakipi kaojauke, karaida aitodol aidike odouon, karaida lukapedorike aibwo kaicelelekec, kere luemasete akipi: naarai ijaikinio kere atwakare, kiton atutubeta nukokwap nuka akwap, kokidiŋ odwe luka ituŋa, nepepe kaŋul kaluijesaros Aipany.

¹⁵“Inera kwanata Ejakait EDEKE ebe: Kapaaran naejesaror Okatwak, esibwori aidules, aeni icorinike, itikokinio akipi nuipu: esirioni Lebanon kanuke, iilooros ikito kere luka ais kanuke.

¹⁶ Abu kesimaran atekerin kanuka airurum naka aibirorike, naacakaria Okatwak nepepe kaŋul kaluijesaros Aipany: alakaros ikito kere luka Eden, luejok lueseunitai luka Lebanon, kere luemasete akipi, kotoma atutubeta nukokwap nuka akwap.

¹⁷ Apotu kesi da kijesaros Okatwak nepepe kaŋes mama ejaas ŋul lukearitai kekileŋ; eebo, ŋul lukeraas akanike, lukiboienenete kotolimike kokidiŋ katekerin.

¹⁸ Iŋai ca ma iputotor kotoma aibuses ka apolou kokito luka Eden? Kwabo kijesario nepepe kikito luka Eden kiton atutubeta nukokwap nuka akwap; iperi kokidiŋ kalumam ekepitai nepepe kaŋul kalukeario kekileŋ. “Ebala Ejakait EDEKE ebe, ŋol ŋes Parao ka ekekodet kere.”